سەمەي اكىمىنىڭ رەزيدەنسياسى ساتىلادى

سەمەي. قازاقپارات - «سەمەي قالاسى اكىمىنىڭ اپپاراتىنا» تيەسىلى قالا سىرتىنداعى كەڭ سارايداي ءۇش كوتتەدج كۋرورتىمەن، ءۇش تۇرعىن ۇيىمەن ساۋداعا قويىلدى. بۇل تۋرالى قالا اكىمى ەرماك ءسالىموۆ جۋرناليستەرمەن وتكەن كەزدەسۋدە مالىمدەدى، دەپ حابارلايدى قازاقپارات.

قالا سىرتىنداعى رەزيدەنتسيا 158 ميلليون تەڭگەگە باعالانىپ وتىر. ازىرگە قىزىعۋشىلىق تانىتقاندار كوپ بولعانىمەن، ساتىپ الۋشى تابىلمادى. جۋرناليستەرمەن وتكەن جيىندا قالا اكىمى ەرماك ءسالىموۆ سەمەي قالاسى اكىمىنىڭ اپپاراتىنا تيەسىلى نىساننىڭ نە ءۇشىن ساتىلىمعا شىعارىلعانىن ءتۇسىندىردى. ونىڭ ايتۋىنشا، بۇگىنگى كۇنى رەزيدەنسيا قاڭىراپ بوس تۇر. سوندىقتان ساتۋ تۋرالى شەشىم قابىلدانعان.

«مەن بۇل رەزيدەنسيادا تۇردىم. الايدا قىس مەزگىلىندە ەكى رەت وكپەمە سۋىق ءتيىپ، اۋىرىپ قالدىم. ايەلىم دە اۋىردى. قازىر قالادا تۇرامىن. وندا اكىم جانە اكىمنىڭ ورىنباسارى دا تۇردى. بۇل ءۇشىن ءبىراز قاراجات جۇمسالدى. بۇگىندە بوس تۇر. وسى ۋاقىت ارالىعىندا ءتۇرلى ۇسىنىستار كەلدى. سوندىقتان ءبىز رەزيدەنسيانى ساتۋ تۋرالى شەشىم شىعاردىق»، - دەدى قالا باسشىسى.

رەزيدەنسيانى ساتۋ- ساتىپ الۋ كەلىسىمشارتىنىڭ تالابىنا سايكەس، ساتىپ الۋشى تەك ءوزىنىڭ وتباسىنا، تۋعان- تۋىس، دوستارىنا عانا ەمەس، قالا قوناقتارى مەن تۇرعىندارى ءۇشىن قىزمەت كورسەتۋگە مىندەتتەلەدى. سونىمەن قاتار، بازا اۋماعىن اباتتاندىرۋى كەرەك.

«ءبىز بازانى كەز كەلگەننىڭ قولىنا بەرمەيمىز. بايقاۋ جاريالاندى. ساتۋعا قويىلعان سوما از قاراجات ەمەس. رەزيدەنسيانىڭ ورنالاسقان جەرى وتە ىڭعايلى. قىزىعۋشىلىق تانىتىپ جاتقاندار كوپ، ءبىراق ناقتى ساتىپ الۋشى ءالى تابىلعان جوق»، - دەدى ەرماك ءسالىموۆ.

فوتو: gosreestr.kz

اۆتور: باعىم عالىمبەك قىزى