رەسەيدە قازاق قىز بالالارى اراسىندا سۇلۋلىق بايقاۋى وتەدى
11:27, 25 - ءساۋىر 2019
رەسەي. قازاقپارات - 28-ءساۋىر كۇنى رەسەيدىڭ سامارا وبلىسىندا ۇلتى قازاق قىز بالالار اراسىندا «التىن بالاپان» IV سۇلۋلىق بايقاۋى وتەدى، دەپ حابارلايدى «قازاقپارات» ح ا ا قازاقستاننىڭ رەسەيدەگى ەلشىلىگىنە سىلتەمە جاساپ.
بايقاۋدى «اق جول» قازاقتاردىڭ ۇلتتىق-مادەني اۆتونومياسى سامارا وڭىرلىك قوعامدىق ۇيىمى، سامارا وبلىسىنىڭ «حالىقتار دوستىعى ءۇيى»، «قايرات» جاستار بىرلەستىگى ۇيىمداستىرىپ وتىر.
شارانى وتكىزۋدەگى ماقسات - وڭىردەگى قازاق دياسپوراسىنىڭ اراسىندا ۇلتتىق مادەنيەتتى ناسيحاتتاپ، ۇلتارالىق، كونفەسسياارالىق كەلىسىمدى نىعايتۋ، جاس بۋىن اراسىنان دارىن يەلەرىن انىقتاۋ.
بايقاۋعا دايىندىق بارىسىندا كەيبىر قىزدار العاش رەت ۇلتتىق كيىم كيىپ، قازاق تاعامدارىن ازىرلەۋدىڭ قىر-سىرىن ۇيرەنەدى.
سونداي-اق شاراعا قازاقستاندىق ارتىستەر قاتىسادى - «مەرەكە ءانسامبلى» مەن «ارمان» ءسان تەاترى.