ەلوردا وقۋشىلارى مەكتەپتە امبەباپ كارتانى پايدالانا الادى

نۇر- سۇلتان. قازاقپارات - ەلوردا اكىمىنىڭ ورىنباسارى ماليكا بەكتۇروۆا مەكتەپ وقۋشىلارىنا ارنالعان امبەباپ كارتا تۋرالى ايتىپ بەردى، دەپ حابارلايدى قازاقپارات ءتىلشىسى.

 «اۆتوبۋسپەن ءجۇرۋ، مەكتەپتەگى تۋرنيكەتتەن ءوتۋ، اسحانادا تۇسكى اس ءىشۋ سەكىلدى قىزمەتتەردى ءبىر كارتانىڭ كومەگىمەن الۋعا بولادى. وتكەن جىلدىڭ قاراشاسىنان باستاپ № 59 مەكتەپتە تاماقتانۋ بويىنشا قولما- قول اقشاسىز ەسەپتەسۋدىڭ اۆتوماتتاندىرىلعان جۇيەسى تۇرعىسىندا قاناتقاقتى جوبانى ەنگىزۋگە كىرىستىك. ەندى اتا- انالار بالالاردىڭ ساتىپ العان تاعامدارىن قاداعالاپ، تەكسەرە الادى، سونداي- اق تاۋلىكتىك ليميتتى ورناتۋعا مۇمكىندىك بار. مۇنىمەن قوسا، كارتا ارقىلى مۇعالىمدەر بالانىڭ مەكتەپكە قاشان كەلگەنىن جانە شىققانىن كورەدى»، - دەپ جازدى م. بەكتۇروۆا ءوزىنىڭ Telegram كانالىندا.

 ونىڭ ايتۋىنشا، اسحاناداعى POS- تەرمينالدار وقۋشىلار تۋرالى اقپاراتتى سارالايدى، ياعني قانداي ونىمدەر بالانىڭ اللەرگياسىن تۋدىراتىنى، وقۋشىنىڭ كۇندىزگى ليميتى جانە باسقا دا مالىمەتتەر قامتىلادى.

تەرمينال smart-schools.kz اقپاراتتىق پورتالىمەن بىرىكتىرىلگەن. جۇيەدە  3000 استام كارتا تىركەلگەن.

اتاپ ايتقاندا، بۇل قاناتقاقتى جوبا، سوندىقتان بارلىق ۇسىنىستار مەن كەمشىلىكتەر ەسكەرىلىپ، تۇزەتىلەدى. سونىمەن قاتار، جۇيە AstraPlat جول ءجۇرۋ كارتالارىن پايدالانادى.

«1 - ساۋىردەن باستاپ تاعى دا 34 مەكتەپ اتالعان جاڭا جۇيەگە قوسىلدى. وقۋشى QR- كودتى سكانەرلەۋ ارقىلى نەمەسە استانا LRT كارتاسىن اسحاناداعى ارنايى تەرمينالعا جاقىنداتۋ مۇمكىندىگىمەن تۇسكى استىڭ اقىسىن تولەي الادى»، - دەدى اكىمنىڭ ورىنباسارى.

وقۋشىلاردى سايكەستەندىرۋ ءۇشىن بىرنەشە اقىسىز نۇسقالاردى پايدالانۋعا بولادى: موبيلدىك قوسىمشا؛ كارتانى Astana LRT جۇيەسىمەن بايلانىستىرۋ؛ فوتوسۋرەت پەن جەدەل QR- كودتى بەلگىلەۋ ارقىلى وقۋشىلاردىڭ قورعالعان جەكە كارتاسى.

«بۇل تۇعىرناماعا نۇر- سۇلتان قالاسىنداعى بارلىق مەكتەپتەرىن 1 - قىركۇيەككە قاراي قوسۋ جوسپارلانىپ وتىر»، - دەدى ماليكا بەكتۇروۆا.

اۆتور: رۋسلان عابباسوۆ