بۇل «ءوزى ولسە دە، ادامنىڭ كوزى ولمەيدى» دەگەن ۇستانىممەن ءومىر سۇرەتىن ەل - شەتەلدەگى قازاق ءتىلدى ب ا ق- قا شولۋ

 نۇر-سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

بەيجىڭدە قازاق ءتىلدى بالاباقشاعا بارۋشىلار كوبەيدى - قىتايدىڭ «ورتالىق حالىق راديوسى» (CNR)

 

بەيجىڭ قالاسىنىڭ چاۋياڭ اۋدانىندا «بالدىرعان» اتتى قازاق ءتىلدى بالاباقشانىڭ اشىلۋى قىتاي استاناسىندا تۇرىپ جاتقان قازاقستان ازاماتتارىنا قۋانىش سىيلادى، دەپ جازادى قىتايلىق kazakcnr.com سايتى.

«قىتاي حالىق رەسپۋبليكاسىنىڭ استاناسىندا «بالدىرعان» اتتى قازاق بالا باقشاسىنىڭ اشىلعانىنا ءبىر جىل تولدى. العاشىندا بۇل ورتالىق تەك قازاقستان ازاماتتارىنىڭ بالالارىنا باعىتتالىپ جۇمىس جاساپ كەلگەن. بالاباقشا تاربيەشىلەرىنىڭ بىلىكتىلىگى، وقىتۋ ءۇردىسىنىڭ وزىقتىعى جۇرتتىڭ اراسىندا جاقسى باعالانىپ، سۇرانىس تۋدىرعان سوڭ، بالالارىن «بالدىرعانعا» سەنىپ تاپسىراتىنداردىڭ قاراسى مولايعان. قازىرگى كۇنى بۇل بالاباقشادا قىتايلىق، قىرعىزستاندىق، ءۇندىستاندىق بالالاردا وقىپ ءجۇر»، - دەپ جازادى CNR سايتى.

اتالعان ب ا ق-تىڭ حابارلاۋىنشا، بالاباقشا ديرەكتورى نازگۇل مىرزاحان قىزى نازاربەكوۆا 2009 -جىلى جۇبايىنىڭ جۇمىسىنىڭ قاجەتىمەن قىتايعا كەلىپ ۋاقىتشا قونىستانعان. وسىدان سوڭ نازگۇل ءارتۇرلى سەبەپتەرمەن قىتايدا تۇرىپ جاتقان جەرلەستەرىنىڭ قازاق بالاباقشاسىنا دەگەن سۇرانىسى بار ەكەنىن ءبىلىپ، باقشا اشۋعا بەل بۋعان. ونىڭ ۋنيۆەرسيتەتتە وقىعان «مەكتەپكە دەيىنگى تاربيە مەن وقىتۋ» ماماندىعى دا تالپىنىسىن وياتقان. وسىلايشا بۇگىنگى كۇنى الماتىدا، ودان ۇرىمجىدە بالاباقشا ىسىمەن شۇعىلدانعان تاجىريبەلى ىسكەر ايەل ءوز كاسىبىن حالىقارالىق قالا بەيجىڭدە جالعاستىرىپ، «بالدىرعان» بالالار باقشاسىن اياعىنان تۇرعىزىپ، حالىقتىڭ العىسىنا بولەنىپ وتىر.

جاندوس بولاشاق ۇلى ازيا كۋبوگىنىڭ قولا جۇلدەگەرى اتاندى - KAZNEWS

 

الماتىدا دزيۋدودان قازاقستان دزيۋدو فەدەرتسياسىنىڭ قۇرمەتتى پرەزيدەنتى بەكەت ساپابەك ۇلى ماحمۇتوۆتىڭ قۇرمەتىنە ارنالعان جاسوسپىرىمدەر مەن جاستار اراسىنداعى ازيا كۋبوگى ءوتتى، دەپ حابارلايدى KAZNEWS اقپاراتتىق پورتالى.

اتالعان سايتتىڭ جازۋىنشا، جارىستىڭ ءبىرىنشى كۇنىندە 6 ەلدان 224 جاس ءوسپىرىم دزيۋدوشى بەلدەسسە، ەكىنشى كۇنى 7 ەلدەن 186 جاس سپورتشى ءوزارا مىقتىنى انىقتاعان. ناتيجەسىندە، جاسوسپىرىمدەر اراسىندا وتكەن جارىستى قازاقستان قۇراماسى 11 التىن، 10 كۇمىس جانە 20 قولا جۇلدەمەن مەدال كەستەسىندە كوش باستادى. 3 التىن، 4 كۇمىس، 5 قولا جۇلدەمەن وزبەكستان قۇراماسى ەكىنشى ورىنعا جايعاسسا، 1 التىن، 1 كۇمىس جانە 2 قولا جۇلدەگە يە بولعان قىرعىزستان قۇراماسى ۇزدىك ۇشتىكتى اياقتادى.

