ادامدى قالاي جۇباتۋ كەرەك؟
ءسىز وعان دەمەۋ ءبىلدىرىپ، جۇباتقىڭىز كەلەدى، ءبىراق قالاي دۇرىس جۇباتارىڭىزدى بىلمەيسىز. قانداي سوزدەر ايتۋ كەرەك، قاندايدى ايتپاۋ كەرەك؟ ادامدى رۋحاني قولداۋ دەگەنىمىز نە؟
قايعى - بۇل قاندايدا ءبىر قازاعا، مىسالى، جاقىن ادامى قايتىس بولعانداعى ادامنىڭ رەاكتسياسى.
ادام قايعىعا دۋشار بولعاندا ۋايىمنىڭ 4 كەزەڭىن باستان كەشىرەدى:
ەسەڭگىرەۋ كەزەڭى. بىرنەشە سەكۋندتان بىرنەشە اپتاعا دەيىن جالعاسادى. بولىپ جاتقان جاعدايلارعا سەنبەۋ، تاس باۋىرلىق، از قيمىلداۋ، تابەتى جوعالۋ، ۇيقىنىڭ بۇزىلۋىن باستان كەشىرەدى.
قايعىرۋ كەزەڭى. التى-جەتى اپتاعا سوزىلادى. زەيىننىڭ تومەندەۋى، ويىن جيناقتاي الماۋى، ەسىن جوعالتۋ، ۇيقىسىزدىقپەن بەينەلەنەدى. سونىمەن قاتار ادامدى ۇرەي باسىپ تۇرادى، وزىمەن- ءوزى بولۋدى ءجيى قالاپ، السىزدىككە دۋشار بولادى. اسقازانى اۋىرىپ، تاماعىنا تاس تۇرىپ قالعانداي سەزىمدە بولۋى مۇمكىن. ەگەر ادام جاقىنىن جوعالتىپ السا، بۇل كەزەڭدە ول قايتىس بولعان ادامدا ءمىنسىز ەتىپ، نەمەسە كەرىسىنشە، وعان دەگەن اشۋ- ىزاسىن، رەنىشىن نەمەسە وكىنىش سەزىمىن باستان كەشىرەدى.
قابىلداۋ كەزەڭى جاقىن ادامىن جوعالتقاننان كەيىن ءبىر جىلدان سوڭ ىسكە اسا باستايدى. ۇيقى مەن تابەتىنىڭ قايتا قالپىنا كەلۋىمەن، قازانى ەسكەرە وتىرىپ، العا جوسپار قۇرۋىمەن بەينەلەنەدى. كەيدە ادام ءبارىبىر قۇلازيدى، ءبىراق ونداي ساتتەر سيرەك بولادى.
قايتا قالپىنا كەلۋ كەزەڭى ءبىر-ءبىر جارىم جىلدان كەيىن باستالادى، قايعى مۇڭعا اينالىپ، ادام قازاعا بايسالدىراق قاراي باستايدى.
ادامدى جۇباتۋ قاجەت پە؟ ارينە. ەگەر جابىرلەنگەن ادامعا كومەك قولىن سوزباسا، بۇل جۇقپالى اۋرۋلارعا، جۇرەك اۋرۋلارىنا، ماسكۇنەمدىككە، قايعىلى جاعدايلارعا، كۇيزەلىسكە اكەلۋى مۇمكىن. رۋحاني كومەك اسا قاجەت، سوندىقتان جاقىن ادامىڭىزدى بارىنشا قولداڭىز. ونىمەن ارالاسىپ، سىرلاسىڭىز. ادام ءسىزدى تىڭدامايتىن سياقتى نەمەسە نازار اۋدارمايتىن سياقتى كورىنسە دە - ۋايىمداماڭىز. ۋاقىت كەلگەندە، ول ريزاشىلىقپەن ءسىزدى ەسكە الاتىن بولادى.
اسا تانىس ەمەس ادامداردى جۇباتۋ قاجەت پە؟ ەگەر بويىڭىزدا ادامدى جۇباتۋعا دەگەن قاجەتتى رۋحاني كۇش پەن كومەكتەسۋگە دەگەن نيەتىڭىز بار بولسا - مىندەتتى تۇردە. ەگەر ادام سىزدەن قاشپاسا، ايقايلاماسا - دەمەك ءبارىن دۇرىس جاساپ جاتىرسىز دەگەن ءسوز.
ەگەر جابىرلەنگەن ادامعا قاجەتتى كومەك كورسەتە الاتىنىڭىزعا سەنىمسىز بولساڭىز، وندا سونداي ادامدى تابىڭىز.
