قاسىم- جومارت توقايەۆ: مەملەكەت سپورتقا ءاردايىم جان- جاقتى قولداۋ كورسەتەدى
17:25, 22 - مامىر 2019
نۇر- سۇلتان. قازاقپارات - قازاقستان پرەزيدەنتى قاسىم- جومارت توقايەۆ اقتوبە وبلىسىنا جۇمىس ساپارى بارىسىندا «جەكپە- جەك» سارايىنا باردى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسى گيمناستيكاعا جانە باسقا دا جاتتىعۋلارعا ارنالعان زالداردى ارالاپ كوردى. بۇل كەشەندە بوكس، كۇرەس، دزيۋدو جانە وزگە دە سپورتتىڭ جەكپە- جەك تۇرلەرىنەن حالىقارالىق دەڭگەيدەگى جارىستار وتكىزۋگە مۇمكىندىك بار.
قاسىم- جومارت توقايەۆ قازاقشا كۇرەستەن جاستار اراسىندا ءوتىپ جاتقان وڭىرلىك كوماندالىق تۋرنيرگە قاتىسۋشىلاردىڭ بەلدەسۋلەرىن تاماشالادى.
قازاقستان پرەزيدەنتى تانىمال سپورتشىلارمەن اڭگىمەلەسىپ، ولارعا جەتىستىكتەرى ءۇشىن ريزاشىلىق ءبىلدىردى. مەملەكەتتىڭ ءاردايىم سپورتقا جان- جاقتى قولداۋى كورسەتەتىنىن جەتكىزدى.