«بۇل جارىستان موڭعوليا قۇراماسى دا قۇر قالعان جوق. 60 كەلىدە ءسۇحبات ءبيامباسۇرەن، -90 كەلى سالماقتا جاندوس بولاشاق ۇلى بەلدەسۋگە بارعان. ناتيجەسىنە ءسۇحبات ءبيامباسۇرەن ازيا كۋبوگىنىڭ جەڭىمپازى اتانسا، جاندوس بولاشاق ۇلى قولا جۇلدەگەر اتاندى. جاندوس بولاشاق ۇلى العاشقى كەزدەسۋىندە قازاقستاندىق تالاس التايدى يپپون ۇپايىمەن جەڭىپ، ەكىنشى اينالىمىندا ءانۋار ۇلى بەكسۇلتاننان ۇتىلىپ قالدى. جۇبانىش بەلدەسۋىندە رەسەيلىك برۋينحانوۆ ماكسيمنەن ايلاسىن اسىرىپ، باسىمدىق تانىتىپ يپپون ۇپايىمەن جەڭدى. قولا جۇلدە ءۇشىن بەلدەسۋدە جاندوستى قازاقستاندىق فەدوروۆ دانيل كۇتىپ تۇرعان بولاتىن. جاندوس ءدانيلدىڭ ارقاسىن 3:24 مينۋتتا تاتاميگە تيگىزىپ ۇلگەردى»، - دەپ جازادى KAZNEWS.

دەرەككوزىنىڭ جازۋىنشا، جاندوس بولاشاق ۇلى جاستار اراسىندا - 90 كەلىدە دزيۋدودان موڭعوليا ەل چەمپيوناتىنىڭ قولا جۇلدەگەرى، سامبودان جانە موڭعولدىڭ ۇلتتىق كۇرەسىنەن ەل چەمپيونى ەكەن.

«ءوزى ولسە دە، ادامنىڭ كوزى ولمەيدى» دەگەن ۇستانىممەن ءومىر سۇرەتىن ەل - قىتايدىڭ «ورتالىق حالىق راديوسى» (CNR)

 

20 ميلليوننان استام حالقى بار شري-لانكا دەموكراتيالىق سوتسياليستىك رەسپۋبليكاسى الەم بويىنشا كوزدىڭ مۇيىزگەك قابىرشىعىن باسقا مەملەكەتتەرگە جاردەمگە بەرەتىن ەڭ ۇلكەن ەل، دەپ جازادى قىتايلىق kazakcnr.com سايتى.

قىتايلىق ب ا ق-تا جارىق كورگەن ماقالادا اۆتور، شري-لانكاداعى 21 -ساۋىردە بولعان جويقىن جارىلىس سالدارىنان قازا بولعاندارعا كوڭىل ايتا وتىرىپ، بۇل دۇنيەنىڭ ساۋلەسىنە زار بولعان كوپتەگەن ادامداردى جارىق الەممەن قاۋىشتىرعان اقپەيىل شري-لانكالىقتاردىڭ قايعى جامىلىپ، جانارلارى جاسقا تولعاندارىنا كۇيىنىش بىلدىرگەن.

«شري-لانكادا بولعان بىرنەشە جارىلىس سالدارىنان 300 دەن استام ادام قازا بولىپ، 500 گە جۋىق ادام جارالانعان. بۇل قايعىلى وقيعالار الەم جۇرتىنىڭ قابىرعاسىن قايستىردى. شري- انكالىقتار دۇنيە جۇزىنە كوپتەگەن يگى باستامالارىمەن تانىمالى. تابيعاتىنان ءبىرتوعا، سىرباز مىنەزدى شري-لانكا حالقى الەم بويىنشا تاڭعاجايىپ ءبىر رەكوردتى ۇزبەي ساقتاپ كەلە جاتقانىن كوپ جۇرت بىلە بەرمەيدى. 20 ميلليوننان استام حالقى بار شري-لانكا ەلى كوزدىڭ مۇيىزگەك قابىرشىعىن ساقتايتىن حالىقارالىق «كوز بانكىنە» قازىرگە دەيىن 160 مىڭ دانا كوزدىڭ مۇيىزگەك قابىرشىعىن كومەككە بەرگەن. بۇل ەلدىڭ ءار كەزەكتى پرەزيدەنتتەرى دە جالپىحالىقتىق ۇردىسكە اينالعان يگى ءداستۇردى قولداپ، باستاماشى بولىپ كەلەدى»، - دەپ جازادى CNR سايتى.

