تۇرعىن ءۇي: «باقىتتى وتباسى» باعدارلاماسىنىڭ شارتتارى قانداي
«بۇگىن ءبىزدىڭ الدىمىزدا تۇرعان باستى مىندەت - كوپبالالى جانە تولىق ەمەس وتباسىلاردىڭ باسپانالى بولۋىنا بارىنشا كومەك كورسەتۋ. ول ءۇشىن نەسيە بەرۋدىڭ جەڭىلدەتىلگەن شارتتارى جاسالدى. ەلباسى نۇرسۇلتان نازاربايەۆتىڭ «Nur Otan» پارتياسىنىڭ ХVІІІ سەزىندە بەرگەن تاپسىرماسى بويىنشا «نۇرلى جەر» باعدارلاماسى اياسىندا «باقىتتى وتباسى» اتتى جاڭا ءبىر باعىت ماۋسىم ايىنان باستاپ ىسكە قوسىلادى.
بۇل باعدارلاماعا ءتورت جانە ودان دا كوپ بالاسى بار وتباسىلار، مۇمكىندىگى شەكتەۋلى بالاسى بار وتباسىلار قاتىسا الادى. كامەلەتتىك جاسقا تولماعان بالاسى بار تولىق ەمەس وتباسىلاردىڭ دا قاتىسۋعا قۇقىعى بار»، - دەيدى ءلاززات يبراگيموۆا ۇكىمەتتىڭ باسپا ءسوز ورتالىعىنداعى وتكەن بريفينگتە.
ونىڭ ايتۋىنشا، نەسيە بويىنشا جاڭادان سالىنعان نەمەسە ەكىنشى نارىقتاعى دايىن ۇيلەردى ساتىپ الۋعا مۇمكىندىك تۋىپ وتىر.
««باقىتتى وتباسى» باعدارلاماسىندا ءبىر ادامعا شاققانداعى تابىسى 42500 تەڭگەدەن اسپايتىن وتباسىلار قاتىسا الادى. ماسەلەن، ەگەر وتباسى التى ادامنان تۇرسا، وندا ونىڭ جالپى تابىسى 255 مىڭ تەڭگەدەن اسپاۋى كەرەك. سونداي-اق، جەڭىلدەتىلگەن نەسيە بويىنشا جەكە باسىنا جانە ونىمەن بىرگە تۇراتىن وتباسى مۇشەلەرىنە ءوتىنىم بەرگەن كۇندى العاندا باسپاناسى جوق بولۋى كەرەك. قازىر ءبىز ناۋرىز ايىنان باستاپ پيلوت تۇرىندە «باقىتتى وتباسى» باعدارلاماسىن الماتى وبلىسىندا باستادىق. ول بويىنشا، اكىمدىكتە كەزەكتە تۇرعان كوپبالالى وتباسىلار جاڭادان سالىنعان ۇيلەردەن پاتەر ساتىپ الۋ ءۇشىن جىلدىق 2 پايىزبەن، 10 پايىزدىق باستاپقى جارنامەن نەسيە الا الادى»، - دەيدى ول.
باسقارما ءتورايىمى قازىرگى تاڭداعى ناتيجە تۋرالى دا ءسوز قوزعادى.
«344 وتباسى بىزگە ءوتىنىم بەردى. ونىڭ اراسىندا 330 وتباسىنىڭ ءوتىنىمى ماقۇلداندى. بۇگىن ەكى وتباسى نەسيە شارتىنا قول قويادى. قازىر ءبىزدىڭ بانككە 44 وتباسىعا 1 ميلليون تەڭگەدەن اكىمدىك تۇرعىن ءۇي سەرتيفيكاتىنىڭ اقشاسىن ەسەپشوتىنا سالدى. بۇگىن تاماشا كۇن: كوپبالالى ەكى وتباسى العاشقى بولىپ 2 پايىزبەن پاتەر الىپ، باسپانالى بولدى»، - دەيدى ءلاززات يبراگيموۆا.