جەتىنشى شىلدەدە ەلوردادا دومبىرا كۇنى تويلانادى
وسىعان وراي قازاق ەلى مونۋمەنتىنىڭ الدىنداعى الاڭ بىلتىرعىداي ۇلكەن ساحناعا اينالادى. شاراعا جاس ەرەكشەلىگىنە قاراماستان نيەت بىلدىرگەندەردىڭ بارلىعى قاتىسا الادى. ولار «سارى ارقا»، «اداي»، «ءالقيسسا»، «كوڭىل تولقىنى»، «بالبىراۋىن» جانە «كورەع ۇلى» كۇيلەرىن جاتقا بىلۋگە ءتيىس. شاراعا قاتىسۋ ءۇشىن 1 -ماۋسىمنان 5 - شىلدەگە دەيىن asyldombyra.kz سايتىندا ونلاين تىركەلۋ كەرەك.
كونسەرت ساعات 12:00-دە باستالادى.
«بيىل ۇلتتىق دومبىرا كۇنىنە ورايلاستىرىلعان جاپپاي كونسەرتتە ورىندالاتىن التى كۇي تاڭدالدى. ارينە، قاتىسۋشىلاردىڭ التى كۇيدى دە بىلگەنى ءجون دەگەنمەن ۇسىنىلعان كومپوزيتسيالاردىڭ بىرەۋىن عانا بىلەتىندەر دە كونسەرتكە ۇلەس قوسا الادى»، - دەپ حابارلادى نۇر- سۇلتان قالاسىنىڭ مادەنيەت جانە سپورت باسقارماسىنان.
7 - شىلدەدە مەرەكە بارىسىندا كۇمبىرلەگەن كۇيدەن باسقا، جينالعاندار نازارىنا «جاستار» تەاترىنىڭ اكتەرلەرى تاريحي قويىلىم ۇسىنادى، ەلوردالىق مۋزىكا مەكتەپتەرىنىڭ شاكىرتتەرى ءوز ونەرلەرىن ورتاعا سالادى، اقىندار ايتىسى وتەدى. سۋىرىپ سالما ولەڭگە ىسىلعان جاندار ۇلتتىق مۋزىكالىق اسپابىمىز - دومبىرانى جىرعا قوسادى. سونىمەن قاتار، «قازاق ەلى» مونۋمەنتىنىڭ الدىنداعى الاڭدا كيىز ۇيلەر تىگىلىپ، قازاق اۋىلى ورىن تەبەدى. كەلۋشىلەر دومبىرانىڭ جانە باسقا دا ۇلتتىق اسپاپتاردىڭ ءتۇر- تۇرىمەن تانىسا الادى.
سونىمەن قاتار، مەرەكە كەشكە ەسىل وزەنىنىڭ جاعاسىنداعى امفيتەاتردا «ناعىز قازاق - دومبىرا» كونسەرتىمەن جالعاسىن تابادى. ساحنا تورىندە قازاق وركەسترى، نۇر- سۇلتان قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ سوليستەرى مەن ۆوكاليستەرى ونەر كورسەتەدى. كونتسەرتتىڭ باستالۋى ساعات 18.00-دە. كىرۋ - تەگىن.
ەسكە سالايىق، وتكەن جىلى ۇلتتىق دومبىرا كۇنىنە وراي «قازاق ەلى» مونۋمەنتىنىڭ الدىنداعى الاڭدا دومبىرانىڭ قۇلاعىندا وينايتىن 2 مىڭنان اسا ونەرپازدان قۇرىلعان وركەستر ءوز ونەرىن ورتاعا سالدى. فلەشموبقا قاتىسۋ ءۇشىن ەلىمىزدىڭ وڭىرلەرىنەن دە دومبىراشىلار ەلورداعا ات باسىن تىرەدى. شارانى ەلباسى نۇرسۇلتان نازاربايەۆ تاماشالادى.
ايتا كەتەيىك، بۇل قالا تاريحىنداعى ايتۋلى وقيعا بولدى. «كوڭىل اشار»، «اداي»، «بالبىراۋىن»، «ەركە سىلقىم» جانە «سارى ارقا» كۇيلەرىن ورىنداعان دومبىراشىلارعا ق ر ەڭبەك سىڭىرگەن قايراتكەرى، كومپوزيتور ايتقالي جايىموۆ ديريجەرلىك ەتتى.
1 - شىلدەدە وتكەن ۇلتتىق دومبىرا كۇنىنە ارنالعان كونسەرتكە بەلگىلى مۋزىكانتتار، قوعام جانە مەملەكەت قايراتكەرلەرى، ونىڭ ىشىندە ق ر پارلامەنتى ءماجىلىسىنىڭ دەپۋتاتى بەكبولات تىلەۋحان، نۇر- سۇلتان قالاسىنىڭ مادەنيەت جانە سپورت باسقارماسىنىڭ باسشىسى بولات ماجاعۇلوۆ، قازاقستاننىڭ ەڭبەك سىڭىرگەن ءارتيسى ايگۇل ۇلكەنبايەۆا، نۇركەن ءاشىروۆ، ديريجەر ارمان جۇلدەبايەۆ، «باستاۋ» توبى، «سەرپەر»، «اسىل توبى»، «مۋزارت»، اسىلبەك ەڭسەپوۆ جانە باسقالارى قاتىستى.
ايتا كەتەيىك، بىلتىر قاتىسۋشىنىڭ ەڭ كىشكەنتايى 7 جاستا، ال ەڭ ۇلكەنى - 75-تە بولدى. شارا بارىسىندا ەڭ جاس قاتىسۋشىعا ەلباسى ءوز قولىمەن دومبىرا تارتۋ ەتتى.
ۇلتتىق دومبىرا كۇنى 2018 -جىلى قازاقستان رەسپۋبليكاسىنىڭ تۇڭعىش پرەزيدەنتىنىڭ جارلىعىمەن بەكىتىلدى جانە جىل سايىن شىلدەنىڭ ءبىرىنشى جەكسەنبىسىندە اتالىپ وتىلەدى.