قازاقستان پرەزيدەنتى: سىبايلاس جەمقورلىقپەن كۇرەس جالعاسۋدا
«وكىنىشكە قاراي، سىبايلاس جەمقورلىق ءالى دە ءبىزدىڭ قوعامنىڭ اۋىر دەرتى بولىپ وتىر. سىبايلاس جەمقورلىق مەملەكەتتەردىڭ كوپشىلىگىندە بار. قازاقستان دا ودان سىرت قالعان جوق. ونىمەن قالاي كۇرەسىپ جاتىر نەمەسە قالاي اشكەرەلەپ وتىر - ول باسقا ماسەلە.
ءبىزدىڭ ەلىمىزگە كەلەر بولساق، سىبايلاس جەمقورلىقپەن كۇرەس جالعاسۋدا جانە كەڭ قانات جايىپ كەلەدى. جاقىندا ءتيىستى ۆەدومستۆونىڭ باسشىسىن قابىلدادىم. وسىعان بايلانىستى جۇمىستاردى جالعاستىرۋ جونىندە تاپسىرما بەردىم. جالپى ساندىق جانە ساپالىق تۇرعىدان العاندا جازالاۋ جونىنەن قازاقستان الەمدە كوش باسىندا تۇرعان ەلدەردىڭ ءبىرى. بايقاساڭىزدار، مەملەكەتتىك قىزمەت جۇيەسىندە جوعارى لاۋازىمدى ادامدار جاۋاپقا تارتىلعان. ولاردىڭ اراسىندا پرەمەر-مينيستر، ءبىرقاتار مينيسترلەر، ۆەدومستۆو باسشىلارى جانە باسقالار بار. باسقا قاي ەلدە مۇنداي جاعداي بولدى؟ ايتۋ قيىن. مەن ءوز تاراپىمنان وسى جۇيەلى ماسەلەنى شەشۋ ءۇشىن بارىنشا كۇش-جىگەرىمدى جۇمسايمىن دەپ سەنىمدى تۇردە ايتامىن»، - دەدى قاسىم-جومارت توقايەۆ.