كوممۋنيست احمەتبەكوۆ پرەزيدەنتتىككە كانديداتتىڭ كۋالىگىن الدى

نۇر- سۇلتان. قازاقپارات - ق ر ورتالىق سايلاۋ كوميسسياسى جامبىل احمەتبەكوۆتى ق ر پرەزيدەنتتىگىنە كانديدات رەتىندە تىركەدى. بۇگىن وعان كانديداتتىڭ كۋالىگى رەسمي تۇردە تابىستالدى، دەپ حابارلايدى قازاقپارات ءتىلشىسى.

كوميسسيا مۇشەسى باقىت مەلدەشوۆتىڭ ايتۋىنشا، وسى ۋاقىتقا دەيىن كانديداتتىڭ بارلىق قۇجاتتارى تاپسىرىلدى. لينگۆيستيكالىق كوميسسيا ونىڭ مەملەكەتتىك ءتىلدى ەركىن مەڭگەرگەنىن راستادى. ال ورتالىق سايلاۋ كوميسسياسى ونى زاڭنىڭ بارلىق تالاپتارىنا سايكەس دەپ تانىپ، كانديداتقا قاجەتتى قول قويۋ پاراقتارىن بەرگەن بولاتىن.

«پرەزيدەنتتىككە كانديدات جامبىل اۋجان ۇلى احمەتبەكوۆتى قولداپ قازاقستاننىڭ 16 وڭىرىنەن  138294 ازاماتتىڭ قولى جينالدى. سونىڭ ىشىندە  135506 قول راستالدى. ال ورتالىق سايلاۋ كوميسسياسىنىڭ قاۋلىسى بويىنشا كانديداتتى قولدايتىن قولداردىڭ قاجەتتى سانى كەمىندە  118140 بولۋى شارت»، - دەدى ب. مەلدەشوۆ.

ورتالىق سايلاۋ كوميسسياسىنىڭ قاۋلىسىنا سايكەس، جامبىل احمەتبەكوۆ 2019 -جىلعى 9 - ماۋسىمعا تاعايىندالعان ق ر پرەزيدەنتىنىڭ كەزەكتەن تىس سايلاۋىنا كانديدات رەتىندە تىركەلدى.

اۆتور: ارمان اسقاروۆ