قازاقستاندا پرەزيدەنتتىككە تۇڭعىش ايەل كانديدات تىركەلدى
وندا 2019 -جىلعى 9 -ماۋسىمدا وتەتىن ق ر پرەزيدەنتىنىڭ كەزەكتەن تىس سايلاۋىنا دانيا ەسپايەۆانى قازاقستان رەسپۋبليكاسى پرەزيدەنتتىگىنە كانديدات رەتىندە تىركەۋ تۋرالى قاۋلى قابىلداندى، دەپ حابارلايدى قازاقپارات ءتىلشىسى.
اتالعان قاۋلى جوباسىن تانىستىرعان ق ر ورتالىق سايلاۋ كوميسسياسىنىڭ مۇشەسى زاۋرەش بايمولدينانىڭ ايتۋىنشا، پرەزيدەنتتىككە كانديدات دانيا ەسپايەۆا ەلىمىزدىڭ 17 وڭىرىنەن ءوزىن قولداعان144 098 ادامنىڭ قولىن جيناعان. تەكسەرۋ ناتيجەسىندە 139541 راستالعان قول انىقتالعان. سونىمەن قاتار، ول كانديدات رەتىندە تىركەلۋ ءۇشىن ورتالىق سايلاۋ كومسسياسىنا ءوزىنىڭ كىرىستەرى مەن مۇلكى جونىندە دەكلاراتسيا، تىركەۋگە كەدەرگى كەلتىرەتىن اۋرۋلاردىڭ جوقتىعى تۋرالى مەديتسينالىق قورىتىندى تاپسىرعان. وسىعان وراي و س ك قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىندا دانيا ەسپايەۆانى قازاقستان رەسپۋبليكاسى پرەزيدەنتتىگىنە كانديدات رەتىندە تىركەۋ تۋرالى قاۋلى قابىلدادى.
«2019 -جىلعى 9 -ماۋسىمعا تاعايىندالعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىندا دانيا ەسپايەۆا قازاقستان رەسپۋبليكاسى پرەزيدەنتتىگىنە كانديدات رەتىندە تىركەلسىن؛ پرەزيدەنتتىككە كانديدات دانيا ەسپايەۆاعا ءتيىستى كۋالىك بەرىلسىن؛ پرەزيدەنتتىككە كانديدات دانيا ەسپايەۆانىڭ «حالىقتىق جيناق بانكى» اكسيونەرلىك قوعامىنا ارنايى ۋاقىتشا شوت اشۋ ءۇشىن تىركەلۋى تۋرالى مالىمەتتەر بەرىلسىن؛ بۇقارالىق اقپارات قۇرالدارىندا قازاقستان رەسپۋبليكاسى پرەزيدەنتتىگىنە كانديدات دانيا ەسپايەۆانىڭ تىركەلگەنى تۋرالى حابارلاما جاريالانسىن»، - دەدى ول جاريا ەتكەن و س ك قاۋلىسىندا.
ق ر ورتالىق سايلاۋ كوميسسياسىنىڭ مۇشەلەرى قاۋلى جوباسىنا داۋىس بەرىپ، ول ءبىراۋىزدان قابىلداندى. وسىدان كەيىن ق ر و س ك ءتوراعاسى بەرىك يماشيەۆ پرەزيدەنتتىككە كانديدات دانيا ەسپايەۆاعا ءتيىستى كۋالىكتى تابىس ەتتى.
ايتا كەتەيىك، 27 -ساۋىردە ق ر ورتالىق سايلاۋ كوميسسياسى ق ر پرەزيدەنتتىگىنە كانديدات دانيا ەسپايەۆانىڭ ق ر كونستيتۋتسياسى جانە «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنىڭ تالاپتارىنا سايكەستىگىن انىقتاۋ تۋرالى قاۋلى قابىلداعان ەدى.