قازاقستاندا يپوتەكالىق نەسيەدەن رەكورد جاسالدى
ءتورت ايدىڭ ىشىندە عانا يپوتەكالىق نەسيە 200 ميلليارد تەڭگەدەن اسىپ، رەكورد جاڭارتقان، دەپ حابارلايدى قازاقپارات ءتىلشىسى Finprom اقپارات كوزىنە سىلتەمە جاساپ.
«وسى جىلدىڭ ءساۋىر ايىنىڭ سوڭىندا يپوتەكالىق ۇيىمداردىڭ اكتيۆتەرى وتكەن جىلدىڭ سايكەس كەزەڭىمەن سالىستىرعاندا ەكى ەسەگە ءوسىپ، 546,3 ميلليارد تەڭگەگە جەتكەن. اكتيۆتەگى قارىز قورجىنىنىڭ ۇلەسى 50,8 پايىزعا نەمەسە 277,6 ميلليارد تەڭگەگە جەتتى. ءبىر جىلدىڭ ىشىندە سوما 47,1 پايىزعا كوتەرىلدى. مۇنداي وسىمگە 2018 -جىلدىڭ ماۋسىم ايىندا قازاقستاننىڭ يپوتەكالىق نارىعىندا «باسپانا» يپوتەكالىق ۇيىمىنىڭ پايدا بولۋى مۇرىندىق بولىپ وتىر»، - دەلىنگەن حابارلامادا.
ايتا كەتەرلىگى، قازىرگى ۋاقىتتا يپوتەكالىق ۇيىمدار ەل ەكونوميكاسىندا قاتىسۋ ۇلەسىن ارتتىرىپ كەلەدى. ماسەلەن، يپوتەكالىق ۇيىمدارعا تيەسىلى اكتيۆتەردىڭ ۇلەسى ج ءى ءو-نىڭ 0,9 پايىزدىق كورسەتكىشىنە تەڭەسكەن. بۇل كورسەتكىش بۇرىن 0,4 پايىزدىڭ ماڭايىندا ساقتالىپ تۇرعان ەدى.
سوڭعى جىلدارى يپوتەكا نارىعى ايتارلىقتاي اۋقىمىن كەڭەيتىپ كەلەدى. بۇل رەتتە جانداندىرۋشى فاكتور - تۇرعىن ۇيگە قاتىستى مەملەكەتتىك باعدارلامالار ەكەنىن اتاپ ءوتۋ كەرەك. وسى جىلدىڭ قاڭتار- ءساۋىر ايلارىندا يپوتەكالىق نەسيەلەردىڭ سوماسى 200,2 ميلليارد تەڭگەگە جەتىپ، وتكەن جىلدىڭ سايكەس كەزەڭىنەن قاراعاندا 55,7 پايىزعا (وتكەن جىلى 128,6 ميلليارد تەڭگە) ارتقان. ءساۋىر ايىنىڭ سوڭىنداعى جاعداي بويىنشا يپوتەكالىق نەسيەلەۋ سوماسى 1,4 تريلليون تەڭگەگە جەتىپ، ءبىر جىلدىڭ ىشىندە 24,8 پايىزدىق ءوسىمدى كورسەتكەن.
جالپى، 2018 -جىلدىڭ 12 ايىنىڭ قورىتىندىسى بويىنشا، ازاماتتارعا تۇرعىن ءۇي قۇرىلىسى مەن باسپانا ساتىپ الۋ ءۇشىن بانكتەر بەرگەن نەسيەنىڭ سوماسى 525 ميلليارد تەڭگەنى كورسەتكەن. بۇل سوما الدىڭعى جىلدىڭ كورسەتكىشىنەن 47,1 پايىزعا ارتىپ، يپوتەكالىق نەسيەلەۋ تاريحىنداعى رەكوردتى كورسەتىپ وتىر.
وسىنداي ءوسىمنىڭ بايقالۋىنا «7-20-25» مەملەكەتتىك باعدارلاماسىنىڭ ىسكە قوسىلۋى سەبەپ بولىپ وتىر. باعدارلاما بويىنشا قارىز - 2018 -جىلعى يپوتەكالىق قارىز سوماسىنىڭ 7,4 پايىزدىق (39 ميلليارد تەڭگە) ۇلەسىنە يە. 2019 -جىلدىڭ العاشقى توقسانىندا «7-20-25» باعدارلاماسى بويىنشا بەرىلگەن يپوتەكالىق قارىز ۇلەسى جالپى يپوتەكالىق نەسيەلەۋ مولشەرىنىڭ 7,4 پايىزىنا تەڭ بولىپ وتىر.