فرانسيالىق ساياحاتشى بوشكەمەن اتلانت مۇحيتىن كەسىپ ءوتتى
10:20, 29 - ءساۋىر 2019
نۇر-سۇلتان. قازاقپارات - فرانسيالىق قارت ساياحاتشى جان-جاك ساۆەن بوشكەمەن اتلانت مۇحيتىن كەسىپ ءوتتى، دەپ حابارلايدى قازاقپارات France 24 باسىلىمىنا سىلتەمە جاساپ.
72 جاستاعى ساۆەن ساياحاتىن جەلتوقسان ايىندا كانار ارالدارىنان باستاعان. اراعا بىرنەشە اي سالىپ كاريب تەڭىزىنەن ءبىر-اق شىقتى.
«122 كۇن جانە 9 ساعاتتان كەيىن كاريب تەڭىزى الابىن بىلدىرەتىن مەريدياندى كەسىپ ءوتتىم. ساياحاتىم اياقتالدى. بارشاعا راحمەت!»، - دەيدى قارت ساياحاتشى.
ساۆەننىڭ بوشكە ءتارىزدى كەمەسى - ۇزىندىعى 3 مەتر، ەنى 2,10 مەتر كەلەتىن تسيليندر. ونىڭ جەلكەنى دە جوق. ول قالىڭ شەرەدەن جاسالعان. سالماعى - 450 كەلى. ىشىندە توسەك، شاعىن اسحانا، تەڭىز كارتالارىنا ارنالعان ۇستەل جانە ناۆيگاتسيا قۇرىلعىسى بار.