اسقار مامين جەڭىلدەتىلگەن نەسيە بەرۋ باعدارلاماسىن جەتىلدىرۋدى تاپسىردى
بۇل تۋرالى بۇگىن ۇكىمەت وتىرىسىندا ق ر پرەمەر-ءمينيسترى اسقار مامين ايتتى، دەپ حابارلايدى قازاقپارات ءتىلشىسى.
«قاراپايىم زاتتار ەكونوميكاسى» بويىنشا جەڭىلدەتىلگەن كرەديت بەرۋ باعدارلاماسى جاقسى دامىپ كەلە جاتقانىن كورىپ وتىرمىز. بۇگىنگى تاڭدا 700 ميلليارد تەڭگەدەن اساتىن 900 گە جۋىق جوبا جۇمىس ۇستىندە. سوندىقتان ۇسىنىلعان تاسىلدەردى جالپى قولدايمىز جانە مىنالاردى تاپسىرامىز.
بىرىنشىدەن، ۇلتتىق ەكونوميكا مينيسترلىگى مۇددەلى مەملەكەتتىك ورگاندارمەن، «اتامەكەن» پالاتاسىمەن جانە قارجىگەرلەر قاۋىمداستىعىمەن بىرلەسىپ، باعدارلاما تەتىكتەرىن ودان ارى دامىتۋدى كوزدەيتىن ۇكىمەت شەشىمىنىڭ جوباسىن ءۇش كۇندىك مەرزىمدە ەنگىزسىن. ەكىنشىدەن، مۇددەلى مەملەكەتتىك ورگاندار، باسقارۋشى حولدينگتەر «قاراپايىم زاتتار ەكونوميكاسىنا» جاتاتىن ساتىپ الۋلاردا وتاندىق تاۋارلار مەن كورسەتىلەتىن قىزمەتتەردىڭ ۇلەسىن ارتتىرۋ بويىنشا شارالاردى قولدانسىن»، - دەدى ۇكىمەت باسشىسى.
سونىمەن قاتار پرەمەر- مينيستر اكىمدىكتەرگە جەرگىلىكتى قامتۋدى باقىلاۋ جونىندەگى وڭىرلىك كومسسيا اياسىندا وسى باعىتتارداعى جۇمىستى جانداندىرۋدى، ءتيىستى اقپاراتتى اي سايىن ۇلتتىق كاسىپكەرلەر پالاتاسىنىڭ جوبالىق كەڭسەسىنە ۇسىنۋدى تاپسىردى.
«ۇشىنشىدەن، شيكىزات ەمەس ەكسپورتتى قولداۋعا قاتىستى جانە وعان بولىنگەن قاراجات تولىق جانە ۋاقىتىلى يگەرۋ بويىنشا جۇمىستى جالعاستىرۋ قاجەت. وسىعان بايلانىستى يندۋستريا جانە ينفراقۇرىلىمدىق دامۋ مينيسترلىگىنە، «بايتەرەك» حولدينگىنە ۇلتتىق ينۆەستورلار كەڭەسىندە ايتىلعانداردى ەسكەرە وتىرىپ، شيكىزات ەمەس ەكسپورتتى ىلگەرىلەتۋ تەتىكتەرىن جەتىلدىرۋ بويىنشا ۇسىنىستار ەنگىزۋدى تاپسىرامىن»، - دەدى اسقار مامين.
وسى رەتتە پرەمەر-مينيستر ايتىلعان تاپسىرمالاردى قاداعالاۋ ورىنباسارى جەڭىس قاسىمبەككە جۇكتەلەتىندىگىن ەسكەرتتى.