قازاقستان باتىسىنداعى ءۇش وڭىردە پوليگونداردا سناريادتار جارىلۋدا
«باتىس» وڭىرلىك قولباسشىلىعىنىڭ وقۋ-جاتتىعۋ پوليگوندارىندا جارىلماي قالعان سناريادتاردان الاڭدى تازارتۋ جۇمىستارى جۇرگىزىلۋدە. وعان ينجەنەرلىك-ساپەرلىك بولىمشەلەر مەن پوليگوندىق كوماندالار، سونداي-اق جول تالعامايتىن اسكەري تەحنيكا جۇمىلدىرىلعان. تازارتۋعا جاتاتىن اۋماقتىڭ جالپى كولەمى 50 مىڭ گەكتاردان استامدى قۇرايدى. بۇل - ماڭعىستاۋ، اتىراۋ جانە اقتوبە وبلىستارىندا ورنالاسقان «ويماشا»، «بەكەت اتا»، «ەسەت باتىر» جانە «قاراباتان» وقۋ-جاتتىعۋ پوليگوندارىنىڭ ۋچاسكەلەرى. پوليگونداردى جوسپارلى تۇردە تولىقتاي تازارتۋ جىلىنا ەكى رەت جۇرگىزىلەدى. نەگىزگى ماقسات - جەكە قۇراممەن وقۋ-جاتتىعۋ وتكىزۋ بارىسىندا قاۋىپسىزدىكتى قامتاماسىز ەتۋ ءۇشىن جارىلماي قالعان سناريادتار مەن وق-دارىلەردى جويۋ»، - دەپ ءمالىم ەتتى «باتىس» وڭىرلىك قولباسشىلىعىنىڭ اسكەرلەرى قولباسشىسى باسقارماسىنىڭ باسپا ءسوز قىزمەتىنەن.
اتاپ وتىلگەندەي، قاۋىپسىزدىك ماقساتىندا جارىلۋ قاۋپى بار بارلىق زاتتار جاتقان جەرىندە جارۋ ارقىلى جويىلادى. ساپەر-اسكەري قىزمەتشىلەر قورعانىسقا ارنالعان جەكە قۇرالدارمەن، بروندالعان كەۋدەشەلەرمەن، ساپەرلەردىڭ ارنايى كوستيۋمىمەن قامتاماسىز ەتىلگەن. سونىمەن قاتار جارىلۋ قاۋپى بار زاتتاردى 0,6 مەتر تەرەڭدىكتە انىقتاۋعا مۇمكىندىك بەرەتىن زاماناۋي مينا ىزدەگىشتەر قولدانىلۋدا.