قازاقستاندىق تاۋارلاردىڭ قاپتاماسىن جاساۋعا مەملەكەت كومەكتەسەدى

نۇر- سۇلتان. قازاقپارات - قازاقستاندا ونەركاسىپتىك ديزاين مەن قاپتامالىق شەشىمدەر ورتالىعى اشىلادى، دەپ حابارلايدى قازاقپارات.

بۇل تۋرالى «قازاقستان قاپتاۋشىلار قاۋىمداستىعى» زاڭدى تۇلعالار بىرلەستىگىنىڭ ءتوراعاسى باتىربەك اۋباكىروۆ مالىمدەدى.

قاپتاۋشىلار قاۋىمداستىعى بازاسىندا ونەركاسىپتىك ديزاين مەن قاپتامالىق شەشىمدەر ورتالىعىن اشامىز. وسىلايشا، ق ر يندۋستريا جانە ينفراقۇرىلىمدىق دامۋ مينيسترلىگىمەن بىرلەسىپ، قازاقستاندىق تاۋارلاردىڭ رەبرەندينگىنە باسىمدىق بەرەمىز دەپ ويلايمىن. ماسەلەن، «راحات» كومپانياسى جىلىنا 3 ميلليارد تەڭگەگە قاپتاما ساتىپ الادى جانە ءوز تاۋارىن شەتەلگە تابىستى ەكسپورتتاپ جاتىر. ءبىزدىڭ ويىمىزشا، وزگە زاۋىتتاردىڭ دا الەۋەتى زور جانە ولاردىڭ اناعۇرلىم ساپالى ءارى جاڭا قاپتاماعا اۋىسۋىنا كومەكتەسۋ قاجەت»، - دەدى ب. اۋباكىروۆ ەلوردادا وتكەن «سەلليۋلوزا- قاعاز ونەركاسىبى مەن قاپتاما يندۋسترياسىن دامىتۋ» فورۋمىندا.

ونىڭ ايتۋىنشا، مەملەكەت جاڭا قاپتاما شىعىندارىن وتەۋگە كومەكتەسە الادى.

«ماسەلەن، جوعارى ساپالى قاپتاما ميلليون تەڭگەگە باعالانسا، مەملەكەت ونىڭ 800 مىڭ تەڭگەسىن وتەيدى. قالعان 200 مىڭ تەڭگەنى كاسىپكەر تولەيدى. ازىرگە ۇكىمەتپەن كەڭەسىپ جاتىرمىز. شامامەن 1 - قىركۇيەكتە ۇكىمەتكە اقپارات جىبەرىپ، كەلەسى جىلعى بيۋدجەتتەن قاراجات قاراستىرا بەرەمىز. كەز كەلگەن كاسىپكەر ءوز تاۋارىن قىتايعا، رەسەيگە، وزبەكستانعا ەكسپورتتاعىسى كەلسە، سول وڭىرلەرگە ءتان قاپتاما جاساۋدى ەسكەرۋى قاجەت. بۇل ءۇشىن ءبىز كومەكتەسۋگە ءازىرمىز»، - دەدى باتىربەك اۋباكىروۆ.

اۆتور: ايجان سەرىكجان قىزى