كەۋدەدەن جان ۇشا ما؟
قىسقاسى بۇل بولعان وقيعا ەدى.
ول كەزدە مەن 1-2 -سىنىپتا وقيتىنمىن. 8-9 جاستاعى بالا ەدىم. قاتتى سۋىق ءتيىپ اۋىردىم. شەشەم بايعۇس ءوز ەم-دومىن جاسادى. ءدال سول كۇنى ۇيلەرى ءبىر 30-40 مەتر جەردە ورنالاسقان كورشىمىز سوعىم باسىن بەرگەن ەدى. جەلتوقسان ايىنىڭ باسى. اكەم جانە ۇلكەن اپام سول ۇيگە كەتكەن. شەشەم مەن جوتەلە بەرگەن سوڭ مۇنىڭ كەۋدەسىنە، قولقاسىنا سۋىق تيگەن دەپ جۇقا داكەنى اراققا مالىپ، سىعىپ، القىمىما، كەۋدەمە جاپقان عوي. ءوزىم قىزۋىم كوتەرىلىپ جاتقان مەن ودان بەتەر قىزۋىم جوعارىلاپ، جۇرەگىم توقتاپ قالعان بولۋى كەرەك. كوزىمنىڭ اعى مولايىپ، قان تامىرىمنىڭ سوعۋى بىلىنبەگەن سوڭ، شەشەم قورقىپ كەتىپ كورشى ۇيگە تۇرا جۇگىرگەن.
ال ەندى كوزىم الايىپ، جۇرەك سوعىسىم بىلىنبەي جاتقان مەن شەشەمنىڭ كورشى ۇيگە قالاي جۇگىرىپ بارعانىن، الاسۇرىپ جەتىپ، ولارعا نە دەگەنىن، ساۋ ادامداي، سول شەشەممەن بىرگە جۇگىرىپ بارعانداي، ەستىپ-ءبىلىپ، سەزىپ جاتتىم.
بايعۇس انام ەنتىگىپ جەتىپ، سوعىم باسىندا وتىرعان اعايىندارعا، اكەم مەن اپاما «ويباي، بالا كەتىپ قالدى، ويباي!» - دەدى.
ارينە، بارلىعى ورە تۇرەگەلىپ، ءبىزدىڭ ءۇي جاققا ۇمتىلدى. دالا قاراڭعى. ءبىرىنىڭ ارتىنان ءبىرى جۇگىرگەن كورشى اعايىندار، سۇرىنە-قابىنا جەتىپ كەلدى. مارقۇم ءشايتاي اپامىزدىڭ كەبىسى شەشىلىپ كەتىپ، سوعان شالىنىسىپ قۇلاعانىن دا كورىپ كەلەمىن. ءسويتىپ، ۇرمەك- دۇرمەك جۇرت ۇيگە جەتىپ مەنى كورىپ جاتىر. اۋىلدا ول كەزدە دارىگەر دە جوق. ۇيدەگىلەر «ويباي، كەرىمباي، مولدانى شاقىر، دەم سالسىن!» - دەپ جاتىر.
اكەم شاۋىپ كەرىمباي مولداعا كەتتى. كەرىمباي مولدا جارىقتىق ايات، دۇعالارىن وقىپ، ۇشكىرىپ، سۋىق سۋ بۇركىپ، كەۋدەمدى ىسقىلادى. سوندا بارىپ مەن كوزىمدى اشىپ، جۇرەگىم قايتا سوعا باستاسا كەرەك. ەسىمدەگىسى، جان-جاعىمدا ماعان قاراپ، ۇيمەلەگەن ادامدار.
قوش، سودان كوپ ۇزاماي مەن ساۋىعىپ، ويناپ كەتتىم. ءبىراق كوپ جىلدار وتسە دە، سول بالا كۇنگى باسىمنان وتكەن جاعداي، ەلەس ءالى كوز الدىمدا. سودان بەرى مەن كەۋدەدەن ادام ولگەندە جان ۇشاتىنىنا، ايات-دۇعانىڭ قۇدىرەتىنە، و دۇنيەلىك ءومىردىڭ بار ەكەنىنە دە سەنەتىن بولدىم.
bugin.kz