جاس قازاقستاندىق بيولوگتىڭ سينگاپۋرداعى عىلىمي قىزمەتى جايىندا ايتىپ بەردى
مەن PhD باعدارلامالارىنىڭ ءبىرى بويىنشا قۇجاتتارىمدى تاپسىردىم جانە وتكەن جىلى ماعان شاقىرتۋ كەلدى. سينگاپۋرعا بارۋ نەمەسە بارماۋ جايىندا ويلانۋعا ءبىر اپتا ۋاقىتىم بولدى.
سينگاپۋر جايىندا
وسىندا العاش رەت كەلگەن كەزدە، سينگاپۋر - ازيالىق ادامدارعا ارنالعان ەۋروپا رەتىندە كورىندى، سەبەبى بۇل تازا جەر، ازاماتتىق ەل. بۇل كىشكەنتاي مەملەكەت، ول ەشتەڭە وندىرمەيدى، ەكسپورتتارى جوق، ءتىپتى جەكە سۋى دا جوق - ونى مالايزيادان ساتىپ الادى، ءبىراق بۇل مەملەكەت 50 جىل ىشىندە العاشقى قاتارداعى ەلدەردىڭ دەڭگەيىنە دەيىن جەتكەنى تاڭ قالدىرادى. سينگاپۋر مالايزيانىڭ وتارىندا بولدى، كەيىن انگليا سينگاپۋرعا تاۋەلسىزدىگىن الۋعا سەپتىگىن تيگىزدى، سول سەبەپتى وسىندا اعىلشىن مادەنيەتىنىڭ ءىزى قالدى. وسىندا انگياداعى مۇراجايلارى مەن ۇيلەرىنە ۇقسايتىن مۇراجاي بار.
سينگاپۋر ساياحاتتاپ كەلۋ ءۇشىن كەرەمەت ەل، تەك بۇل وتە قىمبات. قازاقستانعا قاراعاندا تاماققا ءۇش ەسە كوپ اقشا كەتەدى. سينگاپۋرعا ۇزاق ۋاقىتقا، اسىرەسە، وقۋعا نەمەسە جۇمىس ىستەۋگە بارساڭىز، كوپ جۇمىس ىستەۋگە تۋرا كەلەتىنىنە دايىن بولۋ كەرەك. جەرگىلىكتى ادامدار ەڭبەكقور، سەبەبى وسىندا باسقاشا ءومىر ءسۇرۋ مۇمكىن ەمەس. وسىنداعى ءومىر قىمبات بولعاندىقتان، ءوزىڭدى جانە وتباسىڭدى اسىراۋ ءۇشىن، ادامدار كوپ جۇمىس ىستەيدى - ورتاشا ەسەپتەگەندە تاۋلىگىنە 10-12 ساعات جۇمىس ىستەيدى. مەن ءۇشىن بۇل ۇلكەن كۇيزەلىس بولدى، مەن كوپكە دەيىن ۇيرەنە الماي، قاتتى شارشاپ ءجۇردىم. ءبىر كەزدە بۇل داعدىعا اينالىپ كەتتى. قازىردە مەن ءۇشىن جۇمىستان ەرتە كەتۋ ۇيرەنشىكتى ەمەس.
سينگاپۋردىڭ حالقى وتانسۇيگىش بولىپ كەلەدى. تاۋەلسىزدىك كۇنىنە بارلىق ادامدار قىزىل- اق ءتۇستى كيمدەردى كيەدى - بۇل ۇلتتىق تۋدىڭ تۇستەرى - جانە قالا ورتالىعىندا وتباسىلارىمەن مەرەكەلىك شەرۋدى كۇتىپ، پيكنيكتەر ۇيىمداستىرادى.
ۋنيۆەرسيتەت جانە وقۋ جايىندا
مەن سينگاپۋر ۇلتتىق ۋنيۆەرسيتەتىندە Singapore International Graduate Award (SINGA) دەپ اتالاتىن گرانت بويىنشا وقىپ جاتىرمىن. بۇل گرانت بويىنشا وقۋعا ءتۇسۋ وڭاي. قۇجاتتاردى جىلىنا ەكى رەت قابىلدايدى. تالاپتار اسا جوعارى ەمەس. ۋنيۆەرسيتەت باسقا ەلدەردەگى ستۋدەنتتەردى تارتۋعا تىرىسادى، وقۋ گرانتى ورتالىق ازيا، ەۋروپا، امەريكا ەلدەرىنىڭ وكىلدەرىنە قولجەتىمدى.
