قاسىم-جومارت توقايەۆ «بيزنەسكە ارنالعان ۇكىمەت» جوباسىمەن تانىستى
«اتامەكەن» ۇ ك پ باسقارما ءتوراعاسى ابىلاي مىرزاحمەتوۆ ق ر پرەزيدەنتىنە وبلىستىق كاسىپكەرلەر پالاتاسى بازاسىندا قۇرىلعان «بيزنەسكە ارنالعان ۇكىمەت» جوباسىن تانىستىردى. جوبا ماقساتى - «ءبىر تەرەزە» قاعيداتى بويىنشا بيزنەستى قولداۋ مەن دامىتۋدىڭ بارلىق شارالارىن ءبىر ورتالىقتان كورسەتۋ.
«بيزنەسكە ارنالعان ۇكىمەتتە» كاسىپكەرلەرگە قاجەتتى كەڭەستەر بەرىلىپ، جوبالارىنا سۇيەمەلدەۋ كورسەتىلەدى. باستىسى - ءبارى ايقىن، اشىق جانە قولجەتىمدى. پالاتا، مەملەكەتتىك ورگاندار، قارجى ۇيىمدارىنىڭ وكىلدەرى كەڭ كولەمدى قىزمەت تۇرلەرىن ۇسىنادى. بيزنەس وكىلدەرى مەملەكەتتىك ورگانداردىڭ تابالدىرىعىن توزدىرمايتىن بولادى. قىزمەتتەردى ونلاين رەجيمدە دە الۋعا بولادى»، - دەدى «اتامەكەن» ۇ ك پ باسقارما ءتوراعاسى ابىلاي مىرزاحمەتوۆ.
«بيزنەسكە ارنالعان ۇكىمەتتە» قىزمەت كورسەتۋدىڭ مامانداندىرىلعان 5-ايماعى جۇمىس ىستەيدى.
«وتكىزۋ» ايماعىندا بيزنەسكە ارنالعان ماركەتينگ، بۋحگالتەر قىزمەتى، مەملەكەتتىك ساتىپ الۋ بويىنشا كەڭەستەر، CT KZ سەرتيفيكاتىن بەرۋ، سونداي-اق، «قاز ترانس گاز ايماق» ا ق، «تاتەك» ا ق، «جەتىسۋ سۋ قۇبىرى» ش ج ق م ك ك، «تالدىقورعان جىلۋ سەرۆيس» ق م ك ك تاراپىنان قىزمەتتەر كورسەتىلەدى.
«قارجىلاندىرۋ» ايماعىندا «اگرارلىق نەسيە كورپوراتسياسى» ا ق، «اۋىل شارۋاشىلىعىن قارجىلاي قولداۋ قورى» ا ق، «دامۋ» كاسىپكەرلىكتى قولداۋ قورى» ا ق، «قازاقستان حالىق بانكى» ا ق جانە «جەتىسۋ» ا ك ك و د ي» ا ق سياقتى قارجى ۇيىمدارى مەن دامۋ ينستيتۋتتارىنىڭ قىزمەتتەرى ۇسىنىلعان.
«قۇقىقتىق سۇيەمەلدەۋ» ايماعىندا كاسىپكەرلەردىڭ قۇقىعىن جانە زاڭدى مۇددەلەرىن قورعاۋ قىزمەتى، داۋلاردى سوتقا دەيىن رەتتەۋ ۇسىنىلادى. سونىمەن قاتار، ادىلەت دەپارتامەنتى، مەملەكەتتىك كىرىستەر باسقارماسى، مەملەكەتتىك ساۋلەت-قۇرىلىس باقىلاۋ باسقارماسى، جەر قاتىناستارى باسقارماسىنىڭ وكىلدەرى كاسىپكەرلەرگە كەڭەس بەرەدى.
«وقىتۋ» ايماعىندا ءوڭىر تۇرعىندارى مەن كاسىپكەرلىك ىنتاسى بار ازاماتتار قىسقا مەرزىمدى وقىتۋعا، «بيزنەس مەكتەپ» پەن «باستاۋ بيزنەس» جوبالارى اياسىندا كاسىپكەرلىك نەگىزدەرىنىڭ كۋرسىنا جازىلا الادى. جۇمىسپەن قامتۋ ورتالىعىنىڭ دا قىزمەتى كورسەتىلەدى.
«سيفرلىق قىزمەت كورسەتۋ» ايماعىندا كاسىپكەرلەر ونلاين رەجيمىندە مەملەكەتتىك قىزمەتتەرى مەن «Atameken Services» پورتالى ارقىلى قاجەتتى بيزنەس-قىزمەت تۇرلەرىن قولدانا الادى.
