سۇيىكتى ىسىمەن جاراقاتى سالدارىنان قوشتاسۋعا ءماجبۇر بولعان سپورتشى بۇگىندە وليمپياداعا دايارلاۋ ورتالىعىندا قاراپايىم ادىسكەر بولىپ قىزمەت ەتىپ ءجۇر دەپ حابارلايدى Youtobe جەلىسىندەگى Nursultan Qurman ارناسى.
ادىلبەكتىڭ جاڭا جۇمىسقا تۇرۋىنا بوكسشى اعالارى سەرىك ساپيەۆ پەن باحتيار ارتايەۆ سەپتىگىن تيگىزگەن. ولار بۇرىنعى بوكسشى ىنىسىنە بوس جۇرمەي ەڭبەك ەتۋگە شاقىرعان.
بوكستاعى ارداگەر اعالارىنىڭ ۇسىنىسىن قابىلداعان نيازىمبەتوۆ ويلانباستان نۇر-سۇلتان قالاسىنا كوشىپ بارعان. بۇگىندە ول قىزمەتىنە قىزۋ كىرىسىپ كەتكەنىن ايتادى.
«ەلورداعا كەلگەنىمە ءۇش ايدان استام ۋاقىت بولدى. باسىندا كەلگەنىمدە سەرىك اعالارىم بار، باحتيار اعام قول ۇشىن بەرىپ، ماعان كومەكتەستى. سپورت سالاسىن قويعاننان كەيىن، قۇر بوس جۇرمەي استاناعا كەلگەنىڭ دۇرىس بولادى دەدى. باپكەرلەرمەن اقىلداسقانمىن. وسى قالاعا كەلۋىمە سەبەپشى بولعان، سول اعالارىمنىڭ ارقاسىندا كەلدىم. جۇمىس توڭىرەگىندە بولدى ماسەلە.
ءبىز ءومىر-باقي سپورتتا جۇرگەننەن سوڭ، قاعاز جۇزىندە كىشكەنە جۇمىستارىن قاراپ، قالاي جۇمىس جاسايتىنىن كورۋ سياقتى سەبەبىمىز بار. وليمپياداعا دايارلاۋ ورتالىعى سالاسىنا كىردىم. مەتوديست بولىپ كىردىك. ماعان قاي سالانى، قانداي لاۋازىمدى ۇسىنسا دا دايىن بولدىم. ءبىرىنشى رەت جاساعان سوڭ، باستىق بولىپ كەتۋ مۇلدە وڭاي ەمەس»، - دەدى بوكسشى.
سونىمەن قاتار، نيازىمبەتوۆ ادىسكەر رەتىندە قانداي قىزمەت اتقاراتىنىن اشىپ ايتتى.
«ورتالىقتا بوكستان باسقا دا سپورت تۇرلەرى دە بار. ءبىز وليمپياداعا دايارلاۋمەن، ءبىراق قاعاز جۇزىندە اينالىسامىز. قاعازعا مۇلدە جاقىن ەمەس بولعانمىن. الايدا، جۇمىس بولعان سوڭ، ىستەۋ كەرەك. ازىرگە جارتى جىلداي وسى لاۋازىمدا بولۋ جوسپاردا بار. ارى قاراي نە بولارىن كورەمىز. نەگىزى ءۇش-ءتورت جىلداي وسى نۇر-سۇلتان قالاسىندا قىزمەت ەتۋدى ماقسات ەتىپ وتىرمىن»، - دەيدى ادىلبەك.
بۇرىنعى بوكسشى ءوزى جۇمىسقا كىرگەن ورتالىقتاعى ورتاشا جالاقىنىڭ مولشەرىن اتاپ ءوتتى.
«مەنىڭ ماقساتىم ايلىق ءۇشىن ەمەس، وسى قاعازعا ءسىڭىپ ۇيرەنۋ كەرەك بولدى. بۇل جەردە ايلىق 130-140 مىڭ بولاتىن شىعار. ونداي بولماسا مەن كەلمەس ەدىم. ونداي ايلىققا ءومىر ءسۇرۋ دە قيىن. ودان بولەك تاماعىڭ بار دەگەن سياقتى»، - دەيدى نيازىمبەتوۆ.