قاسىم- جومارت توقايەۆ ۇلتتىق ۇلاننىڭ اسكەري بولىمىنە باردى
قازاقستان قارۋلى كۇشتەرىنىڭ باس قولباسشىسى نىساندى ارالاۋ بارىسىندا 5573 اسكەري ءبولىمىنىڭ ماكەت- ۇلگىسىمەن جانە اقپاراتتىق تاقتاسىمەن، جاتىن جانە قىزمەتتىك ينفراقۇرىلىمدارىنىڭ جاعدايىمەن تانىستى. سونداي- اق، اسكەريلەردىڭ وقۋ- جاتتىعۋ نىساندارى مەن قارۋ- جاراق كورمەسىن ارالادى.
قازاقستان پرەزيدەنتى ۇلتتىق ۇلاننىڭ كوماندالىق قۇرامى مەن اسكەري قىزمەتكەرلەرمەن اڭگىمە بارىسىندا ولاردىڭ ەلدەگى تۇراقتىلىقتى ساقتاۋدا، ازاماتتار مەن قوعامنىڭ قاۋىپسىزدىگىن قامتاماسىز ەتۋدە ماڭىزدى مىندەتتەر اتقارىپ جۇرگەندەرىن اتاپ ءوتتى. سونىمەن قاتار، اسكەريلەردىڭ الەۋمەتتىك ماسەلەلەرىنە جەكە توقتالدى.
- كرەديتورلىق قارىزدار اسىرەسە باسپاناعا تولەم - ءوز الدىنا جەكە ماسەلە. ۇكىمەت وسى قارىزداردى تولىق وتەۋ بويىنشا تۇپكىلىكتى شارا قابىلداۋى قاجەت. اسكەريلەردىڭ الەۋمەتتىك ماسەلەسى تۋرالى ءسوز جۇزىندە ايتىلىپ، ءىس جۇزىندە ءتيىستى مىندەتتەمەلەردىڭ ورىندالماۋىنا جول بەرىلمەۋ كەرەك، - دەدى قاسىم- جومارت توقايەۆ.
مەملەكەت باسشىسى ۇكىمەت پەن ىشكى ىستەر مينيسترلىگىنە اسكەري بولىمشەلەردىڭ جاۋىنگەرلىك دايىندىعىن شىڭداپ، قۇرىلىمداردىڭ ماتەريالدىق- تەحنيكالىق جابدىقتالۋىن جاقسارتۋ جونىندە تاپسىرما بەردى.