شىمكەنتتە ناۋقاس ايەلگە دۇرىس دياگنوز قويماعان مەدقىزمەتكەرلەر جۇمىستان قۋىلدى
بۇل تۋرالى قالالىق دەنساۋلىق ساقتاۋ باسقارماسى مالىمەت تاراتتى، دەپ حابارلايدى قازاقپارات ءتىلشىسى.
ايتا كەتەيىك، 22 جاستاعى قالا تۇرعىنى الەكساندرا پەسەتسكايا ناۋقاستانىپ، بىرنەشە رەت جەدەل جاردەم شاقىرتقان. وعان جەدەل جاردەم قىزمەتكەرلەرى تەك اۋىرسىنۋدى باساتىن ەكپە ەگۋمەن شەكتەلىپ، دۇرىس ەمدىك شارالاردى جاساماعان. ءتىپتى اۋرۋحاناعا اپارعانىمەن، دارىگەرلەر ءتورت اي بويى دۇرىس دياگنوز قويماعان. كەيىننەن ول اۋىر حالدە قايتا اۋرۋحاناعا ءتۇسىپ، ءولىم اۋزىنان قالعان. ناۋقاسقا وتا جاساعان دارىگەرلەر ونىڭ پەريتونيت پەن باۋىر اسقىنۋىنا شالدىققانىن انىقتاپ، ءومىرىن قۇتقارىپ قالدى. وسى ماسەلەدەن كەيىن قالالىق دەنساۋلىق ساقتاۋ باسقارماسىنىڭ باسشىلىعى ناۋقاس كەلىنشەكتىڭ جاعدايىمەن تانىسىپ، بولعان جاعدايعا بايلانىستى قىزمەتتىك تەكسەرۋ جۇرگىزدى.
«اتالعان جاعدايعا بايلانىستى شىمكەنت قالاسىنىڭ دەنساۋلىق ساقتاۋ باسقارماسى №1 -قالالىق كلينيكالىق اۋرۋحانا، №5 -قالالىق ەمحانا جانە جەدەل جاردەم ستانتسياسىنىڭ 16 قىزمەتكەرىنە قاتىستى قىزمەتتىك تەكسەرۋ جۇرگىزدى. ناتيجەسىندە ەكى قىزمەتكەر جۇمىستان شەتتەلىپ، قالعاندارىنا تارتىپتىك شارا قولدانىلدى. بۇعان قوسا، قوعامدىق دەنساۋلىق ساقتاۋ باسقارماسى مەديتسينا قىزمەتكەرلەرىنە قاتىستى تەكسەرۋ جۇمىستارىن جۇرگىزىپ جاتىر» دەلىنگەن قالالىق دەنساۋلىق ساقتاۋ باسقارماسىنىڭ مالىمەتىندە.
قازىر الەكساندرا پەسەتسكايا ورىنبايەۆ اتىنداعى كلينيكادا ەم قابىلداپ جاتىر. ونىڭ جاعدايىمەن ماسكەۋ قالاسىنىڭ عىلىمي زەرتتەۋ مەديتسينالىق ۋنيۆەرسيتەتى، الماتى قالاسىنداعى ۇلتتىق عىلىمي زەرتتەۋ كارديولوگيا جانە ىشكى اۋرۋلار ينستيتۋتىنىڭ بىلىكتى ماماندارى جانە و ق م ا نەۆرولوگيا كافەدراسىنىڭ مەڭگەرۋشىسى تانىسىپ، مەديتسينالىق كەڭەس وتكىزدى. ولار جەرگىلىكتى دارىگەرلەرمەن بىرىگىپ كونسيليۋم جۇرگىزدى.
«قازىر ناۋقاس تولىق وڭالتۋ جانە ۆيتاميندىك تەراپيا ەمىن، يممۋنيتەتتى كوتەرەتىن پرەپاراتتار قابىلداۋدا. پاتسيەنتتىڭ ەمىندە وڭ وزگەرىستەر بايقالادى، ديناميكالىق جاعدايى تۇراقتى. سونداي-اق ءوز بەتىنشە قيمىلداپ، جاقسى تاماقتانعاندىقتان سالماق قوسىپ جاتىر»، - دەيدى دارىگەرلەر.