سولتۇستىك كورەيا زىمىرانداردىڭ كەزەكتى سىناعىن وتكىزدى
Yonhap اگەنتتىنىڭ حابارلاۋىنشا، بۇل وقيعا سولتۇستىك كورەيا شىعىس تەڭىزگە زىمىران جىبەرگەننەن بەس كۇن وتكەندە بولعان.
«زىمىراندار كۋسونگتىڭ سولتۇستىك-شىعىسىنان شىعىسقا قاراي ساعات 16:29 جانە كەشكى 4:39 دا جىبەرىلىپ، بىرەۋى 420 كيلومەتر، ەكىنشىسى 270 كيلومەتر قاشىقتىقتان سوڭ شىعىس تەڭىزىنە تۇسكەن. ءبىزدىڭ اسكەريلەر باقىلاۋدى كۇشەيتتى جانە سولتۇستىك كورەيانىڭ تاعى زىمىران جىبەرۋى مۇمكىن ەكەنىن ەسكەرتىپ ا ق ش- پەن تىعىز كوورديناتسيا جاسادى»، - دەپ حابارلادى شتاب باسشىلىعى كوميتەتىنىڭ وكىلدەرى. ولار زىمىراننىڭ ءدال قاي جەرگە قونعانىن ناقتى انىقتامادى جانە وڭتۇستىك كورەيا مەن ا ق ش زىمىرانداردىڭ دەتالدارىنا اناليز جاساپ جاتقانىن حابارلادى.
جاپونيانىڭ قورعانىس مينيسترلىگى بەس كۇن بۇرىن ۇشىرىلعان زىمىرانداردان سوڭ: «جاپونياعا قاۋىپ ءتونىپ تۇرعان جوق. جاپونيا اۋماعىنداعى تەڭىزگە زىمىران قونبادى» دەپ مالىمدەمە جاساعان بولاتىن. ال اتالعان وقيعادان كەيىن جاپونيا قورعانىس مينيسترلىگى شۇعىل جينالىس اشتى.
وڭتۇستىك كورەيا پرەزيدەنتىنىڭ اكىمشىلىگى قاۋىپسىزدىك جاعدايىن ءجىتى باقىلاپ وتىرعانىن حابارلادى.