قاراعاندىدا مەمقىزمەتكەرلەر اراسىندا وتانشىلدىق ءان بايقاۋى ءوتتى

قاراعاندى. قازاقپارات - قاراعاندىدا مەملەكەتتىك قىزمەتكەرلەر اراسىندا «مەنىڭ تاڭداۋىم- مەملەكەتتىك قىزمەت» اتتى پاتريوتتىق ءان بايقاۋى ءوتتى، دەپ حابارلايدى قازاقپارات ءتىلشىسى.

«شالقىما» كونسەرتتىك زالىنىڭ ساحناسىندا 24 قاتىسۋشى ءوز ونەرىن ورتاعا سالدى.

«ءبىز مۇنداي بايقاۋدى مەملەكەتتىك قىزمەتكەر كۇنىنە ورايلاستىرىپ العاش رەت ۇيىمداستىرىپ وتىرمىز. بارلىق قاتىسۋشىلاردىڭ جاقسى دايىندالعاندارى كورىنىپ تۇر. ولاردىڭ اراسىندا ەكى دۋەت تە بار. ونەر كورسەتۋشىلەردىڭ بىرەۋى ءوزىنىڭ ورىنداعان انىنە بەينەبايان دايىنداعان. ال تاعى ءبىرىنىڭ ءانى حورەوگرافيالىق ۇجىمىنىڭ بيىمەن سۇيەمەلدەنگەن. سونداي-اق كەنت اكىمى دە بار. بايقاۋدىڭ ءۇش جەڭىمپازىن ءبىز مەملەكەتتىك قىزمەتكەر كۇنىندە ماراپاتتايتىن بولامىز»، - دەدى قاراعاندى وبلىسى بويىنشا مەملەكەتتىك قىزمەت ىستەرى جونىندەگى جانە سىبايلاس جەمقورلىقپەن كۇرەس دەپارتامەنتى باسشىسىنىڭ ورىنباسارى مەدەت تالانت.

قازىلار القاسىنىڭ پىكىرىنشە، بايقاۋعا قاتىسۋشىلار بارلىق تاپسىرمالاردى جاقسى ورىنداعان. مۋزىكالىق ءبىلىمى بولماسا دا، كاسىبي انشىلەردەن كەم تۇسپەستەن ءان شىرقاپ شىقتى.

«ءبىز دۋەتپەن «اۋىلىم» ءانىن ورىندادىق. بىزدە ءوزىمىزدىڭ شاعىن انسامبلىمىز قۇرىلدى دەسەك تە بولادى. مەن دومبىرادا، ال ارىپتەسىم باياندا وينايدى. ءبىزدىڭ ارنايى مۋزىكالىق ءبىلىمىمىز جوق، الايدا كىشكەنتايىمىزدان ءان ايتۋدى ۇناتامىز. سوندىقتان ەشقانداي قوبالجۋ بولعان جوق»، - دەيدى قارقارالى اۋدانى باقتى اۋىلىنىڭ اكىمى بولات جابدىقوۆ.

جاڭاارقا اۋدانى جۇماجانوۆ اۋىلدىق وكرۋگى اكىمى اپپاراتىنىڭ جەتەكشى مامانى ينديرا راحىمبايەۆا دا ساحنادا العاش رەت ونەر كورسەتۋدە.

«ءوزىمىزدىڭ اۋداندا بارلىق شارالاردا ءان ايتامىن. ءان شىرقاعاندى ۇناتامىن، بۇل مەنىڭ ءحوببيىم دەسەم دە بولادى. بۇل بايقاۋدا گۇلنۇر ورازىمبەتوۆانىڭ «كوككە ورلە» ءانىن ورىندادىم»، - دەيدى ينديرا راحىمبايەۆا.

قاراعاندى وبلىسى ستاتيستيكا دەپارتامەنتىنىڭ اعا مامانى نۇرسۇلتان احمەتوۆ ءان بايقاۋىنا ءبىر اپتادان اسا ۋاقىت دايىندالعان ەكەن. كاسىبي شەبەرلەردەن ۆوكال ءدارىسىن العان.

«مەن «مۋزارت» توبىنىڭ «راحمەت ساعان تۋعان ەل» ءانىن تاڭدادىم. وسىنداي بايقاۋعا ساي كەلەتىن ءان دەپ ويلايمىن»، - دەدى نۇرسۇلتان احمەتوۆ.

قازىلار القاسىنىڭ شەشىمى بويىنشا ءبىرىنشى ورىندى وساكاروۆ اۋداندىق ءماسليحات اپپاراتىنىڭ جەتەكشىسى ەرجان نايمانباي يەلەندى. ەكىنشى ورىن «جەزقازعان كەنتى اكىمىنىڭ اپپاراتى» م م ەكونوميكا ءبولىمىنىڭ جەتەكشىسى اباي بەكىشەۆكە بەرىلدى. ءۇشىنشى ورىن قاراعاندى وبلىسىنىڭ مەملەكەتتىك كىرىستەر دەپارتامەنتىنىڭ باس مامانى تولەگەن ىسقاقوۆقا بۇيىردى.

جەڭىمپازدارعا ديپلومدار، ال قاتىسۋشىلارعا سەرتيفيكاتتار مەن ەستەلىك سىيلىقتار تابىس ەتىلدى. بايقاۋ جەڭىمپازدارى مەملەكەتتىك قىزمەتكەر كۇنىندە ۇيىمداستىرىلاتىن سالتاناتتى جيىنعا قاتىسادى.