قازىر «قوقىس جاشىگىنە» سۇرانىپ تۇرعان ءان كوپ
ەركەلەتكەندى يت تە سەزەدى عوي.
«توي - حالىقتىڭ قازىناسى» دەپ ءبىز ءجۇرمىز، «قازاقتىڭ تويى بىتپەسىن» دەپ ولار ءجۇر. ارينە، تالعامعا تالاس جوق. كىم قاي ءاندى تىڭدايدى نەمەسە شىرقايدى ءوزى بىلەدى. ءبىراق «ءوزى بىلەدى»، «ءوزىم بىلەمىن» دەگەندەردىڭ ءبارى جاقسىلىققا باستاماسا كەرەك. ءارى ول تالعامسىز تىڭدارماننىڭ ويى. ايتپەسە ەسىرگەن ەسترادا كىمگە، قانداي ءتالىم بەرمەك؟
مەنىڭ تۇسىنىگىمدە كەز كەلگەن شىعارما، ولەڭ نە ءاننىڭ ماقساتى، ءۋاجى بولۋى ءتيىس. ول ادامدى ىزگىلىككە باستاۋى شارت. كورشىلەس ورىس حالقىندا «ءار زاماننىڭ ءانى بار» دەگەن ماتەل بار. راس. بۇعان قارسىلىق تانىتا المايمىز. يت ۇرەدى، كەرۋەن كوشەدى. ياعني، ەسكى ولەدى، جاڭا كەلەدى. دەسە دە، ءسوز قۇدىرەتىن ۇعىناتىن، سوزگە توقتاعان حالىقپىز. ءقازىر شە؟ قازىر قانداي ءان تىڭداپ ءجۇرمىز؟ كوبىنە ءمان- ماعىناسى جوق، تۇسىنىكسىز، قايتالاما، جارگون ءسوزدى اندەر. سوندا اقىندار الجاسقان با، انشىلەر اپەندى مە، تىڭدارمان تالعامسىز با؟ اقىسىن بەرسە، نە بولسا سونى باسا بەرەتىن دىبىس جازۋ ستۋديالارىن كىنالاعان ءجون بە، الدە ەفيرگە بىرەۋدىڭ قاڭسىعىن تاڭسىق ەتىپ وتكىزە بەرەتىن باسشىلاردى ما؟
بۇدان 1-2 جىل بۇرىن سوزدەرى تۇسىنىكسىز اندەردىڭ داۋرەنى ءجۇرىپ تۇردى. قارا ءسوزدىڭ قادىر-قاسيەتىن ۇعىناتىندار قانشا تىرىسقانىمەن، الگىلەردى تۇپكىلىكتى جويىپ جىبەرە المادى. جەلپىگەن سايىن قىزۋى كۇشەيەتىن شوق سەكىلدى جەلپىنگەن ءانشىسىماقتار ەل-ەلدى ارالاپ كونسەرت قويىپ، تويداعى اعايىندى «توناۋىن» ءبىر تىيمادى. جەلى ارقىلى تانىلىپ ۇلگەرگەندەر تامىلجىتىپ ءان سالماسا دا، ءانشى اتانىپ ۇلگەردى. قىزعانباس ەدىك، ەگەر ءسوزى سۇلۋ، تىركەسى تاستاي، ۇيقاسى ۇعىنىقتى بولسا.
رەسپۋبليكالىق ايتىستىڭ بىرىندە كەرەكۋلىك اقىن اسپانبەك شۇعاتايەۆپەن ءسوز قاعىستىرعان تۇركىستاندىق اقىن ەركەبۇلان قاينازاروۆ:
...قازىرگى ءان دەپ جۇرگەنىڭ،
ءىبىلىستىڭ داۋسىنداي،
ىڭىرسىپ شىققان ىڭىردە.
امىرەنىڭ ءانى جوق،
ماعىناسى، ءمانى جوق،
ساقاۋ بوپ ءوسىپ كەلەمىز،
سايلاۋبەكتەردىڭ تىلىندە، - دەپ ءبىر قايىرعان ەدى.
«اندا جوق، مىندا جوق»، «بازار جوق»، «چيپ- چيپ- چيپ»، «زىڭ-زىڭ-زىڭ» دەپ الاقانىڭىزدى اسپانعا قاراتىپ، ءدال وسىلاي بارماعىڭىزدى كەزەك-كەزەك بۇگە بەرۋگە تۋرا كەلەدى. قىسقاسى، قازىرگى ءاننىڭ سىيقى - وسى. نەگە مۇنداي اندەر (ەگەر ءان دەۋگە كەلسە) ەل ەسىندە تەز جاتتالىپ، حيتقا اينالادى؟ ءدال وسى ءبىر ساۋالدى بىرنەشە كىسىگە قويىپ ەدىم. كوبىسىنىڭ پىكىرى «تىڭدارماننان تالعام جوعالدى» دەگەنگە سايادى. ويتكەنى بىزدىكىلەر ءسوزىن تۇسىنبەسە دە، شەتەلدىڭ ءانىن تىڭداي بەرەدى. ال، قازاق اندەرىنىڭ مۋزىكاسى كەلىسىپ، كوتەرىڭكى بولسا، تىڭداۋعا جارايدى. ياعني، جۇرتشىلىقتا وزگەگە ەرۋ ەسەلەنىپ، وزىنشە وي قورىتۋ ازايىپ بارادى.
جاقىندا عانا قوعامدىق كولىكتەردىڭ بىرىندە «باقىتتى بولعىڭ كەلسە، باقىتسىز بولما جانىم» دەپ كەلەتىن ءبىر ءاننىڭ ءسوزىن ەستىدىم. بۇل «جازعىڭ كەلسە جاز، جازعىڭ كەلمەسە جازبايمىن دەمە» دەگەن سياقتى. قالاي دەسەك تە ماعىناسىز اندەردىڭ ايى وڭىنان تۋىپ تۇرعانى راس. شاكارىم ءوز ولەڭىندە «بۇل ءان بۇرىنعى اننەن وزگەرەك» دەپ جىرلاعان بولاتىن. ءبىراق ول كەزدە ءبىرسارىنداعى جىلاڭقى اندەر جوق ەدى عوي...