ۋنيۆەرسيتەتىمىزدىڭ لوگوتيپى - اشىق كىتاپ، ول ۋنيۆەرسيتەتتىڭ الەمدىك بىلىمدەرگە جەتەيلەيتىن پورتالدى بىلدىرەدى. ءۇش ساقينا - ءۇش باستى باعىت: جاسامپازدىق، يننوۆاتسيالار جانە كاسىپكەرلىك. ارىستان ءمىنسىز ستۋدەنت رەتىندە بەينەلەنگەن، ارىستاننىڭ جوعارى كوتەرىلگەن تابانى حالىققا قىزمەت كورسەتۋگە دايىن ەكەنىن، ال جوعارى كوتەرىلگەن قۇيرىعى - ادالدىق پەن يدەاليزمدى بىلدىرەدى.
وسىندا الەمدىك دەڭگەيدەگى عالىمدار، نوبەل سىيلىعىنىڭ يەگەرلەرى قاتىساتىن كونفەرەنسيالار ءجيى وتكىزىلەدى. مەن ولارمەن جەكە سويلەسىپ، جەتىستىككە قالاي جەتكەندەرى جايىندا سۇراقتار قويۋ مۇمكىندىگىنە يە بولدىم. مىسالى، ءبىر كونفەرەنتسيادا فلۋورەستسەنتتىك پروتەين اشقان، نوبەل سىيلىعىنىڭ يەگەرى مارتين چالفي بولدى. وسىندا الەمدىك دەڭگەيدەگى عالىمدار، نوبەل سىيلىعىنىڭ يەگەرلەرى قاتىساتىن كونفەرەنتسيالار ءجيى وتكىزىلەدى
ۋنيۆەرسيتەتتىڭ جانىندا Sauropodomorpha تۇقىمداسىنان شىققان ءۇش قاڭقا، ۇزىن مويىنى جانە قۇيرىعى بار شوپكورەكتى دينوزاۆرلارى جينالعان جاراتىلىستانۋ عىلىمدارىنىڭ مۇراجايى بار.
عىلىمي قىزمەتى جايىندا
مەن دوكتورانتۋرادا وقىپ جاتىرمىن جانە بىزدە عىلىمي جۇمىس جۇرگىزىلىپ جاتىر. بۇل باكالاۆريات نەمەسە ماگيستراتۋرا سياقتى ستۋدەنتتىك كەزەڭ ەمەس، بۇل جۇمىس بولىپ تابىلادى. نەگىزىنەن، وزىندىگىنەن جۇمىس ىستەيسىز - عىلىمي جوبانى جۇرگىزەسىز، تاجىريبەلەر وتكىزەسىز، گيپوتەزالاردى قۇرىپ، ولاردى دالەلدەيسىز.
مەن بيولوگپىن، قازىرگى كەزدە وستەوپوروزدى زەرتتەۋمەن اينالىسىپ جاتىرمىن. بۇل كارىلىك جاستا سۇيەكتەردىڭ سىنعاق جانە بورپىلداق بولىپ، زاقىمدانۋدان كەيىن ۇزاق قالىپقا كەلەتىن كەزدە بولاتىن اۋرۋ. مەن بالىقتارمەن جۇمىس ىستەيمىن، ءبىز ولار ارقىلى وستەوپوروزدى تۋعىزامىز، كەيىن نارىقتا جوق ءارتۇرلى كومپونەنتتەردى، ءدارى- دارمەكتەردى قولدانامىز.
مەن قازاقستاندا نازاربايەۆ ۋنيۆەرسيتەتىندە جۇمىس ىستەدىم. سول جەردە ماگيستراتۋرانى ءبىتىردىم جانە ءۇش جىل بويى زەرتحانادا اسسيستەنت قىزمەتىن اتقاردىم. نازاربايەۆ ۋنيۆەرسيتەتىندە جاسۋشالىق داقىلدارمەن جۇمىس ىستەدىم، جاسۋشالاردى ءوسىرىپ، ءارتۇرلى اۋرۋلاردى زەرتتەدىك. مىسالى، مەن التسگەيمەر اۋرۋىن زەرتتەدىم.
