بەلگىلى ءانشى ءمولدىر اۋەلبەكوۆا جاڭا قىزمەتكە تاعايىندالدى
«ق ر مادەنيەت جانە سپورت مينيسترلىگى «قازاق كونسەرت» مەملەكەتتىك كونسەرتتىك ۇيىمىنىڭ ديرەكتورى ج. سەيدۋللا ۇلىنىڭ بۇيرىعىمەن ءمولدىر اۋەلبەكوۆا شىعارماشىلىق قىزمەتتىڭ باسشىسى بولىپ تاعايىندالدى.
ەسترادا، كلاسسيكا، فولكلور، تەاتر باعىتىنداعى ەلىمىزدىڭ ۇزدىك شىعارماشىلىق ۇجىمدارىن ءبىر ارناعا توعىستىرىپ، قازاق ونەرىنىڭ قاراشاڭىراعىنا اينالعان «قازاق كونسەرتتىڭ» شىعارماشىلىق قىزمەتىنە ەندى ءمولدىر اۋەلبەكوۆا باسشىلىق جاسايدى»، دەلىنگەن حابارلامادا.
بۇدان بۇرىن ول «قازاق كونسەرتتىڭ» ەسترادالىق توپتارىنا جەتەكشىلىك ەتىپ، شىعارماشىلىق ىزدەنىستەرىندە جاڭا يدەيالار مەن تىڭ باستامالارعا بەيىم ەكەندىگىن كورسەتتى. ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ تۇلەگى 2011 -جىلى ەسترادالىق ونەر ماگيسترى اتانعان.
«رەسپۋبليكالىق جانە حالىقارالىق بايقاۋلاردىڭ لاۋرەاتى، تانىمال ءانشى، اكتريسا ءارى جاس پروديۋسەر رەتىندە ءمولدىر اۋەلبەكوۆا قازاق ەسترادا ونەرىنىڭ دامۋىنا ەلەۋلى ۇلەس قوسۋدا. مادەنيەت جانە ونەر سالاسىنداعى جوعارى جەتىستىكتەرى ءۇشىن 2018 -جىلى «قۇرمەت» وردەنىنىڭ يەگەرى اتاندى»، دەلىنگەن حابارلامادا.