دەپۋتات قازاق تىلىندەگى وقۋلىقتاردىڭ قاتەلەرىن ءتىزىپ بەردى

نۇر- سۇلتان. قازاقپارات - ق ر پارلامەنت ءماجىلىسىنىڭ دەپۋتاتى باقىتبەك سماعۇل ءبىلىم ءمينيسترىنىڭ اتىنا ساۋال جولدادى، دەپ حابارلايدى قازاقپارات ءتىلشىسى.

ونىڭ ايتۋىنشا، قولدانىستاعى وقۋلىقتاردىڭ باسىم بولىگى ورىس مەكتەبىندە وقيتىن شاكىرتتەرگە ارنالعان. وندا كورسەتىلگەن مىسالدار دا سوعان بەيىمدەلگەن. سونىڭ ءبارى قازاق تىلىنە اۋدارىلعاننان كەيىن وقۋشىنى بىلاي قويعاندا، ۇستازدار ءۇشىن دە كوپ قيىندىق تۋعىزادى.

«وكىنىشكە قاراي، رەسپۋبليكامىزدىڭ ەڭ تاڭداۋلى پەداگوگ ماماندارى، ۇستازدار مەن ادىسكەرلەردەن قۇرالعان بىلىكتى كوميسسيا تاڭداعان كەيبىر وقۋلىقتار وتپەي قالىپ جاتادى. دالەل رەتىندە بىرنەشە مىسال كەلىتىرە كەتەيىن. «مەكتەپ» باسپاسىنان شىققان 7- سىنىپتىڭ فيزيكا ءپانى وقۋلىعىنىڭ اۆتورلارى - توقبەرگەنوۆا مەن كرونگارتتىڭ ورىس جانە قازاق تىلدەرىندەگى وقۋلىقتارىندا كوپتەگەن ماتىندىك سايكەسپەۋشىلىكتەر كەزدەسەدى. مىسالى، قازاق تىلىندەگى وقۋلىقتىڭ 109- بەتىندەگى جاتتىعۋدا «بالا باتەڭكەسى تابانىنىڭ اۋدانى» دەپ بەرىلۋى كەرەك ءماتىن «بالا باتەڭكەسىنىڭ اۋدانى» دەپ بەرىلگەن. 120- بەتتە اتموسفەرالىق قىسىم تاقىرىبىنداعى 4-37 سۋرەتتە كورسەتىلگەن تاجىريبەنىڭ تۇسىنىكتەمەسىندە «كولباداعى ازداپ جەڭىلدەيدى» دەپ جازىلۋى كەرەك سويلەمنىڭ ورنىنا «كولباداعى ازداپ اۋىرلايدى» دەپ جازىلعان»، - دەدى ب. سماعۇل بۇگىنگى پلەنارلىق وتىرىستا.

«الماتى» باسپاسىنان شىققان ماتەماتيكادان قازاق تىلىندەگى وقۋلىقتا دا قاتەلەر از ەمەس. ۇلتتىق ۆاليۋتانى «تەڭگە» دەپ جازۋدىڭ ورنىنا «ZK» دەپ كورسەتە سالعان.

«سوسىن ءبىر ەسەپتە «شاڭعىشى مەن ۆەلوسيپەدشىنىڭ ۇشۋ جىلدامدىعىن انىقتا» دەلىنگەن. و زامان دا، بۇ زامان، ۆەلوسيپەدشى مەن شاڭعىشىنىڭ ۇشقانىن كورگەن جوقپىز. 125- بەتتەگى سۋرەتتىڭ استىندا «اسفەندياروۆ سانجار جاپارۇۇ» دەپ جازىلعان، دۇرىسى - اسفەندياروۆ سانجار جاپار ۇلى. 135- بەت، 5- تاپسىرمادا دوري، نوري، وري دەگەن قازاققا جات ەسىمدەرمەن مىسالدار كەلتىرگەن. جاتتىعۋعا مىسال بولاتىن قازاقتىڭ اتى جوق پا؟ 7- تاپسىرمادا «ۆيد ترانسپورتا» دەگەن ارتىق ءسوز ءجۇر»، - دەپ اتاپ كورسەتتى ب. سماعۇل.

بۇدان بولەك، 4-سىنىپقا ارنالعان ادەبيەتتىك وقۋ كىتابىندا YouTube-تەن مۋلتفيلم كورۋگە تاپسىرما بەرىلگەن. ال ءبىر تاپسىرماسىندا «راتاتۋي» دەگەن شەتەلدىك مۋلتفيلمىن كورىپ، ونىڭ مازمۇنىن ايتىپ بەرۋگە مىندەت قويىلىپ وتىر.

 «ونىڭ ورنىنا ءتول تىلىمىزدە بەرىلگەن تۋىندى جوق پا؟ «راتاتۋي» سىندى مۋلتفيلمدەردى وقۋلىقتا جارنامالاۋدىڭ ەش قاجەتى جوق. ءبىز كەلتىرگەن مىسالدار ءبىر- ەكى وقۋلىقتان عانا، بۇدان بولەك، گرامماتيكالىق ءارى تەحنيكالىق قاتەلەر كوپ»، - دەدى ب. سماعۇل.

اۆتور: ارمان اسقاروۆ