پرەزيدەنتتىك سايلاۋعا تۇسەتىن ءبىرىنشى ايەل كانديدات ەڭبەك جولىن قالاي باستاعان
وسىلايشا، قازاقستاندا العاش رەت ايەل ادام پرەزيدەنتتىك سايلاۋعا تۇسەتىن بولدى. قازاقپارات ءتىلشىسى دانيا ەسپايەۆانىڭ ءومىربايانىنا شولۋ جاسادى.
ق ر پارلامەنت ءماجىلىسىنىڭ رەسمي سايتىنا كورسەتىلگەن اقپاراتقا سايكەس، دانيا مادي قىزى ەسپايەۆا 1961 -جىلى 5 - ناۋرىزدا اقتوبە وبلىسىنىڭ مارتوك اۋدانىنداعى جايساڭ اۋىلىندا دۇنيەگە كەلگەن. 1982 -جىلى الماتى ەسەپ- نەسيە تەحنيكۋمىن بىتىرگەن. ال 1993 -جىلى قازاق مەملەكەتتىك باسقارۋ اكادەمياسىنىڭ ەكونوميست ماماندىعى بويىنشا ديپلومىن الدى. ەڭبەك جولىن تەحنيكۋمدى بىتىرگەننەن كەيىن باستاعان.
1982 ج. - ك س ر و مەملەكەتتىك بانكىنىڭ اقتوبە وبلىستىق باسقارماسىنىڭ نەسيەلەندىرۋ ءبولىمىنىڭ ەكونوميسى، 1986-1987ج. ج. - وسى ءبولىمنىڭ باس ەكونوميسى، 1988-1991 ج. ج. - پرومستروي بانكتىڭ وبلىستىق باسقارماسى اقشا اينالىمى ءبولىمىنىڭ باس ەكونوميسى، 1992 ج. - «تۇران» ساقتاندىرۋ قوعامىنىڭ اقتوبە وبلىستىق فيليالىنىڭ باس بۋحالتەرى، 1992-1995 ج. ج. - «تۇران» س ق اقتوبە وبلىستىق فيليالى ديرەكتورىنىڭ ورىنباسارى، 1995-1997 ج. ج. - قازاقستاننىڭ الەم بانكى اقتوبە وبلىستىق فيليالى نەسيە ءبولىمىنىڭ باس مامانى، نەسيەلەندىرۋ ءبولىمى باستىعىنىڭ ورىنباسارى، اتالعان ءبولىم باستىعىنىڭ مىندەتىن اتقارۋشى، 1998 - 2005 ج. ج. - «ب ت ا بانك» ا ق ديرەكتورىنىڭ كورپوراتيۆتىك بيزنەس جونىندەگى ورىنباسارى، 2006 ج. - 2014 ج. قاراشاعا دەيىن - «ب ت ا بانك» ا ق اقتوبە وبلىستىق فيليالىنىڭ ديرەكتورى، 2014 ج. قاراشادان باستاپ - «قازكوممەرتس بانك» ا ق اقتوبە وبلىستىق فيليالىنىڭ ديرەكتورى، ال 2016 -جىلدىڭ ناۋرىز ايىنان باستاپ ق ر پارلامەنتى ءماجىلىسىنىڭ دەپۋتاتى قىزمەتىن اتقارىپ ءجۇر. ءماجىلىستىڭ بيۋدجەت جانە قارجى كوميتەتىنىڭ قۇرامىنا كىرەدى.
