اللەرگيانى ەمدەمەسە دەمىكپەگە ۇلاسادى - مامان
س ق و اۋرۋحاناسىنىڭ پۋلمانولوگ-دارىگەرى ۆەرا پوپلاۆسكايا ماۋسىمدىق اللەرگيا- پوللينوز جايىندا، دەرتپەن كۇرەسۋ جولدارى تۋرالى قازاقپارات تىلشىسىنە ايتىپ بەردى.
تۇشكىرۋ، كوزدەن پارلاپ جاس اعۋ، كوز بەن مۇرىننىڭ قىشۋى، بۇل - اللەرگيا بەلگىلەرىنىڭ ءبىر پاراسى عانا.
ماماندار اللەرگيانى «يممۋندىق دەرت» دەيدى. ماۋسىمدىق اللەرگيانىڭ نەگىزگى قوزدىرعىشى - گۇل توزاڭى. بۇگىنگى تاڭدا اللەرگيا تۋدىراتىن جۇزدەن استام وسىمدىك بەلگىلى. سونىڭ ەڭ نەگىزگىسى - قايىڭ اعاشى ەكەن.
اللەرگيا - اعزانىڭ كەيبىر زاتتارعا اسا سەزىمتالدىعى. بۇگىندە ول كەڭ تاراعان دەرتتەردىڭ بىرىنە اينالىپ وتىر. اللەرگيا كەيبىر تاماققا، ءدارى-دارمەككە، قولداناتىن حيميالىق زاتتار مەن كوسمەتيكاعا، تاعى باسقالارىنا بولۋى مۇمكىن. ماۋسىمدىق اللەرگيا ءساۋىر-مامىر ايلارىندا اعاشتار گۇلدەگەندە، ماۋسىم-شىلدەدە - ءداندى داقىلدار جانە تامىز-قىركۇيەكتە ارام شوپتەر گۇل شاشقاندا باستالادى ەكەن.
«اق قايىڭدار» ولكەسى اتانعان سولتۇستىك قازاقستان وبلىسىنان اللەرگياسى بار كەي ادامدار كوكتەم ۋاقىتىندا ۋاقىتشا قونىس اۋدارعانى دۇرىس. ويتكەنى قايىڭ - ەڭ نەگىزگى اللەرگەن سانالادى. بۇدان باسقا ورمانجاڭعاق، ۇيەڭكى، ءتىپتى، الما اعاشى مەن شيەنىڭ گۇلى دە اللەرگيا تۋدىرادى. ال كوپشىلىك نەگىزگى قوزدىرعىش دەپ ەسەپتەيتىن تەرەك ۇلپاسىنىڭ پوللينوزعا ەش قاتىسى جوق. ول تەك باسقا وسىمدىكتەردىڭ توزاڭىن تاسىمالداۋشى عانا قىزمەتىن اتقارادى»، - دەيدى ۆەرا پوپلاۆسكايا.
اللەرگياسى بار ادامداردىڭ تىنىس الۋ جولدارى قابىنعاندىقتان ءتۇن ۇيقىسى بۇزىلادى. جوتەل، تۇشكىرۋ، كوزدەن، مۇرىننان سۋ اعۋ، تاماعى مەن مۇرنى جىبىرلاپ تەز شارشايتىن بولادى. بەلگىلەرى تۇماۋعا ۇقساس بولعانىمەن، سۋىق تيۋدەن بىرنەشە ايىرماشىلىعى بار.
«اللەرگيادا ەشقاشان دەنە قىزۋى كوتەرىلمەيدى. تۇماۋدان ەڭ باستى ايىرماشىلىعى دا وسى. ماۋسىمدىق اللەرگيادا تاڭەرتەڭ ءوزىڭدى جايسىز سەزىنگەنىڭمەن، كەشكە جاعدايىڭ جاقسارادى. تۇندە جوتەل باستالۋى مۇمكىن. جاڭبىردان كەيىن ساۋىققانداي بولاسىڭ. ۇيدە ءوزىڭدى جاقسى سەزىنىپ، دالاعا شىققاندا دەرت قوزادى»، - دەيدى دارىگەر.
اللەرگيانى ەمدەمەسە جىل سايىن اعزانىڭ سەزىمتالدىعى ارتا ءتۇسىپ، جاڭا قوزدىرعىشتار قوسىلىپ وتىرادى. سوڭى تىنىس دەمىكپەسىنە ۇلاسىپ، ادام ءولىپ تە كەتۋى مۇمكىن. سول سەبەپتى ماماندار اۋرۋدى اسقىندىرماي مامانعا جۇگىنۋگە كەڭەس بەرەدى. دارىگەر ەڭ الدىمەن ادامنىڭ نەگە اللەرگياسى بارلىعىن انىقتايدى. سودان كەيىن بارىپ گيستامينگە قارسى، انتيلەيكوتريەندى جانە گورموندى پرەپاراتتاردى جازىپ بەرەدى.
«پوللينوز - ۇزاق ەمدەلىپ جازىلاتىن دەرت. اللەرگيانىڭ سالدارىن ازايتۋعا بولادى. ول ءۇشىن قاراپايىم ەرەجەلەردى ۇستانۋ كەرەك. قانداي وسىمدىكتىڭ توزاڭىنا اللەرگيا بارلىعىن بىلگەننەن كەيىن، ال ونى ءبىلۋ مىندەتتى، ونىمەن بايلانىستى ازايتقان ءجون. گۇلدەپ بىتكەنشە دەيىن باسقا جاققا كەتۋگە بولادى. ونداي مۇمكىندىك بولماسا دالاعا تەك اسا قاجەتتىلىك بويىنشا عانا شىعۋ كەرەك.
تەرەزەنى جابىق ۇستاپ، پاتەرگە اۋا تازالاعىش ورناتۋعا بولادى. ال سىرتقا شىققاندا كوزىلدىرىك پەن ماسكا كيۋگە كەڭەس بەرەمىن. ءار سىرتقا شىعىپ كەلگەن سايىن بەتى-قولدى جۋىپ، كيىمدى اۋىستىرۋ قاجەت بولادى. دالاعا قىدىرۋعا تەك جاڭبىردان كەيىن، شاڭ-توزاڭ كوتەرىلمەي تۇرىپ شىققان ءجون»، - دەيدى ۆەرا ۆلاديميروۆنا.