پرەزيدەنتتىككە ۇمىتكەر جۇماتاي اليەۆ مەملەكەتتىك ءتىلدى ەركىن مەڭگەرمەگەن - لينگۆيستيكالىق كوميسسيا
«بۇگىن «حالىق دەموگرافياسى» قوعامدىق بىرلەستىگىنەن پرەزيدەنتتىككە ۇمىتكەر رەتىندە ۇسىنىلعان جۇماتاي اليەۆ ەمتيحانعا بەرىلگەن ۋاقىتىن تولىق پايدالاندى. كوميسسيا بارلىق كەزەڭدەردى جان- جاقتى تالقىلادى»، - دەدى ۇمىتكەردىڭ ەمتيحان ناتيجەسىن جاريا ەتكەن لينگۆيستيكالىق كوميسسيا مۇشەسى ءادىل احمەتوۆ.
ونىڭ ايتۋىنشا، ۇمىتكەر ءبىرىنشى كەزەڭدە «مەملەكەت جانە ءدىن» دەگەن تاقىرىبىندا شىعارما جازعان.
«تاقىرىپ مۇلدەم اشىلماعان، سويلەمدەرىنىڭ بارلىعى جۇيەسىز. ءدىن ماسەلەسى دە مۇلدەم اشىلمادى دەۋگە بولادى، ءۇستىرت. ەكىنشى كەزەڭدە مۇحتار اۋەزوۆتىڭ «اباي جولى» رومانىنىڭ 2-تومىنان ءۇزىندى وقىدى. م. اۋەزوۆتىڭ ءسوزى «قىزدىڭ جيعان جۇگىندەي» عوي. ءماتىننىڭ ءوز «اۋەزى بار. بۇل جەردە دە ءوزىنىڭ شورقاقتىعىن بايقاتتى. ءۇشىنشى كەزەڭدە «ىرىس الدى - ىنتىماق» تاقىرىبىندا بايانداما جاسادى. «ىرىس الدى - ىنتىماق» تاقىرىبى مۇلدەم اشىلمادى. تاعى دا ءۇستىرت بولدى. ساۋاتسىز بولدى. ماسەلەن، ءبىرىنشى كەزەڭدەگى شىعارمادا باس- اياعى 13 سويلەمدە 19 قاتە. وزدەرىڭىزگە بەلگىلى 8 دەن اسسا ول شىعارما تەرىس باعالانادى. سوندىقتان پرەزيدەنتتىككە ۇمىتكەر جۇماتاي اليەۆ مەملەكەتتىك ءتىلدى ەركىن مەڭگەرمەگەن دەگەن كوميسسيا قورىتىندىسى شىقتى»، - دەدى ول.
سوندىقتان ق ر و س ك جۇماتاي اليەۆتى ق ر پرەزيدەنتتىگىنە كانديدات رەتىندە تىركەۋدەن باس تارتتى.
جۇماتاي اليەۆتىڭ مەملەكەتتىك ءتىلدى ەركىن مەڭگەرمەگەنى تۋرالى ەمتيحان ناتيجەسىن ەسكەرە وتىرىپ، كونستيتۋتسيا مەن سايلاۋ تۋرالى كونستيتۋتسيالىق زاڭدا پرەزيدەنتتىككە كانديداتقا قويىلاتىن تالاپتارعا سايكەس ەمەستىگى تۋرالى حاتتاما جوباسى دايىندالعان. حاتتاما جوباسىندا پرەزيدەنتتىكە كانديدات جۇماتاي الييەۆتىڭ كونستيتۋتسيانىڭ 41-بابى 2-تارماعىنا، «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 54-بابىنىڭ مەملەكەتتىك ءتىلدى ەركىن مەڭگەرۋ بولىگىندە بەلگىلەنگەن تالاپتارعا سايكەس ەمەس ەكەندىگى كوزدەلگەن.
اۆتور: مارلان جيەمباي