نۇر-سۇلتاننىڭ قاق ورتاسىنان قازاق اۋىلى بوي كوتەرەدى
نۇر-سۇلتان قالاسىنىڭ مادەنيەت جانە سپورت باسقارماسىنان حابارلانعانداي، 31- مامىر مەن 2- ماۋسىم ارالىعىندا «حان-شاتىر» ساۋدا، ويىن-ساۋىق ورتالىعىنىڭ الاڭىندا كيىز ۇيلەر تىگىلىپ، قازاناتتار مەن قىران قۇستار كورمەسى وتەدى. سونداي-اق، كەلۋشىلەر قىش-قۇمىرانى يلەپ جاساۋ ادىسىمەن تانىسىپ، ورتاعاسىرلىق ستيلدەگى ەتنوبازاردى ارالايدى.
ال ەتنواۋىل اۋماعىندا ورنالاسقان كيىز ۇيلەردىڭ جانىنان ۇلتتىق كادەسىيلار ساتاتىن جارمەڭكە بولادى. ەلوردا تۇرعىندارى مەن قوناقتارى ۇش كۇندىك فەستيۆال اياسىندا اقىندار ايتىسى، مەرەكەلىك كونسەرت سياقتى شارالاردى تاماشالاپ، نايزا لاقتىرۋ، قول كۇرەسى، ماس-رەستلينگ، ساداق اتۋ جانە سەركە كوتەرۋ جارىستارىندا كۇش سىناسادى. جەڭىمپازدار ۇيىمداستىرۋشىلاردىڭ اتىنان باعالى سىيلىقتارمەن ماراپاتتالادى.
«Nur- Sultan Ethno Fest» شاراسىنىڭ ەرەكشەلىگى - جينالعان قاۋىم قازاق حالقىنىڭ سالت-داستۇرىمەن، ادەت-عۇرپىمەن ەتەنە تانىسا الادى. وكىنىشكە قاراي، ۋاقىت وتە كەلە ولار ۇمىتىلىپ جاتىر. مىسالى، قامشىگەرلىك، تەزگە سالۋ، قولقا سالۋ، تىعىرىققا تىرەۋ، ارقان ءورۋ، قامشى ءورۋ مەن شاڭىراق كوتەرۋ سەكىلدى ۇلتىق ەرەكشەلىكتەرىمىزدى جاڭعىرتساق دەيمىز. فەستيۆال شەڭبەرىندە وتەتىن باستى شارا ات ۇستىندە وتىرىپ ساداق اتۋدان «التىن جەبە» ءبىرىنشى الەم چەمپيوناتى بولماق. جارىسقا الەمنىڭ 20 مەملەكەتىنىڭ مەرگەندەرى قاتىسادى»، - دەيدى نۇر-سۇلتان قالاسى مادەنيەت جانە سپورت باسقارماسىنىڭ باسشىسى بولات ماجاعۇلوۆ.
«التىن جەبە» العاشقى الەم چەمپيوناتىنا قاتىساتىندارىن ورتالىق ازيا ەلدەرىنەن وزگە مالايزيا، وڭتۇستىك كورەيا، يوردانيا، رۋمىنيا، فينليانديا، پولشا، ماجارستان جانە تاعى باسقا ەلدەردىڭ وكىلدەرى راستادى.
سونىمەن قاتار، 1- ماۋسىم - بالالاردى قورعاۋ كۇنى قارساڭىندا «Nur- Sultan Ethno Fest» اۋماعىندا بالالارعا ارنالعان اتتراكتسيوندار جۇمىسىن باستايدى. فەستيۆالدىڭ كىشكەنتاي قوناقتارى ەلوردالىق قۋىرشاق تەاترىنىڭ ۇزدىك قويىلىمدارىن تەگىن تاماشالاپ، اتقا ءمىنىپ، اسىق اتۋ، لاڭگى تەبۋ ويىندارىنا قاتىسادى. سونداي-اق وتباسىلىق ەستافەتالار ۇيىمداستىرىلادى.
فەستيۆالدىڭ رەسمي اشىلۋى 31- مامىردا ساعات 19:00 دە وتەدى. ەتنواۋىل ساعات 10:00-22:00 ارالىعىندا اشىق بولادى. شارانى نۇر-سۇلتان قالاسىنىڭ اكىمدىگى قازاقستاننىڭ ەتنوسپورت قاۋىمداستىعىمەن بىرلەسىپ ۇيىمداستىرۋدا.