توقايەۆ پەن لۋكاشەنكو ەكىجاقتى قارىم- قاتىناستارداعى وزەكتى ماسەلەلەردى تالقىلادى
مەملەكەت باسشىسى بەلارۋس رەسپۋبليكاسىنىڭ پرەزيدەنتىنە ءىلتيپات ءبىلدىردى جانە ولاردىڭ بۇل كەزدەسۋى، قازاقستاننىڭ استاناسى نۇر- سۇلتان دەپ اتالعاننان كەيىن، ءبىرىنشى رەت ءوتىپ وتىرعانىن ايتتى.
«ءبىز ءسىزدىڭ قىزمەتىڭىزدى مۇقيات باقىلاپ، ەلىڭىزدى دامىتۋداعى زور جەتىستىكتەرىڭىزدى ايتىپ وتىرامىز. ءسىز پرەزيدەنت لاۋازىمىندا ۇزاق جىلدان بەرى قىزمەت ەتىپ كەلەسىز جانە مەملەكەتىڭىزدىڭ بەدەلى مەن الەۋەتىن نىعايتۋ ءۇشىن بار مۇمكىندىكتى جاساپ جاتىرسىز»، - دەدى قاسىم- جومارت توقايەۆ.
الەكساندر لۋكاشەنكو ءداستۇرلى تۇردە جىلى قارسى العانى جانە كەزدەسۋگە مۇمكىندىك تۋعىزعانى ءۇشىن قاسىم- جومارت توقايەۆقا ريزاشىلىق ءبىلدىردى.
بەلارۋس باسشىسى تاۋەلسىز قازاقستاننىڭ قالىپتاسۋ جولىنداعى ەلباسى نۇرسۇلتان نازاربايەۆ پەن پرەزيدەنت قاسىم- جومارت توقايەۆتىڭ ءرولىن ەرەكشە اتاپ ءوتىپ، ەلىمىزدە بولىپ جاتقان ىشكى ساياسي ۇدەرىستەرگە وڭ باعا بەردى.
«ءبىزدىڭ قارىم- قاتىناستارىمىزعا كەلەر بولساق، ول ءاردايىم جاقسى بولادى. سىزدەرمەن بىرگە ىنتىماقتاستىعىمىز ناقتى باعىتتار بويىنشا ىلگەرىلەي بەرەتىنىنە كۇمانىم جوق»، - دەدى ا. لۋكاشەنكو.
تاراپتار ەكىجاقتى قارىم- قاتىناستارداعى، وڭىرلىك جانە حالىقارالىق كۇن تارتىبىندەگى وزەكتى ماسەلەلەردى تالقىلادى.