پارانى بانك كارتوچكاسىنا اۋدارۋدى تالاپ ەتكەن پوليتسەي قىزمەتىنەن قۋىلدى - قىزىلوردا

قىزىلوردا. قازاقپارات - قىزىلوردادا كولىك جۇرگىزۋشىسىنەن پارانى بانك كارتوچكاسىنا اۋدارۋدى تالاپ ەتكەن پوليتسيا قىزمەتكەرى جازاعا تارتىلدى، دەپ حابارلايدى قازاقپارات ءتىلشىسى.

اتالمىش قىلمىستىق ءىس قىزىلوردا قالاسىنىڭ №2 -سوتىندا قارالدى. ونىڭ ۇستىنەن جابىرلەنۋشى م. سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ قىزىلوردا وبلىسى بويىنشا دەپارتامەنتىنە ارىزدانعان.

جابىرلەنۋشىنىڭ ايتۋىنشا، ول ءوزىنىڭ باسقارۋىنداعى اۆتوكولىگىمەن دوسى ەكەۋى جەكە شارۋاسىمەن «اتامەكەن» ساۋدا ورتالىعىنا كەلەدى. ول  قىزىلوردا قالاسىنداعى پۋشكين كوشەسىمەن ءبىر باعىتقا جۇرۋگە ارنالعان جول تالابىنىڭ بەلگىسىن بايقاماي قالعان. سول ۋاقىتتا سوڭىنان پوليتسيا قىزمەتىنىڭ قىزمەتتىك اۆتوكولىگى كەلىپ، ءبىر باعىتقا ارنالعان جولعا كولىكپەن قارسى كەلگەنىن ەسكەرتەدى. جول ەرەجەسىن بۇزعاندىعى ءۇشىن اۆتوكولىگىنە وتىرعىزىپ الادى. جاسالعان اكىمشىلىك قۇقىق بۇزۋشىلىقتى ءبىر جىل ىشىندە قايتالاپ جاساپ تۇرعانىن نازارعا سالادى. بۇل ءۇشىن جۇرگىزۋ كۋالىگىنەن ايىرۋ جازاسى كوزدەلگەنىن ايتۋدى دا ۇمىتپايدى. جابىرلەنۋشىدەن جۇرگىزۋ كۋالىگىنەن ايىرماۋ ءۇشىن 30 مىڭ تەڭگە تالاپ ەتكەنىن ەمەۋرىنمەن بىلدىرەدى.

دەگەنمەن كولىك جۇرگىزۋشى م. اتالعان اقشا قاراجاتىنا مۇمكىنشىلىگىنىڭ جوقتىعىنا بايلانىستى 2 مىڭ تەڭگەنى پوليتسيا قىزمەتكەرى ب-نىڭ قولىنا ۇستاتادى. اتالمىش قارجىنى ماردىمسىز كورگەن پوليتسيا قىزمەتكەرى ودان بولەك ءوزىنىڭ ج س ن نومەرىن بەرىپ، بانك كارتوچكاسى ارقىلى 7 مىڭ تەڭگە سالۋدى مىندەتتەيدى.

جابىرلەنۋشىنىڭ ارىزى نەگىزىندە سوتتالۋشى ب- نىڭ ءىس-ارەكەتتەرىنە جاسىرىن تەرگەۋ ارەكەتتەرى جۇرگىزىلگەن. ونىڭ ۇستىنەن ق ر قىلمىستىق كودەكسىنىڭ 366-بابىنىڭ 1-بولىگىمەن ءىس قوزعالدى. بۇرىنعى ءتارتىپ ساقشىسى قىزمەتىنەن بوساتىلىپ، پوليتسيا لەيتەنانتى شەنىنەن ايىرىلدى. وعان پارانىڭ 50 ەسەلەنگەن سوماسى مولشەرىندە ايىپپۇل تاعايىندالدى. ايىپپۇلدىڭ جالپى كولەمى 450 مىڭ تەڭگەنى قۇرايدى.