بىزدە ەتنوستاردىڭ قۇقىعىن شەكتەيتىن بىردە- ءبىر زاڭ جوق - ەلباسى

 نۇر- سۇلتان. قازاقپارات - ق ر تۇڭعىش پرەزيدەنتى - ەلباسى، ق ح ا ءتوراعاسى نۇرسۇلتان نازاربايەۆ الەمدىك پروتسەستەردى تالداي وتىرىپ، قازاقستان بىرلىك پەن ىنتىماقتى نىعايتۋدىڭ دۇرىس جولىن تاڭداعانىنا كوز جەتكىزىپ وتىراتىنىن ءمالىم ەتتى، دەپ حابارلايدى قازاقپارات ءتىلشىسى.

«وركەندەۋگە جەتۋدە دۇرىس قۇرالداردى تاڭداپ الدىق. بىرىنشىدەن، ءوز كەزىندە ءبىزدىڭ قازاقستان حالقى اسسامبلەياسىنىڭ قۇرىلۋى - ماڭىزدى شەشىمدەردىڭ ءبىرى بولعانىن اتاپ ءوتۋ كەرەك. حالىقتىڭ تىلەگىمەن قۇرىلعان ۇيىم ول ەلدىڭ ابىرويلى كونستيتۋتسيالىق ورگانىنا اينالدى. ءبىرىنشى كۇننەن باستاپ، اسسامبلەيا مەملەكەت پەن حالىق الدىنداعى جاۋاپكەرشىلىكتى تانىتىپ كەلەدى. ءبىزدىڭ ەلدىڭ ساياسي جۇيەسىنە اسسامبلەيا بارلىق ەتنوستار مەن كونفەسسيالاردى ينتەگراتسيالادى. اسسامبلەيانى ءبىزدىڭ ەلدىڭ ساياسي جۇيەسىنە ينتەگراتسيالاي وتىرىپ، ءبىز ءوزىمىزدىڭ ۇلتتىق بىرلىكتىڭ باعىتىن قۇردىق» ، - دەيدى نۇرسۇلتان نازاربايەۆ.

ەلباسى ءوز سوزىندە اسسامبلەيا مۇشەلەرى پارلامەنت ماجىلىسىندە وتىرعانىن ەسكە سالدى.

 «سىزدەردىڭ قاتارلارىڭىزداعى 9 دەپۋتات بەيبىتشىلىك پەن كەلىسىمنىڭ ەلشىسىنە اينالدى. ەكىنشىدەن، ۇلتارالىق جانە كونفەسسياارالىق تەڭدىكتىڭ قۋاتتى قۇقىقتىق بازاسى قۇرىلدى. بىزدە ەتنوستاردىڭ قۇقىعىن شەكتەيتىندەي بىردە- ءبىر زاڭ جوق. بارلىق ازاماتتاردىڭ تەڭدىگى - تىكەلەي ماتىنمەن ەلدىڭ باستى زاڭىندا تايعا تاڭبا باسقانداي جازىلعان. ۇشىنشىدەن، ۇلتارالىق سالاداعى ءبىزدىڭ مەملەكەتتىڭ ساياساتى - سانالۋاندىقتىڭ بىرلىگىنە نەگىزدەلگەن. اسىرەسە، بۇل رەتتە ءتىل ساياساتىن ەرەكشە اتاپ وتۋگە بولادى. ەڭ الدىمەن، مەملەكەتتىك تىلدە وقىتاتىن مەكتەپتەر جەلىسى ارتىپ كەلەدى. قازىرگى ۋاقىتتا ەلىمىزدە مەملەكەتتىك تىلدەگى 4 مىڭنان استام مەكتەپ بار. بۇل - توقسانىنشى جىلداردان قاراعاندا ەكى ەسە كوپ. ال قازاق ءتىلىن ۇيرەتەتىن وقۋ ورتالىقتارى نيەت بىلدىرۋشىلەردىڭ بارىنە قولجەتىمدى. وسىعان بايلانىستى «ءسيتۋاتيۆتى قازاق ءتىلى» جوباسىن ەرەكشە اتاپ وتەر ەدىم» ، - دەيدى ەلباسى.

نۇرسۇلتان نازاربايەۆ ءوز سوزىندە مەملەكەت ەتنيكالىق تىلدەر مەن مادەنيەتتەرگە دە قامقور بولىپ كەلە جاتقانىن تىلگە تيەك ەتتى.

«ءبىزدىڭ ەلىمىزدەگى 88 مەكتەپتە وزبەك، تاجىك، ۇيعىر، ۋكراين تىلىندە وتەدى. ال 108 مەكتەپتە قازاقستان ەتنوستارىنىڭ 22 ءتىلى جەكە ساباق رەتىندە وقىتىلادى. ەلىمىزدە 15 تىلدەگى 35 باسپا ءسوز بار. 11 تىلدە تەلەارنالاردا باعدارلامالار شىعىپ جاتىر. 14 ورىس تەاترى بار. وزبەك، ۇيعىر جانە كورەي تەاترلارى بار. مۇنداي تەك ءبىزدىڭ ەلدە عانا بار"، - دەدى ول.

  ەسكە سالا كەتسەك، ەلوردادا ق ر تۇڭعىش پرەزيدەنتى - ەلباسى، ق ح ا ءتوراعاسى نۇرسۇلتان نازاربايەۆتىڭ توراعالىعىمەن قازاقستان حالقى اسسامبلەياسىنىڭ XXVII سەسسياسى ءوتىپ جاتىر.