ءبىر اي بويى تويلاناتىن پوەزيا مەرەكەسى
بيىل بۇل مەرەكە اتاقتى رەپەر تۋپاك شاكۋرعا ارنالىپ وتىر. ونىڭ نەگىزگى اتريبۋتى رەتىندە رەپەر ولەڭدەرىنىڭ تىڭدارمان جاتقا وقيتىن جولدارى جازىلعان كيىم توپتاماسى شىعارىلعان. كاپسۋلالى كوللەكسياعا فۋتبولكالار، حۋديلەر، قارا دجينس كۇرتەلەر ەنگەن. تۋپاكتىڭ پورترەتتەرى دە سالىنعان. ا ق ش- تا رەپەرلەر كوپ. دەسە دە، تۋپاك شاكۋردىڭ ورنى بولەك. ونىڭ سەبەبى دە جوق ەمەس. وسىندان 20 جىل بۇرىن قازا بولسا دا، ونى ولتىرگەن ادام تابىلماي، 1996 -جىلى ورىن العان قىلمىس XX عاسىر جۇمباعىنا اينالعان- دى. پوەزياعا جاقىن ادامدار وسى سىندى قۇپيا دۇنيەلەرگە جاقىن بولاتىن سەبەپتى بۇل رەپەرگە دەگەن قىزىعۋشىلىق تولاستاماي كەلەدى. جاپ جاس جىگىتكە قالانىڭ قاق ورتاسىندا وق اتقاننىڭ كىم ەكەنىن بىلمەي، ىزدەۋ جۇمىسىن جۇرگىزگەندەر قاتارىندا تەك قۇقىق قورعاۋ ۇيىمدارى عانا ەمەس، سونداي- اق كۋميرىنىڭ ولىمىنە سەنبەگەن فاناتتار دا بار. سوڭعى كەزدەرى «تۋپاك ءتىرى، مالايزيادا ءومىر سۇرەدى ەكەن» دەگەن اقپارات ولاردىڭ تىنىشتىعىن الدى.
ءبىر قىزىعى، وسىعان دەيىن Keffe D لاقاپ اتىمەن تانىمال گانگستەر دۋەين كەيت دەۆيس 1996 -جىلى ورىن العان اتاقتى قىلمىستىق ىسكە كىم كىنالى ەكەنىن ايتىپ، رەپەردىڭ باقيلىق بولعانىنا ەش كۇمان كەلتىرمەستەي دالەلدەگەن ەدى. ول اقپاراتتى Netflix كەڭىستىگىندە جارىققا شىققان «شەشىمى تابىلماعان» (Unsolved) دەپ اتالاتىن دەرەكتى فيلمدەر جەلىسىندە جاريالاعان بولاتىن. Keffe D سول كەزدە تۋپاك شاكۋرعا وق اتىلعان ماشينادا وتىرسا دا، وسى كۇنگە دەيىن «كوشە كودەكسىن» بۇزا الماي كەلگەنىن سىلتاۋ قىلدى: «مەن تۋپاكتىڭ ءولىمى تۋرالى بار اقيقاتتى بىلەتىن جالعىز اداممىن. قالعانى ولگەن. وسى كۇنگە دەيىن ماعان شىندىقتى ايتقىزباي كەلدى. ماعان كەرەگى ادىلەتتىلىك»، - دەدى Keffe D.
سونىمەن، تۋپاكتى وسى دەۆيستىڭ جيەنى ورلاندو Baby Lane اندەرسون ولتىرگەن دەگەن اقپاراتقا بارشا الەم سەنگەن بولاتىن. رەپەرگە وق اتپاستان بىرنەشە ساعات بۇرىن ورلاندو شاكۋردان Death Row Records بانداسىنىڭ بەلگىسى بار مەدالوندى العىسى كەلگەن. ءبىراق، تۋپاك دوستارى ونى ۇرىپ جىبەرگەن. سوعان نامىستانعان Baby Lane الەمدەگى ەڭ اتاقتى رەپەرگە وق اتقان. ءبىر قىزىعى، ول وسى 20 جىل ىشىندە تۋپاك ولىمىنە قاتىستى ايىپتالماعان ەكەن. ءوزى 1998 -جىلى كاليفورنيا شتاتىندا بولعان اتىستا قازا تاپقان. ەندى ونى ءتىرى دەگەن دەرەكتى تاراتقان ادامعا توقتالاتىن بولساق، شۋدى Death Row Records تاسپا ءۇيىنىڭ نەگىزىن قالاۋشى شۋگ نايتتىڭ ۇلى شىعارىپتى. ول ءوزىنىڭ الەۋمەتتىك جەلىسىندە «تۋپاك ءتىرى، ول قازىر مالايزيادا جاسىرىن ءومىر سۇرەدى» دەگەن جازبالار جاريالاعان. وندا، ءتىپتى، قازىرگى تۋپاكتىڭ ۆيدەوسى دا بار بولاتىن. قازىر ول وشىرىلگەن.
Massaget.kz