دانيا ەسپايەۆانىڭ بانك سالاسىنداعى جالپى ەڭبەك ءوتىلى 34 جىلدى قۇرايدى. سونىڭ 17 جىلىن ول باسشىلىق قىزمەتتە وتكىزدى. وبلىستىق ءماسليحاتقا ەكى رەت دەپۋتات بولىپ سايلاندى. «اتامەكەن» ۇ ك پ فيليالىنىڭ باسقارماسىنا كىرەدى. وبلىستىق اكىمدىكتىڭ جانىنداعى ايەلدەر جانە وتباسى ىستەرى جونىندەگى كوميسسيانىڭ قۇرامىندا 14 جىل بولعان. اقتوبە وبلىسىنىڭ قوعامدىق- ساياسي ومىرىنە بەلسەنە ارالاسقانى جانە ايماق ەكونوميكاسىن دامىتقانى ءۇشىن 2011 -جىلى «قۇرمەت» وردەنىمەن ماراپاتتالعان. قازاقستان تاۋەلسىزدىگىنىڭ 20 جىلدىعى مەن 25 جىلدىعىنا ارنالعان مەدالدارى دا بار. بۇدان بولەك، قازاقستاننىڭ قارجى سالاسىن دامىتۋعا قوسقان ۇلەسى ءۇشىن «ۇزدىك قارجىگەر» قوعامدىق مەدالىمەن ماراپاتتالعان. ەكى ۇلى مەن ەكى نەمەرەسى بار.
ايتا كەتەيىك، بۇگىن قۇرىلتاي دەلەگاتتارى جاسىرىن داۋىس بەرۋ ارقىلى التى ۇمىتكەردىڭ بىرەۋىن تاڭدادى. داۋىس بەرۋ كەزىندە 190 دەلەگاتتىڭ 49,5 پروتسەنتى دەپۋتات دانيا ەسپايەۆانىڭ كانديداتۋراسىن قولدادى. ءبىراق كانديداتتىڭ داۋىسى 50 پروتسەنتتەن اسۋى كەرەك. وسىدان كەيىن پرەزيديۋم مۇشەلەرى كەڭەسىپ، ەكىنشى تۋردى وتكىزبەۋ جونىندە شەشىم قابىلدادى. سەبەبى د. ەسپايەۆانىڭ باسىمدىعى ايقىن بولدى. دەلەگاتتار اتالعان شەشىمدى قولدادى. ءسويتىپ، دانيا ەسپايەۆا پارتيانىڭ اتىنان پرەزيدەنت سايلاۋىنا كانديدات رەتىندە بەكىتىلدى.
«جاقىندا ورتالىق كەڭەسىنىڭ پلەنۋمىندا پرەزيدەنتتىككە ۇمىتكەرلەر ماسەلەسى تالقىلانعان بولاتىن. ازات تۇرلىبەك ۇلى ماعان كانديداتۋرامدى شىعارۋعا ۇسىنىس جاسادى. سول كەزدە «سايلاۋعا ايەل ادام قاتىسسا، قالاي بولادى ەكەن؟» دەگەن سۇراقتار دا قويىلدى. قازاق قوعامىندا ايەلدەر ءوز ورنىن ءبىلۋى كەرەك دەپ قارسى شىققاندار دا بولدى. سوندا مەن نامىستانىپ كەتتىم. ايەلدىڭ دە بيلىكتە وتىرا الاتىنىن دالەلدەپ بەرەيىنشى دەدىم. ءسويتىپ، پرەزيدەنتتىك سايلاۋعا قاتىسۋعا بەل بۋدىم»، - دەيدى دانيا ەسپايەۆا وسى شەشىمگە قالاي كەلگەنى جونىندە.
ونىڭ ايتۋىنشا، بۇگىندە ق ر پارلامەنت ماجىلىسىندە دەپۋتاتتاردىڭ 30 پروتسەنتى - ايەلدەر. «اقجول» فراكسياسىندا ايەل دەپۋتاتتاردىڭ سانى دا از ەمەس. «وسىنىڭ ءوزى ايەل ادامداردىڭ بيلىكتە وتىرا الاتىنىن كورسەتىپ وتىر. مەنىڭشە، ايەل بار جەردە ءتارتىپ بار»، - دەپ اتاپ كورسەتتى د. ەسپايەۆا.
اۆتور: ارمان اسقاروۆ