جۇمىسشى مەكەمە اقشاسىن توناپ كەتتى دەپ الداپ، ونى ۇتىسقا تىگىپ جىبەرگەن

قىزىلوردا. قازاقپارات -  قىزىلوردادا گاز قۇيۋ بەكەتىنىڭ جۇمىسشىسى مەكەمە اقشاسىن قۇمار ويىنعا تىگىپ جىبەرگەن، دەپ حابارلايدى قازاقپارات ءتىلشىسى.

اتالعان ازاماتتىڭ العاشقى جالعان حابارلاما بەرۋ جاعدايى 30 -ناۋرىزدا تىركەلگەن ەدى. سول كۇنى قالادا ورنالاسقان گاز قۇيۋ بەكەتىنىڭ جۇمىسشىسى سول جەردە ءوزىن بەلگىسىز بىرەۋلەر قورقىتىپ، مەكەمەگە تيەسىلى 263 مىڭ تەڭگەنى تارتىپ الىپ كەتكەنىن ءمالىم ەتكەن ەدى. ونىڭ ايتۋىنشا، ءوزىن قورقىتقان ادامدار وقيعا ورنىنان بوي تاسالاپ كەتكەن. اتالمىش ارىز نەگىزىندە قالالىق پوليتسيا باسقارماسى قازاقستان رەسپۋبليكاسى قىلمىستىق كودەكسىنىڭ 191-بابىنىڭ 2-بولىگىنىڭ 3-تارماعىمەن (توناۋ) سوتقا دەيىنگى تەرگەپ- تەكسەرۋ امالدارىن قولعا الدى.

بۇل ازاماتتىڭ جالعان حابارلاما بەرۋ جاعدايى 7 -ساۋىردە تاعى جالعاستى. ول سول كۇنى تاڭعى ۋاقىتتا جوعارىدا اتالعان گاز قۇيۋ بەكەتىنىڭ الدىندا بەتپەردە كيگەن بەلگىسىز ەكى ازامات پىشاقپەن قورقىتقانىن ايتقان. ناتيجەسىندە مەكەمەگە تيەسىلى 240 مىڭ تەڭگەنى «تارتىپ الىپ» كەتكەن. وسىلايشا گاز قۇيۋ بەكەتىنىڭ جۇمىسشىسى ءوزىن جابىرلەنۋشى رەتىندە كورسەتكەن. سوعان بايلانىستى 102 ارناسىنا حابارلاما تۇسكەن. اتالعان حابارلاما بويىنشا تەز ارادا وقيعا ورنىنا جەدەل تەرگەۋ توبى جىبەرىلدى.

«پوليتسيا قىزمەتكەرلەرى بولعان وقيعانىڭ ءمان-جايىن جان-جاقتى، تولىق جانە وبەكتيۆتى تۇردە زەردەلەدى. ناتيجەسىندە ءوزىن جابىرلەنۋشى رەتىندە كورسەتكەن ازاماتتىڭ جالعان حابارلاما بەرگەنى انىقتالدى. ەكى دەرەككە قاتىستى قىلمىستىق قۇقىق بۇزۋشىلىق مۇلدەم ورىن الماعان. گاز بەكەتىنىڭ جۇمىسشىسى ءوز كەزەگىندە اقشانى قۇمار ويىندارعا سالىپ جىبەرگەن. زاڭسىز ءىس-ارەكەتىن جاسىرۋ ءۇشىن جالعان حابارلاما بەرگەن. ءوزىن جابىرلەنۋشى رەتىندە كورسەتكەن الگى ازامات سوعان بايلانىستى بەرگەن ارىزىنان باس تارتقان. ول وسى بەكەتتىڭ وپەراتورى مەن كۇزەتشى قىزمەتىن قوسا اتقارعان»، - دەپ ءمالىم ەتتى قىزىلوردا وبلىستىق ىشكى ىستەر دەپارتامەنتىنىڭ باسپا ءسوز قىزمەتى.

قازىرگى تاڭدا قازاقستان رەسپۋبليكاسى قىلمىستىق كودەكسىنىڭ 189-بابىنىڭ 1-بولىگىمەن سوتقا دەيىنگى تەرگەپ- تەكسەرۋ جۇرگىزىلىپ جاتىر. وندا سەنىپ تاپسىرىلعان بوتەن بۇلىكتى يەمدەنىپ الۋ نەمەسە تالان- تاراجعا سالۋ جايى كورسەتىلگەن. سونداي- اق، ول جالعان حابارلاما بەرۋ دەرەگى ورىن الۋىنا بايلانىستى 419-بابىنىڭ 3-بولىگىمەن پايداكۇنەمدىك نيەتپەن جاسالعان كورىنەۋ جالعان ءسوز جەتكىزۋ بويىنشا جاۋاپ بەرەتىن بولادى.

كۇدىكتىگە قاتىستى «كەپىل» تۇرىندەگى بۇلتارتپاۋ شاراسى قولدانىلدى. كۇدىكتى تۇلعانىڭ كىناسى دالەلدەنگەن جاعدايدا سوت شەشىمىمەن ونىڭ ءۇش جىلدان جەتى جىلعا دەيىنگى مەرزىمگە باس بوستاندىعى شەكتەلەدى نەمەسە سول مەرزىمگە باس بوستاندىعىنان ايىرۋ جازاسى قولدانىلۋى مۇمكىن.