رجەۆ قالاسىنىڭ تۇبىنەن قازاق سولداتىنىڭ سۇيەگى تابىلدى

نۇر-سۇلتان. قازاقپارات - ەكىنشى دۇنيەجۇزىلىك سوعىس كەزىندە تالاي شايقاستى باستان وتكەرگەن رجەۆ جەرىنەن قازاق سولداتىنىڭ سۇيەگى تابىلدى، دەپ حابارلايدى قازاقپاراتتىڭ ماسكەۋدەگى مەنشىكتى ءتىلشىسى.

قالدىقتىڭ قازاق ساربازىنا تيەسىلى ەكەنىن «پيونەر» ىزدەۋ توبى انىقتاعان. «رجەۆ-2019» دەگەن اتپەن وتكەن ىزدەۋ شارالارى كەزىندە ۇزىن سانى 117 سولداتتىڭ قابىرى تابىلىپتى. ىزدەۋ جاساعىنىڭ كومانديرى ميحايل بوگدانوۆتىڭ ايتۋىنشا، ولاردىڭ ءبارى 1942 -جىلدىڭ تامىزىندا رجەۆ اۋدانىنىڭ بەلكوۆ ويپاتىندا بولعان قاندى شايقاس كەزىندە جەر جاستانعان.

 

«ەكى اپتانىڭ ىشىندە كەڭەس اسكەرى ساپىنان 3500 ادام جەر قۇشقان دەگەن دەرەك بار. اراسىندا قازاق جاۋىنگەرلەرى وتە كوپ بولعان ەكەن. 1 -مامىر كۇنى بەلۆو ويپاتىنداعى شۇڭقىردان ءۇش اسكەردىڭ ءمايىتى شىقتى. سونىڭ ىشىندە ۆينتوۆكا گيلزاسىنان قولمەن جاسالعان مەدالون تابىلدى. گيلزانىڭ ىشىنە حات بۇكتەپ سالىپتى. شۇڭقىرداعى ءۇش ءمايىتتىڭ ءبىرى - 220 اتقىشتار ديۆيزياسىندا سوعىسقان 19 جاستاعى قازاق ساربازىنا تيەسىلى ەكەنىن سول حاتتان بىلدىك. ساربازدىڭ اتى-ءجونى مەن تۋعان جىلى، مەكەنجايى انىق وقىلىپ تۇر» - دەيدى ميحايل بوگدانوۆ.

 

تابىلعان جازبادان ءىزجانوۆ نۇرعازى ەسىمدى ساربازدىڭ 1923 -جىلى تۋعانىن، مايدانعا قوستاناي وبلىسىنىڭ تورعاي اۋدانىنا قاراستى ساعاي اۋىلدىق كەڭەسىنىڭ اراي كولحوزىنان اتتانعانىن وقۋعا بولادى.

 

«مارقۇمنىڭ قازاقستانداعى تۋىستارىن ىزدەستىرىپ جاتىرمىز. تاپساق، تابىلعان مايىتتەردى ارۋلاپ كومۋ راسىمىنە شاقىرامىز. سالتاناتتى ءراسىم رجەۆ قالاسىندا 22 -ماۋسىمدا وتەدى. ەگەر سۇيەك جالعىز جاتقان بولسا، تۋعان وتانىنا جەرلەۋگە بولار ەدى. ءبىر شۇڭقىردان ءۇش ساربازدىڭ سۇيەگى بىردەي تابىلعاندىقتان، ونى بولە جارىپ، ايقىنداۋ قيىن. سوندىقتان ۇشەۋى دە رجەۆ تۇبىندە جەرلەنەدى» - دەيدى ىزدەستىرۋشى توپتىڭ جەتەكشىسى.

 

تاريحي قۇجاتتاردا اتالمىش شايقاسقا قازاقستاندا قۇرىلعان №100 جانە №101 ۇلتتىق اتقىشتار بريگاداسى قاتىسقانى كورسەتىلگەن. شايقاس كەزىندە قازاقستاندىق ساربازداردىڭ 80 پايىزى وققا ۇشقان دەگەن دەرەك بار.

 

اۆتور: مەدەت احمەتوۆ