توقايەۆ: جاڭا مۇناي- گاز كەن ورىندارىن زەرتتەۋگە كىرىسۋ قاجەت

فوتو: None
قىزىلوردا. قازاقپارات - قازاقستاندا مۇناي مەن گازدىڭ جاڭا كەن ورىندارىن زەرتتەۋ قاجەت. بۇل جايىندا قازاقستان پرەزيدەنتى قاسىم- جومارت توقايەۆ ءمالىم ەتتى، دەپ حابارلايدى قازاقپارات ءتىلشىسى اقوردانىڭ  Тwitter- دەگى اككاۋنتىنا سىلتەمە جاساپ.

 «قازىر وڭىردەگى مۇناي- كەن ورىندارىنىڭ سارقىلۋى جانە جىل سايىن كومىرسۋتەك ءوندىرۋدىڭ تومەندەۋى بايقالادى. بولاشاقتا بۇل سالادا جۇمىس ىستەيتىن ادامداردا پروبلەما تۋىنداۋى مۇمكىن. رەسۋرستىق بازاسىن كەڭەيتۋ بويىنشا شۇعىل شارالار قاجەت»، - دەدى قاسىم- جومارت توقايەۆ  قىزىلوردا وبلىسىنىڭ جۇرتشىلىعىمەن كەزدەسۋ بارىسىندا.

وسى ورايدا مەملەكەت باسشىسى جاڭا مۇناي- گاز كەن ورىندارىن زەرتتەۋگە كىرىسۋ قاجەتتىگىنە نازار اۋدارتتى.

 «جاڭا كەن ورىندارىن زەرتتەۋگە، قولدانىستاعى جوبالارعا زاماناۋي تەحنولوگيالاردى ەنگىزۋگە كىرىسۋ قاجەت. ۇكىمەت «قاز مۇنايگاز» ۇلتتىق كومپانياسى جانە اكىمدىكپەن بىرلەسىپ، وڭىردەگى مۇناي- گاز سالاسىن دامىتۋدىڭ ناقتى ستراتەگياسىن ازىرلەۋى كەرەك»، - دەدى قازاقستان پرەزيدەنتى.

 ەسكە سالايىق، بۇگىن مەملەكەت باسشىسى جۇمىس ساپارىمەن  قىزىلوردا وبلىسىنا كەلدى. وندا وبلىستىق كوپبەيىندى بالالار اۋرۋحاناسىنا جانە «جان- اراي» ج ش س- عا باردى. سونداي- اق قالانىڭ سول جاعالاۋىندا پايدالانۋعا بەرىلگەن نىساندارمەن تانىستى.

اۆتور: مارلان جيەمباي