تانىس جانە اسا تانىس ادامداردى جۇباتۋدا ايىرماشىلىق بار ما؟ جوق دەۋگە بولادى. ايىرماشىلىق تەك ءبىر ادامدى جاقسى تانيتىنىڭىزدا، ال ەكىنشى ادامدى ونشا تانىمايتىنىڭىزدا. جانىندا بولىپ، اڭگىمەلەسىڭىز، ورتاق ىسكە كىرىستىرىڭىز. كومەكتى اياماڭىز، ول ەشقاشان ارتىق بولمايدى.
ەڭ قيىن ەكى كەزەڭدە قولداۋ ادىستەرىن قاراستىرىپ كورەيىك.
ەسەڭگىرەۋ كەزەڭى
ءسىزدىڭ ارەكەتىڭىز:
ادامدى جالعىز قالدىرماڭىز.
جابىرلەنۋشىگە جاقىنداڭىز. قولىنان ۇستاۋعا، قولىڭىزدى يىعىنا قويۋعا بولادى، جاقىنىڭىزدى باسىنان سيپاپ، قۇشاقتاڭىز. جابىرلەنۋشىنىڭ رەاكسياسىن باقىلاڭىز. ءسىزدىڭ جاقىنداعانىڭىز وعان جاعا ما، قاعاجىتپاي ما؟ ەگەر ەگەر قاعاجىتسا - زورلاپ جاقىنداماڭىز، ءبىراق كەتپەڭىز دە.
جابىرلەنگەن ادام كوبىرەك دەمالىپ، تاماق ءىشۋدى ۇمىتپاعانىن قاداعالاڭىز.
جابىرلەنۋشىنى اسا قيىن ەمەس ىستەرگە ارالاستىرىڭىز، مىسالى، جەرلەۋ شارالارىن ۇيىمداستىرۋداعى قانداي دا ءبىر جۇمىستارعا.
تىڭداۋشىسى بولىڭىز. ادام وعاش زاتتاردى ايتىپ، قايتالانىپ، تاقىرىپتان اۋىتقىپ، ەموتسيالى اسەرىنە قايتا ورالا بەرۋى مۇمكىن. كەڭەس بەرۋ نەمەسە اقىل ايتۋدان باس تارتىڭىز. مۇقيات تىڭداپ، ناقتىلاپ سۇراپ، ونى تۇسىنەتىنىڭىزدى ءجيى ايتىڭىز. جابىرلەنۋشىگە جاي عانا اۋىرتپالىعى مەن ۋايىمىن اڭگىمەلەۋگە مۇرشا بەرىڭىز - ول بۇدان جەڭىلدەپ قالادى.
ءسىزدىڭ سوزدەرىڭىز:
قازا بولعان ادام جايلى وتكەن شاقتا اڭگىمەلەڭىز.
ەگەر قازا بولعان ادامدى تانيتىن بولساڭىز، ول جايلى جاقسى ەستەلىكتەر ايتىڭىز.
ايتۋعا بولمايتىن سوزدەر:
«بۇل ورنى تولماس قازا»، «ۋاقىت - ەمشى»، «سەن - مىقتىسىڭ، بەكەم بول». بۇل سوزدەر ادامعا قوسىمشا قايعى سىيلاپ، جالعىزدىق سەزىمىن ەسەلەندىرەدى. «ازاپتان ارىلدى»، «وعان وسىلاي جەڭىل»، «تەزىرەك ۇمىت» . مۇنداي سوزدەر جابىرلەنۋشىنىڭ ۋايىم-قايعىعا سالۋى مۇمكىن، ويتكەنى وسىلايشا سەزىمگە بولەنبەۋگە شاقىراتىنداي، جالپى قايعىنى تەزىرەك ۇمىت دەيتىندەي ەستىلەدى.
«سەن ءالى جاسسىڭ، ادەمىسىڭ، ءالى تۇرمىس قۇراسىڭ/بالا تاباسىڭ». مۇنداي سوزدەر ادامنىڭ جۇيكەسىنە ءتيۋى مۇمكىن. ادام وسى شاقتا جاقىنىنان ايرىلىپ وتىر، ول ءالى ودان ايىققان جوق. ال وعان ارمانداۋدى ۇسىنادى.
«جەدەل جاردەم ۋاقىتىندا كەلگەندە...»، «دارىگەرلەر تەزىرەك قيمىلداعاندا...»، «سالعىرتتىق تانىتپاعاندا...». مۇنداي سوزدەر بوس جانە ەشقانداي پايدا اكەلمەيدى. بىرىنشىدەن، جاعداي شارتتى رايعا ساي ەمەس، ەكىنشىدەن، مۇنداي سوزدەر كۇيىنىش سەزىمىن ارتتىرادى