ماۋلەن اشىمبايەۆ نۇر- سۇلتان مەن الماتى قالالارىنداعى زاڭسىز شەرۋلەرگە پىكىر ءبىلدىردى
«نۇر- سۇلتان، الماتى جانە وزگە دە ءبىرقاتار قالادا وتكەن شەرۋلەردەگى جاعداي بىركەلكى. ءبىزدىڭ ازاماتتارىمىزدىڭ پىكىر ايتۋ، جينالۋ قۇقىعى بار. ءبىراق، مۇنىڭ بارلىعى دا ەلىمىزدىڭ زاڭناماسىنا سايكەس ورىن الۋى ءتيىس. ەگەر مۇنداي جايت بولماسا، ءبىز زاڭدا ۇستانباساق، بەلگىلەنگەن ەرەجەلەرگە بويسۇنباساق، وندا مۇنىڭ بۇكىل قوعام ءۇشىن تەرىس سالدارى بولادى»، - دەدى ماۋلەن اشىمبايەۆ و س ك- دەگى بريفينگ بارىسىندا ب ا ق وكىلدەرىنىڭ ساۋالىنا وراي.
سونىمەن قاتار ول الماتىداعى مارافون بارىسىنداعى اكسياعا قاتىستى دا پىكىرىن ءبىلدىردى.
«الماتىداعى مارافون بارىسىندا بىرنەشە جاستىڭ جۇزەگە اسىرعان اكسياسىنا قاتىستى ماسەلەنىڭ ەكى جاعى بار ەكەندىگىن اتاپ وتكىم كەلەدى. مازمۇندىق جانە وتكىزۋ جاعى بار. مازمۇندىق جاعىنان كەلەر بولساق، جاستار ەلىمىزدىڭ زاڭناماسىنا، حالىقارالىق نورمالارعا سايكەس اشىق، ءادىل سايلاۋ وتكىزۋدى جاقتايتىن بولسا، وندا بۇل ءبىزدىڭ پارتيامىزدىڭ جاقتاپ وتىرعان ۇستانىمى»، - دەدى ول.
ماۋلەن اشىمبايەۆ پرەزيدەنتتىڭ بۇل سايلاۋدى اشىق، ءادىل جانە ەلىمىزدىڭ زاڭناماسىنا ساي وتكىزۋ تۋرالى تاپسىرماسى بار ەكەندىگىن ەسكە سالدى.
«سول سەبەپتى مازمۇندىق جاعىنان كەلەر بولساق، سايلاۋدىڭ ءادىل وتۋىنە قارسى بولاتىن ادامدار جوق دەۋگە بولادى. ادامداردىڭ قاتىسۋىمەن، كوپتەگەن قالا تۇرعىندارىنىڭ قاتىسۋىمەن ءوتىپ جاتقان وزگە شارا بارىسىندا جاسالعان مۇنداي ارەكەتتەر، تاعى دا قايتالاپ ايتامىن، قازاقستان زاڭىنا سايكەس جۇزەگە اسىرىلۋى ءتيىس. ەگەر ءبىز ونى ۇستانباساق، وندا بۇل دەسترۋكتيۆتى تەندەنتسيانىڭ كۇشەيۋىنە الىپ كەلەدى. ەلدەگى بەلگىلى ءبىر تەرىس تەندەنتسيا كۇشەيە تۇسەدى. ال بۇل ەشكىمگە قاجەت ەمەس»، - دەدى ماۋلەن اشىمبايەۆ.
اۆتور: مارلان جيەمباي