عالىمدار ناۋقاستاردىڭ مەيىرىمدى دارىگەرلەردە جىلدام جازىلاتىنىن انىقتادى
عالىمداردىڭ پىكىرىنشە، مەديتسينا قىزمەتكەرلەرىنىڭ مىنەز- قۇلقى ناۋقاستىڭ ەمدى قالاي ۇستاناتىنىنا تىكەلەي اسەر ەتەدى. دارىگەرلەر ناۋقاسقا قامقورلىق كورسەتكەندە جانە ولار ونى سەزىنسە، ەمدەلۋشىلەر ەمگە ۇلكەن جاۋاپكەرشىلىكپەن قارايدى.
وسىعان قاتىستى زەرتتەۋشى ەنتوني ماتستسارەللي تاعى ءبىر مىسال كەلتىردى. ونىڭ ايتۋىنشا، دارىگەرلەردىڭ نەمەسە مەدبيكەلەردىڭ وتا الدىندا ناۋقاستارعا قولداۋ كورسەتۋى ولاردى تىنىشتاندىرۋعا مۇمكىندىك بەرەدى. ياعني، تىنىشتاندىراتىن اسەرگە قول جەتكىزەدى. سونىمەن قاتار، وتادان كەيىن اۋىرسىنۋدى باساتىن دارىلەرگە دەگەن قاجەتتىلىك تومەندەيدى.
زەرتتەۋشىلەر سونداي- اق، ەمدەۋشى دارىگەرلەردىڭ مەيىرىمدىلىگى مەن اياۋشىلىق سەزىمى ەمدەلۋشىگە عانا ەمەس، سونىمەن بىرگە مەديتسينا قىزمەتكەرلەرىنە دە پايداسىن اكەلەدى دەيدى. سەبەبى، ناۋقاس جىلدام جازىلعاندىقتان، دارىگەرلەر جۇمىس ماسەلەلەرىنە الاڭداماي، شارشاماي جۇرەدى.
وسىعان وراي، ماتستسارەللي ناۋقاس ءوزىن جايلى سەزىنۋ ءۇشىن دارىگەر ۇستانۋى ءتيىس بىرنەشە ەرەجە ۇسىندى:
مەديتسينا قىزمەتكەرى ناۋقاسپەن سويلەسكەن كەزدە تۇرىپ تۇرماي، وتىرىپ سويلەسۋى ءتيىس؛
دارىگەر ناۋقاستىڭ كوزىنە قاراپ سويلەۋى كەرەك؛
ول ەمدەلۋشىنىڭ تەك فيزيكالىق ەمەس، سونىمەن قاتار ەموتسيونالدىق جانە پسيحيكالىق دەنساۋلىعىنا دا نازار اۋدارۋى كەرەك.
ماتستسارەللي سونىمەن قاتار سويلەسكەن كەزدە ناۋقاستاردىڭ ءسوزىن بولەتىن دارىگەرلەردەن اۋلاق ءجۇرۋدى ۇسىندى.
2018 -جىلى جۇرگىزىلگەن زەرتتەۋگە سايكەس، دارىگەرلەر ورتاشا ەسەپپەن 11 سەكۋند سايىن ناۋقاستاردىڭ ءسوزىن بولەدى ەكەن. بۇل جاعدايدا زەرتتەۋشىلەر ناۋقاستارعا ءوز قيىندىقتارىن سيپاتتاۋ ءۇشىن 29 سەكۋندتىڭ قاجەت ەكەنىن انىقتادى.