قازاقستاندا عىلىمدى دامىتۋ قيىن، سەبەبى ول كوپ قاراجاتتى قاجەت ەتەدى
ارينە، قازاقستانمەن سالىستىرعاندا سينگاپۋردا عىلىمعا الدەقايدا جاقسىراق دەمەۋشىلىك كورسەتەدى. قازاقستاندا عىلىمدى دامىتۋ قيىن، سەبەبى ول كوپ قاراجاتتى قاجەت ەتەدى. ەگەر تاجىريبە جۇرگىزۋدى قالاساڭ، رەاگەنتتەردى ساتىپ الۋ كەرەك. ال رەاگەنتتەردى الۋ ءۇشىن، جەتكىزۋشىلەرمەن جۇمىس ىستەۋ كەرەك، سەبەبى ءبىز ولاردى كومپانيالاردان تىكەلەي ساتىپ الا المايمىز. سول سەبەپتى ءبىز الاتىن رەاگەنتتەر ءۇش ەسەلەنگەن باعا بويىنشا كەلەدى جانە وعان سالىقتىڭ قۇنى كىرەدى. عىلىممەن اينالىسۋ قىمباتقا تۇسەدى، دەگەنمەن نازاربايەۆ ۋنيۆەرسيتەتىندە عىلىممەن اينالىسۋعا بولادى. قازىردە سول جەردە بارلىعى سوڭعى تەحنيكا ۇلگىلەرىمەن جابدىقتالعان، زەرتحانالارى دا جوعارى دەڭگەيدە. سينگاپۋردا بارلىعى الدەقايدا وڭايىراق. ەگەر رەاگەنت قاجەت بولسا، ونى سايت ارقىلى تاپسىرىس بەرىپ الۋعا بولادى جانە ءبىر كۇننەن كەيىن ول ۇستەلىڭدە جاتادى.
باستاپقى دەڭگەيدە عىلىمي قىزمەتكەرلەردىڭ جالاقىلارى سينگاپۋرلىق ولشەم بويىنشا كوپ ەمەس، مۇمكىن سول سەبەپتى سينگاپۋرلىقتاردىڭ كوبىسى ماگيستراتۋرا مەن دوكتورانتۋرانى بىتىرمەيدى. بارلىعى نەگىزىنەن باكالاۆرياتتان كەيىن جۇمىس ىستەيدى. ءبىراق وسىندا ءوزىڭدى عىلىمي سالادا جۇزەگە اسىرۋعا كوپ مۇمكىندىكتەر بار، سەبەبى قازاقستاندا عىلىم كاسىپكەرلىككە جانە الداعى وندىرىسكە سيرەك اۋىسادى. سينگاپۋردا ءبىز ءدارى- دارمەكتەردى سىنايمىز جانە بارلىعى جاقسى بولسا، پاتەنتكە يە بولا الامىز. وسىندا فارماتسيەۆتيكالىق كومپانيالار كوپ. زەرتحانادان كاسىپكەرلىككە ءوتۋ پروتسەسى الدەقايدا تەزىرەك جانە وڭايراق بولادى. سينگاپۋردا ستارتاپتارعا جاقسى دەمەۋشىلىك كورسەتىلەدى، ولار قارجىنى يننوۆاتسيالارعا جانە زەرتتەۋلەرگە قۇيادى، سول سەبەپتى بۇل ازياداعى الدىڭعى قاتارداعى ەلدەردىڭ ءبىرى بولىپ تابىلادى.
مەن قازاقستانعا ورالۋدى جوسپارلايمىن، ءۇيىمدى ساعىندىم. مەنىڭ ويىمشا، ءبىز سينگاپۋردىڭ جولىمەن كەلە جاتىرمىز، سەبەبى قازىرگى كەزدە قازاقستاندا دا قارجىلاندىرىلعان ستارتاپتار جاقسى دامىپ جاتىر. ماڭىزدىسى - عىلىمنىڭ ءوزىڭدى كاسىپتە جۇزەگە اسىرۋ مۇمكىندىگىمەن قاتار ءجۇرۋى جانە ادامداردىڭ ءومىرىن جاقسارتۋ.
weproject.media