كاسىپكەرلەر پالاتاسىنىڭ ديرەكتورى ناريمان ءابىلشايىقوۆ ايماقتىق «اتامەكەننىڭ» كاسىپكەرلەر قۇقىعىن قورعاۋ، قارجىلاي ەمەس قولداۋ، نەسيەلەندىرۋ مەن ادامي كاپيتالدى دامىتۋ باعىتتارى اياسىنداعى جۇمىس ناتيجەسى تۋرالى ايتىپ بەردى. پالاتا عيماراتى ىسكەرلىك فورۋمدار، ۆ2ۆ كەزدەسۋلەر مەن كورمەلەر وتكىزەتىن بىرەگەي الاڭ سانالادى. وسىندا حالىقارالىق، رەسپۋبليكالىق جانە وڭىرلىك دەڭگەيدەگى 18 شارا ۇيىمداستىرىلىپ، وعان 12500 كاسىپكەر قاتىستى.
«باستاۋ بيزنەس» وقىتۋ جوباسى اۋىل تۇرعىندارىنىڭ باستامالارىنا دەمەۋ بولدى. قازىرگى تاڭدا وقۋ الماتى وبلىسىنىڭ بارلىق اۋداندارى مەن قالالارىندا وتكىزىلىپ جاتىر. وتكەن جىلى ءبىز 3361 ازاماتتى وقىتىپ شىقتىق. ولاردىڭ ىشىندە 955 جوبا قۇنى 2,5 ميلليارد تەڭگەگە قارجىلاندىرىلدى. بيىل 1500 كەم ەمەس ادامدى وقىتۋ مەن 900 گە تارتا بيزنەس-جوبالاردى قارجىلاندىرۋ جوسپارلانعان»، - دەدى وبلىستىق كاسىپكەرلەر پالاتاسىنىڭ باسشىسى ناريمان ءابىلشايىقوۆ.
بەس جىل ىشىندە كاسىپكەرلەر پالاتاسىنا قۇقىقتىق قولداۋ ماقساتىمەن 2678 ءوتىنىش كەلىپ ءتۇستى (2018 -جىلى 365 شاعىم تىركەلگەن)، 95 اكىمشىلىك كەدەرگى جويىلعان. قولعا الىنعان جۇمىستار ارقاسىندا كاسىپكەرلەر 3,2 ميلليارد تەڭگە ۇنەمدەدى. ەسەپتى كەزەڭدە پالاتانىڭ اۋداندىق جانە قالالىق فيليالدارىندا 102600 كاسىپكەرگە اقىسىز سەرۆيستىك قىزمەتتەر مەن كەڭەستەر بەرىلدى. جۇمىسسىز جۇرگەن جانە كاسىپتى جاڭادان باستاعان 7200 ازامات كاسىپكەرلىك نەگىزدەرىن وقىدى. ونىڭ ىشىندە 5 مىڭنان استامى ءوز بيزنەسىن اشتى.
جۇمىس ساپارى اياسىندا قازاقستان پرەزيدەنتىنە «ALTYN OIMAQ» قازاقستاندىق كيىم ديزاينەرلەرىنىڭ جوباسى تانىستىرىلدى. بايقاۋ تۇجىرىمداماسىن «اتامەكەن» ۇ ك پ باسقارما ءتوراعاسىنىڭ ورىنباسارى ءلاززات رامازانوۆا ايتىپ بەردى. بايقاۋ ماقساتى - وتاندىق ءسان يندۋسترياسىن دامىتۋ مەن ۇلتتىق مادەني داستۇرلەردى ساقتاۋ.
«جوبا جاڭا ەسىمدەر مەن برەندتەردى قولداۋعا، سونداي-اق، وندىرىستىك كاسىپورىنداردى ديزاينەرلەرمەن بىرىكتىرۋگە باعىتتالعان. بايقاۋ باسەكەگە قابىلەتتى برەندتەردى قۇرۋعا دايىن كاسىپقويلاردىڭ جاڭا بۋىنىن انىقتاۋعا مۇمكىندىك بەرەدى. «ALTYN OIMAQ» جاس ديزاينەرلەر ءۇشىن كاسىپقويلار قاۋىمداستىعىنا كىرۋدە التىن كوپىر بولماق. سونىمەن بىرگە، بۇل - تاجىريبەلى ديزاينەرلەرلەرگە جەكە ونىمدەرىن وتكىزۋ مەن بيزنەسىنىڭ اۋقىمىن كەڭەيتۋگە قولداۋ»، - دەپ اتاپ ءوتتى «اتامەكەن» ۇ ك پ باسقارما ءتوراعاسىنىڭ ورىنباسارى ءلاززات رامازانوۆا.
بايقاۋ لاۋرەاتتارى بىرنەشە اتالىم بويىنشا انىقتالادى. ۇمىتكەرلەردى ىرىكتەۋ كەزەڭىنەن سوڭ قوعامدىق ونلاين داۋىس بەرۋ باستالادى. بۇل ءوز كەزەگىندە بايقاۋ جەڭىمپازدارىن انىقتايدى.