پرەزيدەنتتىككە كانديداتتار اراسىندا اشىق تەلەپىكىرتالاس ءوتۋى مۇمكىن

نۇر-سۇلتان. قازاقپارات - ق ر ورتالىق سايلاۋ كوميسسياسى ق ر پرەزيدەنتتىگىنە كانديداتتار اراسىندا تەلەديداردان اشىق پىكىرتالاس وتكىزۋ مۇمكىنشىلىگىن قاراستىرىپ جاتىر.

بۇل تۋرالى بۇگىن ق ر ورتالىق سايلاۋ كوميسسياسى ءتوراعاسىنىڭ ورىنباسارى كونستانتين پەتروۆ ايتتى، دەپ حابارلايدى قازاقپارات ءتىلشىسى.

«پرەزيدەنتتىككە كانديداتتار، ولاردى ۇسىنعان ساياسي پارتيالار ورتالىق سايلاۋ كوميسسياسى ۇيىمداستىراتىن تەلەديدارداعى سايلاۋ الدىنداعى پىكىرتالاستارعا قاتىسۋعا قۇقىلى. قازىرگى ۋاقىتتا ورتالىق سايلاۋ كوميسسياسى مۇنداي مۇمكىندىكتى پىسىقتاۋدا»، - دەدى ول.

ونىڭ ايتۋىنشا، مەملەكەت سايلاۋ الدىنداعى ۇگىت جۇرگىزۋ ءۇشىن بۇقارالىق اقپارات قۇرالدارىنا قول جەتكىزۋدىڭ تەڭ شارتتارىنا كەپىلدىك بەرەدى. ول ءۇشىن «سايلاۋ تۋرالى» كونستيتۋتسيالىق زاڭنىڭ 28-بابىنىڭ 3-تارماعىنا جانە ق ر و س ك- نىڭ قاۋلىسىمەن بەكىتىلگەن كۇنتىزبەلىك جوسپاردىڭ 7-تارماعىنا سايكەس ەفير مەن باسپا ءسوز الاڭىن بەرۋ مولشەرى، شارتتارى مەن ءتارتىبى تۋرالى مالىمەتتەر ءتيىستى بۇقارالىق اقپارات قۇرالىمەن 2019-جىلعى 5- مامىردا سايلاۋ الدىنداعى ۇگىت جۇرگىزۋ باستالعانعا دەيىن 5 كۇننەن كەشىكتىرمەي حابارلاندىرىلۋى جانە جاريالانۋى ءتيىس. سونداي-اق و سك - عا ونىڭ ينتەرنەت-رەسۋرسىندا ورنالاستىرۋ ءۇشىن ۇسىنىلۋى قاجەت. قازىرگى ۋاقىتتا و س ك- عا ب ا ق- تان 139 اقپاراتتىق حابار كەلىپ ءتۇستى، بارلىق حابارلار و س ك سايتىندا ورنالاستىرىلعان.

«كانديداتتارعا بۇقارالىق اقپارات قۇرالدارىندا ەفير ۋاقىتىن، باسپا الاڭىن بەرۋ تۋرالى شارتتىڭ تالاپتارى قانداي دا ءبىر كانديداتقا، ساياسي پارتياعا باسىمدىق تۋعىزباۋى ءتيىس. كانديداتتاردىڭ بىرىنە بەرىلگەن ەفير ۋاقىتىن، باسپا الاڭىن بولۋگە كەلىسىم بەرۋ وزگە دە كانديداتتارعا ەفير ۋاقىتىن، باسپا الاڭىن بولۋگە كەلىسىم بەرۋ بولىپ تابىلادى. كانديداتتاردىڭ بۇقارالىق اقپارات قۇرالدارىندا ءسوز سويلەۋىنىڭ كەزەكتىلىگى جازباشا وتىنىشتەردىڭ كەلىپ ءتۇسۋ تارتىبىمەن نەمەسە وتىنىشتەر ءبىر مەزگىلدە تۇسكەن جاعدايدا جەرەبە بويىنشا بەلگىلەنەدى»، - دەدى ك. پەتروۆ.

ونىڭ سوزىنە قاراعاندا، كانديداتتاردىڭ سايلاۋ الدىنداعى ۇگىتى بار مەرزىمدى باسپا ءسوز باسىلىمدارىنىڭ، تەلە-راديوحابارلاردىڭ بارلىق جاريالانىمدارى قارجىلاندىرۋ كوزدەرى تۋرالى اقپاراتتى قامتۋى ءتيىس. پرەزيدەنتتىككە كانديداتتار بۇقارالىق اقپارات قۇرالدارىنا ۇگىت ماتەريالدارىن ۇسىنعان كەزدە ولاردىڭ كونستيتۋتسيا مەن سايلاۋ زاڭناماسىنىڭ تالاپتارىنا سايكەستىگىن قامتاماسىز ەتۋگە قاجەت.