ەڭبەك دەمالىسىنىڭ ازدىعى ادام ومىرىنە قاۋىپتى - عالىمدار
17:58, 03 - مامىر 2019
نۇر - سۇلتان. قازاقپارات - حەلسينكي ۋنيۆەرسيتەتىنىڭ كارديولوگ عالىمدارى زەرتتەۋ جۇرگىزىپ، از ۋاقىتتىق ەڭبەك دەمالىسى جۇرەك جانە قان تامىرلار اۋرۋلارىنان كوز جۇمۋ قاتەرىن ارتتىرىپ، ءومىر ۇزاقتىعىنا اسەر ەتەدى دەگەن شەشىمگە كەلدى.
بۇل تۋرالى MedikForum باسىلىمى حابارلايدى.
«ادام جىلىنا كەمىندە 4 اپتا ەڭبەك دەمالىسىندا بولۋى كەرەك» ، - دەيدى عالىمدار.
زەرتتەۋگە 40 جاستان اسقان 1222 ەر ادام قاتىسقان. ولاردىڭ قاتارىندا ارتىق سالماقتان زارداپ شەگەتىندەر، زياندى ادەتتەرگە ۇيىرلەرى دە بار.
قاتىسۋشىلاردىڭ ءاربىرى جۇرەك- قان تامىرلار اۋرۋلارى بويىنشا قاتەرلى توپقا كىرەدى ەكەن.
ناتيجەسىندە عالىمدار ادام ءومىرىنىڭ ۇزاقتىعى ونىڭ ەڭبەك دەمالىسىنىڭ ۇزاقتىعىمەن بايلانىستى دەگەن تۇجىرىم جاسادى. سەبەبى كوپ جاعدايدا سالاۋاتتى ءومىر سالتىن ۇستاناتىن ادامداردىڭ ءوزى جەتكىلىكتى تۇردە دەمالاتىنداردان ەرتە قايتىس بولعان.