ەلوردادا جەڭىس كۇنىنە ارنالعان مەرەكەلىك وتشاشۋ بولدى

نۇر-سۇلتان. قازاقپارات - نۇر- سۇلتاندا جەڭىس كۇنىنە ارنالعان مەرەكەلىك وتشاشۋ بولدى، دەپ حابارلايدى قازاقپارات.

مەرەكەگە ارنالعان وتشاشۋ ساعات 22:00 دە قالانىڭ ەكى جەرىندە وتەتىنى تۋرالى بۇعان دەيىن حابارلاعان بولاتىنبىز. ەلوردالىقتار مەن مەگاپوليس قوناقتارى فەيەرۆەركتى ەسىل وزەنىنىڭ جاعالاۋىندا جانە ترياتلون ساياباعىندا تاماشالاي الدى.

بۇگىن ادامزات تاريحىنداعى ەڭ الاپات سوعىستىڭ اياقتالعانىنا 74 جىل تولدى. س س س ر ءۇشىن قاندى سوعىس توقتاۋسىز 5 جىلعا، ياعني 1418 كۇنگە سوزىلدى. وعان سوۆەت وداعىنىڭ قۇرامىنداعى رەسپۋبليكالاردىڭ ازاماتتارىمەن قاتار قازاقستاندىقتار دا قاتىستى. جالپى، 1939-جىلدىڭ قىركۇيەگىندە باستالعان ەكىنشى دۇنيەجۇزىلىك سوعىس وتى الەمنىڭ 57 ەلىن شارپىپ، ءارتۇرلى دەرەكتەر بويىنشا 50 دەن 80 ميلليونعا دەيىن ادام ءومىرىن جالماپ كەتكەن.

سوڭعى دەرەكتەرگە سۇيەنسەك، سوعىس جىلدارى س س س ر- دەن 27 ميلليون ادام قۇربان بولعان. قازاقستاننان 1 ميلليون 200 مىڭ ادام مايدانعا اتتانىپ، ونىڭ تەڭ جارتىسى ورالمادى. 500 دەن استام قازاقستاندىق جاۋىنگەر سوۆەت وداعىنىڭ باتىرى اتاندى.

قازاقستاندا قازىرگى تاڭدا ەكىنشى دۇنيەجۇزىلىك سوعىسقا قاتىسقان 1400 دەن استام ارداگەر تۇرادى.