رامازان ايىندا قاراعاندى مەشىتتەرىندە تەگىن تاكسي ۇيىمداستىرىلادى

قاراعاندى. قازاقپارات - رامازان ايى باستالعالى قاراعاندى مەشىتتەرىندە قايىرىمدىلىق اكسيالارى وتۋدە. وبلىستىق مەشىت كوپبالالى جانە از قامتىلعان وتباسىلارعا ازىق- تۇلىك تاراتىپ، كومەك كورسەتتى، دەپ حابارلايدى قازاقپارات ءتىلشىسى.

بۇدان بولەك، قالانىڭ بارلىق مەشىتتەرىندە اۋىزاشارلار ۇيىمداستىرىلۋدا. ال وعان كەلەتىن جۇزدەگەن ادامدى ۇيلەرىنە جەتكىزىپ سالۋ ءۇشىن تەگىن تاكسي قىزمەتىن ىسكە قوسۋ جوسپارلانعان.

«مەشىت ءاردايىم قايىرىمدىلىق شارالارىن ۇيىمداستىرىپ وتىرادى. الايدا مۇسىلماندار ءۇشىن قاسيەتتى رامازان ايىندا ول شارالاردىڭ سانى ەكى ەسە وسەدى. جاقسىلىق جاساۋ - جاراتۋشىنىڭ الدىنداعى ۇلكەن ءىس،» - دەپ اتاپ ءوتتى انەت بابا اتىنداعى وبلىستىق مەشىتتىڭ سايت رەداكتورى ءنازيرا باينازاروۆا.

 رامازان - مۇسىلماندار ءۇشىن قاسيەتتى اي. قۇراندا ايتىلعانداي، وسى قاسيەتتى ايدا ورازا تۇتۋ يسلام دىنىندەگى بەس پارىزدىڭ ءبىرى. بيىل 6 - مامىر كۇنى باستالعان رامازان ايى 5 - ماۋسىمعا دەيىن جالعاسادى. بەرىلەتىن ءپىتىر- ساداقانىڭ كولەمى - 300 تەڭگە.

اۆتور: اگاتا مۋحامەدجانوۆا