شىعىس قازاقستاندا وزەن جاعاسىنان ەلىكتەردىڭ ولەكسەلەرى تابىلدى
07:10, 13 - مامىر 2019
نۇر-سۇلتان. قازاقپارات - كوكپەكتى اۋدانىنداعى قۇلىنجون وزەنىنىڭ ماڭىنان التى ەلىكتىڭ ولەكسەسى تابىلدى، دەپ حابارلايدى التاينيۋس.
بۇل وقيعا جايلى اقپاراتتى سايت وقىرمانى ءمالىم ەتكەن.
«10 -مامىردا كوكپەكتى اۋدانىنداعى قۇلىنجون وزەنىنىڭ ماڭىنداعى قۇمعا باردىق. بۇل قورىقشانىڭ اۋماعى. سول جەردىڭ قاق ورتاسىندا سۇمدىق جايتقا تاپ بولدىق: الاڭقايدا التى ەلىكتىڭ ولەكسەسى جايراپ جاتىر. ەلىكتەردىڭ سيراقتارى مەن مۇيىزدەرى عانا قالعان دەسە بولادى. براكونەرلەردىڭ ءىسى مە دەپ ويلايمىن. ويتكەنى قاسقىر شاپقان بولسا، ەلىكتەردىڭ تەك سۇيەگى عانا قالار ەدى. نەگە اڭ اۋلاۋعا تىيىم سالىنعان مەرزىمدە قورعالاتىن اۋماقتا مۇنداي جاعدايعا جول بەرىلگەن؟» - دەپ جازادى ەلەنا ەسىمدى وسكەمەن قالاسىنىڭ تۇرعىنى.