اتالعان اقپارات كوزىنىڭ دەرەگىنشە، شري-لانكا ەلىنىڭ وزىندە دە ءبىر كەزدەردە كوزدىڭ قابىرشىعىن بەرەتىن دونور تاپشى بولعان. 1958 -جىلى مەديتسينا ماماندىعى بويىنشا وقىپ جۇرگەن ستۋدەنت حادسون سيلۆا ەسىمدى ازاماتتىڭ گازەتتە جارىق كورگەن «ءوزى ولسە دە، ادامنىڭ كوزى ولمەيدى» اتتى ماقالاسى ەلدە ۇلكەن سىلكىنىس تۋدىرادى. ول ماقالادا حالىقتى كوزدىڭ مۇيىزگەك قابىرشىعىن كومەككە اتاۋعا ناسيحاتتاپ، اناسى ەكەۋى وزدەرى باستاپ وسى ۇردىسكە اتسالىسىپ، ۇلگى بولاتىنىن ايتادى.

وسىدان سوڭ 70 پايىز حالقى بۋددا ءدىنىن ۇستاناتىن ەلدە بۇل باستاما جاپپاي قولداۋ تابادى. ولار، ادام قايتىس بولعاننان كەيىن دەنە مۇشەسىن باسقا بىرەۋگە كومەككە بەرۋ، اسىرەسە، كوز قابىرشىعىن باسقالارعا سىيلاپ، ولاردىڭ جارىق دۇنيەنى قايتادان كورۋلەرىنە مۇمىندىك جاراتۋ ساۋاپتى ءىس دەپ ساناعان.

«كوپتەگەن شري-لانكالىقتار سول كەزەڭدەردەن باستاپ بۇل ناۋقانعا بەلسەنە اتسالىسىپ، قازىرگى كۇنى بۇكىل حالىقتىق اۋقىمعا اينالعان. تىپتەن ەلدىڭ ءار كەزەكتى پرەزيدەنتتەرى دە كوز قابىعىن كومەككە اتاپ كەلە جاتقانى ب ا ق-تا جاريالاندى. 1961 -جىلدان 2017 -جىلعا دەيىن شري-لانكاداعى كوز قابىعىن ساقتايتىن بانك 160 مىڭ دانا كوزدىڭ مۇيىزگەك قابىرشىعىن تاپسىرىپ العان. سوڭعى ەكى جىلدا كوز قابىرشىعى 8 مىڭ داناعا ارتىپ وتىرعان. ال ەلدە شامامەن 13 ميلليون ادام كوز قابىرشىعىن اقىسىز كومەككە بەرۋ ءۇشىن كەلىسىمىن بەرىپ، قول قويعان. كوز قويماسىندا ساقتالعان 160 مىڭ كوزدىڭ قاساڭ قابىعىنىڭ 40 مىڭنان استامى شري- لانكالىق ناۋقاستارعا پايدالانىلسا، ال 100 مىڭنان استامى قىتاي، جاپونيا، تايلاند، ءۇندىستان، پاكىستان سەكىلدى الەمنىڭ وزگە مەملەكەتتەرىندەگى ناۋقاستارعا ترانسپلانتاتسيالاۋعا جانە زەرتتەۋگە بەرىلگەن»، - دەپ جازادى قىتايدىڭ «ورتالىق حالىق راديوسىنىڭ» سايتى.

قازاقستاندا تۋريستىك پوليتسيا قۇرىلدى - «فارس» اقپارات اگەنتتىگى

 

قازاقستاننىڭ ىشكى ىستەر مينيسترلىگى تۋريستىك پوليتسيا قۇردى. بۇل جاڭا بولىمشەنىڭ اشىلۋ ماقساتى شەتەل ازاماتتارىنىڭ قازاقستان جەرىندە تىنىشتىعى مەن قاۋىپسىزدىگىن قامتاماسىز ەتۋ بولىپ وتىر، دەپ حابارلايدى Fars اقپارات اگەنتتىگى.

قازاقستاندا جاڭا قۇرىلعان تۋريستىك پوليتسيانىڭ باستى مىندەتى - تۋريستەر مەن شەتەلدىك قوناقتارعا ءتيىستى اقپارات بەرۋ جانە ولاردىڭ قاۋىپسىزدىگىن قامتاماسىز ەتۋ.

تۋريستىك پوليتسيا قىزمەتكەرلەرى بەينەكامەرا، پلانشەت جانە راتسيامەن جاراقتالىپ، قازاق، ورىس جانە اعىلشىن تىلدەرىندە سويلەپ، قازاقستان تاريحىن جاقسى ءبىلۋى ءتيىس.

