قازاقستاندا كوپبالالى وتباسىلارعا پاتەر بەرۋ باستالدى
ق ر تۇڭعىش پرەزيدەنتى - ەلباسى ن. نازاربايەۆتىڭ تاپسىرمالارىن ورىنداۋ اياسىندا قازاقستاندا كوپبالالى وتباسىلارعا باسپانا بەرۋ جۇمىستارى باستالدى. تۇرعىن ءۇي قاتىناستارى ماسەلەلەرى جونىندەگى جاڭا زاڭدى ىسكە اسىرۋدىڭ العاشقى كۇنى ەلوردادا جانە ەلىمىزدىڭ وڭىرلەرىندە 249 وتباسى باسپانالى بولدى.
بيىل 30- ساۋىردە كوپبالالى وتباسىلاردى باسپانامەن قامتاماسىز ەتۋ ماقساتىندا ق ر پارلامەنتى تۇرعىن ءۇي قاتىناستارى ماسەلەلەرى جونىندەگى زاڭدى قابىلدادى. قۇجاتتى ىسكە اسىرۋ ق ر ۇكىمەتىنە اكىمدىكتەرمەن بىرلەسىپ قىسقا مەرزىم ىشىندە ەلىمىزدىڭ بارلىق وڭىرلەرىندەگى كوپ بالالى وتباسىلارعا پاتەر بەرۋدى باستاۋعا مۇمكىندىك بەردى.
پرەزيدەنت اكىمشىلىگىنىڭ، ق ر پارلامەنتى مەن ۇكىمەتىنىڭ ۇيلەسىمدى اتقارعان جۇمىستارىنىڭ ناتيجەسىندە از قامتىلعان وتباسىلاردىڭ تۇرعىن ءۇي جاعدايلارىن جاقسارتۋدىڭ جۇيەلى شارالارى قابىلداندى.
بيىل مامىر ايىندا جالپى ەلىمىزدە 2019-جىلعا جوسپارلانعان 6 مىڭ كوپ بالالى وتباسىنىڭ 1,2 مىڭىن باسپانامەن قامتاماسىز ەتۋ كوزدەلگەن.
بۇگىندە العاشقى 24 پاتەر نۇر-سۇلتان قالاسىندا، 15 ءى شىمكەنت قالاسىندا بەرىلگەن. پاۆلودار وبلىسىنىڭ كوپبالالى وتباسىلارىنا - 76، قاراعاندى وبلىسىندا - 27، اقتوبە وبلىسىندا - 25، الماتى وبلىسىندا - 20، ماڭعىستاۋ وبلىسىندا - 18، جامبىل وبلىسىندا - 17، شىعىس قازاقستان وبلىسىندا - 11، باتىس قازاقستان وبلىسىندا - 10، اقمولا وبلىسىندا - 6 پاتەر بەرىلدى.
15- مامىر كۇنى اتىراۋ وبلىسىنداعى 50 كوپبالالى وتباسىنى تۇرعىن ۇيمەن قامتاماسىز ەتۋ جوسپارلانعان.
جەرگىلىكتى اتقارۋشى ورگانداردىڭ بەرگەن مالىمەتىنە سايكەس، 32 مىڭ كوپ بالالى وتباسى باسپانا الۋعا كەزەكتە تۇر.
كوپ بالالى جانە از قامتىلعان وتباسىلاردى تۇرعىن ۇيمەن قامتاماسىز ەتۋ بويىنشا العا قويىلعان مىندەتتەردىڭ ىسكە اسىرىلۋ بارىسى ق ر ۇكىمەتىنىڭ ەرەكشە باقىلاۋىنا الىنعان.