ءبىر ەلدەگى سىپايىلىق بەلگىسى باسقا ەلدەردە ورەسكەلدىك سانالۋى بولۋى مۇمكىن. سول سەبەپتى كەلەسى جاعدايلاردى ءبىلىپ جۇرگەنىمىز ءلازىم.
تۇكىرىك - قۇرمەت بەلگىسى. قاعيداعا ساي، ورىنسىز تۇكىرۋ ادەپتىلىك بەلگىسى ەمەس. الدەكىمنىڭ ماڭايىنا تۇكىرۋ ءتىپتى، ونى قورلاۋمەن تەڭ بولىپ ەسەپتەلەدى. ال ا ق ش- تا تۇكىرۋ - پوليسەي قىزمەتكەرىنە شابۋىل جاساۋ بولىپ سانالادى. ماسايلار ۇرپاعى ورتالىق شىعىس افريكادا تۇكىرۋگە مۇلدەم باسقاشا قارايدى. ولار قول الىسىپ امانداسار الدىندا جانە امانداسقاننان كەيىن الاقاندارىنا تۇكىرەدى. ول جاقتا سىپايى بالالار ۇلكەندەردەن قويۋ تۇكىرىكتى قىڭق دەمەي قابىل الادى، سەبەبى ول ۇلكەندەردىڭ بالاعا ۇزاق عۇمىر تىلەۋىمەن پارا- پار.
سوراپتاۋ - العىس ايتۋ بەلگىسى. بىرنەشە ەلدە كوپشىلىك ورتادا سورپانى سوراپتاپ ءىشۋ تۇسىنىكسىز كوزقاراس تۋعىزادى. ال ازيانىڭ قىتاي، جاپونيا سەكىلدى ەلدەرىندە سورپانى ۇرتتاپ- ۇرتتاپ ءىشۋ - ونى دايىنداعان ادامعا كورسەتىلگەن ەڭ جوعارى قۇرمەت بولىپ ەسەپتەلەدى. بۇل سورپانىڭ ءدامى ءتىل ۇيىرەرلىگى سونشا، سۋىعانعا دەيىن شىداماي ءىشىپ وتىرمىن دەگەن بەلگى. ادام سورپانى سوراپتاماي ىشسە، ول تاماققا رازى ەمەستىگىن كورسەتەدى. جاپونيادا شاي ىشۋگە قاتىستى دا وسىنداي قاعيدا قالىپتاسقان. شايدى سوڭعى جۇتىمىنا دەيىن ۇرتتاپ- ۇرتتاپ ىشسە، ودان كەيىن ىشپەيتىنىن جانە ريزا ەكەنىن بىلدىرگەنى.
ءتىلىڭدى شىعارۋ - ءارتۇرلى ماعىنا. كوپتەگەن حالىقتاردا ءتىلىن شىعارۋ قىزبالىق نەمەسە مازاقتاۋ ارەكەتى رەتىندە كورىنەدى. ال كەيدە ءتىپتى كەمسىتۋ سەكىلدى قابىلدانادى. ءدال وسى سەبەپتى يتاليادا ايىپپۇل سالىنادى. ينديادا ءتىلىڭدى كورسەتۋ زاڭسىزدىق بولماعانىمەن، نارازىلىق رەتىندە تانىلادى. ءبىزدىڭ عالام بايتاق، سوندىقتان مۇندا ءتۇرلى- ءتۇرلى تاسىلدەر كەزدەستىرۋگە بولادى. جاڭا كالەدونيادا ءتىلىڭدى شىعارۋ اقىلدىلىق پەن كۇش- قۋات تىلەۋ بولىپ قارالادى. تيبەتتە ءتىل شىعارۋ قۇرمەت بەلگىسى، بىرەۋدى قاتتى قۇرمەتتەگەندە ءتىلىن جالاقتاتادى. كارولين ارالىندا ءتىل شىعارۋ - شايتانداردى قۋۋ ءتاسىلى.
گۇلدەر - ءاردايىم امبەباپ سىيلىق ەمەس. گۇلدەردى ادەتتە العاشقى كەزدەسۋگە، مەكتەپ ءبىتىرۋ كەشىندە، ۇيلەنۋ تويىندا دا سىيلاپ جاتادى. ءبىر شوق گۇل ساۋىعىپ كەتۋ نە كەشىرىم سۇراۋ بەلگىسىندە دە جۇرەدى. ادامدى سوڭعى ساپارعا دا گۇلمەن شىعارىپ سالىپ جاتادى. ءبىراق كەيبىر مادەنيەتتى ەلدەردە گۇل - قۇرمەتسىزدىك بەلگىسى. حريزانتەما، گلاديولۋس، لالا گۇلدەرى سەكىلدى اق ءتۇستى گۇلدەر قازالى جاعدايدى بىلدىرگەندىكتەن، كوپ ەلدەردە جانازاعا قولدانىلادى. گەرمانيا مەن فرانسيادا قالامپىرمەن تابىتتى كومكەرەدى. ەگەر بىرەۋگە فرانسيادا قالامپىردى نە قىتايدا اق ءتۇستى گۇلدى سىيلاساڭ، ءولىم تىلەۋمەن تەڭ. سارى ءتۇستى گۇلدەر ورىس حالقى ءۇشىن ۇرىس- كەرىس شاقىرادى، يراندا دا جاعىمسىز قارىم- قاتىناسقا اكەلەدى. ال يتاليا مەن برازيليادا كۇلگىن ءتۇستى گۇلدەر - ساتسىزدىك. گەرمانيا مەن يتاليادا قىزىل ءتۇستى گۇلدەر، اسىرەسە راۋشاندار - رومانتيكالىق اراقاتىناس تۋعىزادى. چەح رەسپۋبليكاسىندا گۇلدەر تولىعىمەن رومانتيكالىق سىيلىق بولىپ سانالادى.
Massaget.kz