ەلىمىزدىڭ سىندارلى ساياساتىن جالعاستىراتىن ساليقالى باسشى كەرەك - دەپۋتات فاريدا مەرحاميت قىزى

الماتى. قازاقپارات - ەلىمىزدەگى الەۋمەتتىك- ەكونوميكالىق ماقسات- مىندەتتەردى لايىقتى جۇزەگە اسىرۋ ءۇشىن سارابدال باسشىنىڭ قاجەتتىگىن ۋاقىت ءوزى دالەلدەپ وتىر.

 كەزەكتەن تىس پرەزيدەنت سايلاۋىنا قاتىستى وسىنداي پىكىرىمەن الماتى قالاسىنىڭ ءماسليحات دەپۋتاتى، «Nur Otan» پارتياسىنىڭ الاتاۋ اۋداندىق فيليالى ساياسي كەڭەسىنىڭ مۇشەسى فاريدا مەرحاميت قىزى ءبولىستى، دەپ حابارلايدى قازاقپارات ءتىلشىسى.

«Nur Otan» پارتياسىنىڭ ءتوراعاسى نۇرسۇلتان نازاربايەۆ پارتيانىڭ ورتالىق اپپاراتىندا بولعان قۇرىلىمدىق فيليالدار جەتەكشىلەرىمەن كەزدەسۋىندە كەزەكتەن تىس پرەزيدەنت سايلاۋى بيلىكتىڭ زاڭدىلىعىن نىعايتىپ، ەلىمىزدەگى تۇراقتىلىقتى قامتاماسىز ەتۋ ءۇشىن قاجەت دەپ مالىمدەدى.

«الداعى سايلاۋعا ءوز ۇمىتكەرىمىزدى ۇسىنۋ ءۇشىن پارتيا سەزىن وتكىزۋ كەرەك. پارتيا اپپاراتى سەزد دايىندىعىنا قاجەتتى بارلىق جۇمىستى تەز ارادا قولعا الۋى ءتيىس»، - دەگەن ەلباسى، سايلاۋدى ەلىمىزدىڭ زاڭناماسى جانە بارلىق دەموكراتيالىق نورمالارى مەن قاعيداتتارىنا ساي وتكىزۋ قاجەتتىگىنە ەرەكشە نازار اۋداردى.

«شىندىعىنا كەلسەك، تاريحتىڭ سان قاتپارلى جولىنان وتكەن ەلىمىز ءۇشىن تاۋەلسىزدىكتىڭ العاشقى ون جىلى وڭاي بولعان جوق. ەل حالقىنا ون ساۋساقتىڭ سالاسىنداي، ءبىر انانىڭ بالاسىنداي تاتۋلىق پەن بىرلىك، شىدامدىلىق پەن توزىمدىلىك كەرەك بولدى. ول ءۇشىن ەلدى سوڭىنا ەرتە بىلەتىن، اقىلدى، بىلگىر، كورەگەن ساياساتكەر، باسشى بولاتىن ازامات كەرەك ەدى. تاۋەلسىز ەلىن 30 جىلعا جۋىق باسقارعان ەلباسىمىز ءوز وكىلەتتىلىگىن توقتاتقان كەزدە «ەندى قالاي بولار ەكەن؟ » دەپ ەلدىڭ كوكەيىندە ساۋال بولعانىن نەسىنە جاسىرايىق. باعىتىمىز بەن ماقساتىمىز ايقىندالعان، الەمگە تانىلعان جاس مەملەكەتتىڭ ىرگەسىن شايقالتپاي، شاڭىراعىن بيىك ۇستايتىن ساليقالى باسشى كەرەك ەكەنىن راسىمەن دە سەزىنە باستادىق. سوندىقتان، الداعى بەلگىلەنگەن سايلاۋدا زايىرلى مەملەكەتتىڭ زاڭ تالاپتارىنا ساي كەلەتىن سارابدال كوشباسشىسى كەلەدى دەگەن ءۇمىتىم زور»، - دەدى ف. مەرحاميت قىزى.

«Nur Otan» پارتياسىنىڭ الماتى قالالىق ءماسليحاتىنداعى دەپۋتاتتىق فراكسياسىنىڭ مۇشەسى وسى جاۋاپتى ىستە حالىقتى بىرلىككە، ىنتىماققا شاقىرا وتىرىپ، ۇيىمشىلدىقپەن سايلاۋعا قاتىسۋعا شاقىردى.

ەسكە سالا كەتسەك، اعىمداعى جىلدىڭ 9 - ماۋسىمىندا ەلىمىزدە كەزەكتەن تىس پرەزيدەنتتىك سايلاۋ وتەدى.

فوتو: www.altyn-orda.kz

اۆتور: گۇلميرا عوسمانالي