نۇر- سۇلتانداعى تۇركيا ەلشىلىگىندە ۇلتتىق ەگەمەندىك جانە بالالار مەرەكەسى تويلاندى - TRT

 

قازاقستاننىڭ ەلورداسى نۇر- سۇلتان قالاسىندا 23 -ءساۋىر ۇلتتىق ەگەمەندىك جانە بالالار مەرەكەسى تويلاندى، دەپ حابارلايدى تۇركيا راديو تەلەۆيزيا پورتالى.

اتالعان ب ا ق-تىڭ جازۋىنشا، تۇركيا وكىلەتتى ەلشىلىگى مەن نۇر-سۇلتان قالاسىنداعى يۋنۋس ەمرە ينستيتۋتى ىنتىماقتاستىعىمەن ەلشىلىك عيماراتىندا بولعان شاراعا تۇركيانىڭ وكىلەتتى جانە توتەنشە ەلشىسى نيەۆزات ۋيانىك، ەلشىلىك قىزمەتكەرلەرى جانە يۋەي وكىلدەرى، سونىمەن بىرگە «SOS» بالالار ءۇيى مەن «نۇرلى جۇرەك» بالالار ورتالىعىنىڭ جەتكىنشەكتەرى قاتىستى.

«وكىلەتتى ەلشى ۋيانىك بالالارعا اتاتۇرىك سىيلاعان مەرەكەنىڭ ماڭىزىن ءتۇسىندىرىپ، ءوزىنىڭ قىزمەت كرەسلوسىن يۋەي- نىڭ تۇرىك حالىق بيلەرى انسامبلىندەگى لاۋرا الدابەرگەنوۆا جانە «نۇرلى جۇرەك» ورتالىعىنىڭ وقۋشىلارى ادىلەت جاقسىلىق پەن ءنابي تەمەشوۆقا بەردى. وكىلەتتى ەلشى كرەسلوسىنا وتىرعان بالالار ەلشىگە راقمەت ايتىپ، يگى تىلەكتەرىن جەتكىزدى. مەرەكەلىك شارادا بالالار بي بيلەپ، ولەڭ وقىدى. ايىرىقشا بالالارعا تۇرىكتىڭ ءداستۇرلى كولەڭكە تەاترى ساحنالاندى. شارا شەڭبەرىندە سونىمەن بىرگە بالالاردىڭ «تۇركيا-قازاقستان باۋىرلاستىعى» اتتى كورمەسى اشىلدى»، - دەپ جازادى TRT.

سامارقاند مۋزىكالىق دراما تەاترى قازاقستانعا بارادى - «ءوز ا» اقپاراتتىق اگەنتتىگى

 

الدىمىزداعى 25 -مامىر كۇنى سامارقاند وبلىسىنداعى مۋزىكالىق دراما تەاتر ۇجىمى قازاقستانعا شىعارماشىلىق ساپار جساۋدى جوسپارلاپ وتىر، دەپ جازادى وزبەكستاننىڭ «ءوزا» مەملەكەتتىك اقپاراتتىق اگەنتتىگى.

«وزبەكستان رەسپۋبليكاسىنىڭ مادەنيەت مينيسترلىگىنىڭ مالىمەتىنشە، تەاتر ۇجىمى قازاقستانعا شىعارماشىلىق ساپارعا شىعۋعا دايىندالۋدا. قازىرگى ۋاقىتتا وزبەكستاندا مادەنيەت پەن ونەر سالاسىن دامىتۋعا، الدىڭعى قاتارلى حالىقارالىق تاجىريبە نەگىزىندە زاماناۋي مادەنيەت جانە ونەر ينستيتۋتتارىن قۇرۋعا، ولاردىڭ ماتەريالدىق- تەحنيكالىق بازاسىن نىعايتۋعا جانە شىعارماشىلىق ينتەلليگەنسيانى تولىق قولداۋعا ۇلكەن كوڭىل ءبولىنىپ وتىر. جۇمىستاردىڭ ناتيجەسى سامارقاند وبلىسى مۋزىكالىق دراما تەاترى ۇجىمى تاراپىنان ساحنالانىپ جاتقان مازمۇندى ءارى ءماندى قويىلىمدارىنان- اق ايقىن بايقاۋعا بولادى»، - دەپ جازادى «ءوزا» اقپاراتتىق اگەنتتىگى.

اتالعان سايتتىڭ حابارلاۋىنشا، شىمكەنتتەگى وزبەك دراما تەاترىنىڭ ۇجىمى بيىلعى جىلدىڭ 18 -ساۋىرىندە سامارقاند قالاسىندا شىعارماشىلىق ساپارمەن بولىپ، «قاسقىر ۇلىعان ءتۇن» سپەكتاكلىن تارتۋ ەتكەن. كەزدەسۋ بارىسىندا دەلەگاتسيا مۇشەلەرى سامارقاندتىق ارىپتەستەرىن قازاقستانعا شاقىرعان ەكەن.

اۆتور: باقىتجول كاكەش