ەلوردادا تاعى ءبىر ەلشىلىك اشىلدى
كەلىسسوز قورىتىندىسى بويىنشا ەكى مينيستر ءبىلىم مەن عىلىم سالاسىندا ءوزارا تۇسىنىستىك تۋرالى مەموراندۋمعا قول قويدى.
«بۇگىن ءبىز وتە تابىستى كەلىسسوز وتكىزدىك. پەيچينوۆيچ- بۋچيچ حانىم ءوزىنىڭ ساپارىن نۇر- سۇلتانداعى حورۆاتيا ەلشىلىگىنىڭ رەسمي اشىلۋىمەن ۇشتاستىردى. بۇل - شەت مەملەكەتتىڭ قازاقستانداعى 70- وكىلدىگى بولدى. ءبىز ونى حورۆاتيانىڭ قازاقستانعا دەگەن ۇلكەن قۇرمەتىنىڭ ايرىقشا كورىنىسى، ەرەكشە قاتىناس پەن دوستىقتىڭ بەلگىسى دەپ بىلەمىز. حورۆاتيا وڭتۇستىك- شىعىس ەۋروپاداعى ماڭىزدى ارىپتەسىمىز سانالادى. ءبىز ەكى جاقتى قارىم- قاتىناستى ودان ارى كۇشەيتۋگە مۇددەلىمىز» ، - دەدى ب. اتامقۇلوۆ.
ءمينيستردىڭ ايتۋىنشا، ءۇش جىلدىڭ ىشىندە ەكى ەلدىڭ ساۋدا- ساتتىعى 8 ەسە ءوسىپ، 350 ميلليون ا ق ش دوللارىن قۇرادى. قازاقستان مەن حورۆاتيا مۇناي- گاز ونەركاسىبى، قۇرىلىس، يننوۆاتسيالار، تاماق ونەركاسىبى، اۋىل شارۋاشىلىعى، فارماتسيەۆتيكا جانە تۋريزم بويىنشا بىرلەسىپ جۇمىس ىستەپ كەلەدى. ال ساۋدا- ەكونوميكالىق بايلانىستاردى كۇشەيتۋ ماقساتىندا بيىل ۇكىمەتارالىق كوميسسيانىڭ ءبىرىنشى وتىرىسىن وتكىزۋگە شەشىم قابىلداندى.
«بۇگىندە قازاقستاندا 20 دان استام حورۆات كومپانياسى جۇمىس ىستەپ جاتىر. ءىرى جوبالاردىڭ ىشىندە نۇر- سۇلتانداعى «زاگرەب» تۇرعىن ءۇي كەشەنى، ەلەكتروندى دەنساۋلىق ءتولقۇجاتىن ەنگىزۋ جانە پروتەز- ورتوپەديالىق ونىمدەردى بىرلەسىپ شىعارۋ سياقتى باستامالار بار» ، - دەپ اتاپ كورسەتتى ب. اتامقۇلوۆ.
حورۆاتيا پرەمەر- ءمينيسترىنىڭ ورىنباسارى دا قازاقستانمەن اراداعى ىنتىماقتاستىق بايلانىستارعا وڭ باعا بەردى. ەكى مەملەكەت حالىقارالىق ۇيىمدار اياسىندا ۇنەمى ءبىر- بىرىنە قولداۋ ءبىلدىرىپ وتىرادى.
«ال ەكونوميكالىق ىنتىماقتاستىق تۋرالى كەلىسىم ۇكىمەتارالىق كوميسسيانىڭ جۇمىسىنا نەگىز بولىپ وتىر. اتالعان قۇرىلىم ەكىجاقتى بايلانىستىڭ قوسىمشا ينستيتۋتسيونالدىق بازاسىن بەرەدى. ءبىز ول بايلانىستى بارلىق سالالار بويىنشا كۇشەيتۋگە مۇددەلىمىز. سونىڭ ارقاسىندا قازاقستان ازاماتتارى ۆيزانى جىلدام الىپ، حورۆاتياعا ساپار جاساي الادى» ، - دەدى ماريا پەيچينوۆيچ- بۋريچ.
وسىدان كەيىن مينيسترلەر حورۆاتيا ەلشىلىگىنىڭ رەسمي اشىلۋىنا قاتىستى.