ەلوردادا مۇگەدەك جولاۋشىنى الماي كەتكەن اۆتوبۋس جۇرگىزۋشىسى جۇمىستان بوساتىلدى
«№51 -اۆتوبۋستىڭ جۇرگىزۋشىسى اۆتوبۋستى توقتاتقان كەزدە مۇگەدەك جولاۋشى ءۇشىن پاندۋستى تۇسىرمەي كەتىپ قالعان. جولاۋشىدان وسى وقيعاعا بايلانىستى شاعىم ءتۇستى. بۇل جايدان قۇلاعدار بولعان №4 -اۆتوپاركتىڭ باسشىسى اتالمىش جۇرگىزۋشىنىڭ ءىسىن تارتىپتىك كەڭەستە قاراپ، ونى جۇمىستان بوساتۋ تۋرالى شەشىپ قابىلدادى»، - دەپ حابارلايدى «استانا LRT» ج ش س باسپا ءسوز حاتشىسى ناۋات ازانبايەۆا.
تارتىپتىك كەڭەستە №51 -اۆتوبۋستىڭ جۇرگىزۋشىسى ءوزىنىڭ كىناسىن مويىنداعان.
«№4 -اۆتوپاركتىڭ باسشىسى مۇنداي شاعىم تۇسسە مىندەتتى تۇردە جۇرگىزۋشىلەردى جۇمىستان شىعارۋ تۋرالى شەشىم قابىلداناتىنىن ايتتى. ال جۇمىستان شىعارىلعان جۇرگىزۋشى بۇعان دەيىن №1 -اۆتوپاركتە ەڭبەك ەتكەن. بۇرىن ونىڭ ۇستىنەن ەشقانداي شاعىم تۇسپەگەن ەدى. №4 -اۆتوپاركتە ەكى اي عانا جۇمىس ىستەدى»، - دەيدى ناۋات ازانبايەۆا.